Read Mizo_Old_version Malakia 2 Bible Online

Malakia 2 - Mizo_Old_version bible

Malakia 2

¹“Khai le, puithiamte u, he thupêk hi nangmahni tân a ni e.

²Ka hming tiropui tûra in ngaihthlâk lohva, thinlunga in vawn loh chuan, In chungah ânchhia ka rawn thlentîr ang,” sipaihote LALPA chuan a ti, “In malsâwmna dawnte chu ânchhia ka lawh ang. A ni, in zîngah thinlunga vawng in awm loh avângin Anchhia ka lawh tawh reng a ni.

³Ngai teh u, nangmahni vângin in chite chu ka zilhhau va, In hmaiahte chuan êk ka tât pherh ang, in kûtna êk ngei chu; Chumi nên chuan lâk bo in ni ang.

⁴Levia hnêna ka thuthlung hi a din zêl theih nân, He thupêk hi in hnênah ka rawn chhuah a ni tih in hria ang,” Sipaihote LALPA chuan a ti.

⁵“Ka thuthlung chu a hnênah a awm a; nunna leh thlamuanna ka pe a, ṭih pawh mi ṭih a ni, ka hming chu hlauh namênin a hlau lo va.

⁶“Thutak dân chu a kâah a awm a, thu sual a hmuiah a awm lo. Thlamuang tak leh ngîl takin ka hmaah a lêng ṭhîn a, Mi tam tak an khawlohna ata a inlamlêttîr a ni.

⁷Puithiam hmuite chuan hriatna a vawng tûr a ni si a, A ka aṭangin dân chu an zawng ṭhîn tûr a ni; Ani chu sipaihote LALPA tirhkoh a ni si a.

⁸Nangni erawh zawng kawng ata chu in lo pêng ta a; Dânah chuan mi tam tak in petektîr a; Levia thuthlung chu in tichhia a ni,” sipaihote LALPA chuan a ti.

⁹“Chuvângin, kei pawhin, ka kawngte zawh tu mah in awm lohva, Dân thua mi thlei bîk in neih zâwk ang zêl hian, Mi zawng zawng hmaah hmuhsitawm leh tlâwmin ka siam che u a ni.”

¹⁰Kan vaiin Pa hmun kan ni lo vem ni? Pathian pakhat siam pawh kan ni lo vem ni? Engati nge kan pate thuthlung tibawrhbânga, Unau leh unau kan inbum ṭhin?

¹¹Juda chuan bum a hmang a, Israel ram leh Jerusalem khuaah Thil tenawm tih a ni a; LALPAN a hmangaih ṭhin hmun thianghlim chu, Juda chuan a tibawrhbâng ta si a: Ram dang pathian fanu a nei ta a ni.

¹²Hetiang ti chu, tua pawh, Jakoba puan in ata LALPAN a tifihlîm vek ang, Sipaihote LALPA hnêna thil hlântu chenin.

¹³Tin, hei pawh hi in ti leh pek a: mittui leh ṭahna leh rûmnain LALPA maichâm chu in chhilh hneh khawp a, Thilhlan a ngaihsak rêng rêng tawh lo va, In kuta mi chu lâwmawmah a ngai hek lo.

¹⁴Nangni chuan, “Eng vâng nge ni le?” in la han ti a. Nang leh i nupui tawn tirh inkâra thuhretu chu LALPA a ni a, i kawppui leh i thuthlung nupui a ni nachungin, A chungah bumna thil i tih ṭhin vâng a ni.

¹⁵Nunna chi neiin, pumkhatah a siam lo vem ni? Engah nge pumkhata a siam? Chithlah, Pathian ngaihsak a zawng a ni. Tichuan, in nunna chu vêng ṭha ula, Tu mân mahni nupui tawn tirh chu bum suh se.

¹⁶“Inmâk hi ka haw si a,” LALPA, Israel-ho Pathian chuan a ti; “Mahni silhfên hnehchhiahnaa khuhtu nên,” sipaihote LALPA chuan a ti. Tichuan, in nunna chu vêng ṭha ula, inbum suh u.

¹⁷In thutein LALPA chu in tihah ta. Nangni erawh chuan, “Engah khân nge kan tihhah?” in ti a. “Thil sual titu apiang LALPA mit hmuhah mi ṭha an ni a, An chungah pawh ani chu a lâwm ṭhîn,” in tihah te, “Rorêl felna Pathian chu khawiah nge?” in tihahte hian a ni.