Read Mizo_Old_version Malakia 3 Bible Online

Malakia 3 - Mizo_Old_version bible

Malakia 3

¹“Ngai teh u, ka tirhkoh ka rawn tîr a, Ka hmaah kawng a buatsaih ang. Tin, in zawn Lalpa chu a biak inah a lo kal phut ang; Ngai teh u, thuthlung tirhkoh in lawm êm êm chu a lo kal e,” Sipaihote LALPA chuan a ti.

²“Amaherawhchu, a lo kal ni chu tu nge tuar zo vang? A lo lan hunah chuan tu nge ding thei ang? Ani chu rawh tuina mei ang leh puan sutute sahbawn ang a ni si a.

³“Tangkaraw rawh tuitu leh tithianghlimtu angin a ṭhu ang a, Levia fate a tithianghlim ang a, Rangkachak leh tangkarua angin anmahni a tifai ang a; LALPA tân chuan felnaa thil hlântute an ni ang.

⁴Chutichuan, hmasâng nite leh hmasâng kumte angin, Judai ram leh Jerusalem thilhlan chu LALPA tân duhawm tak a ni leh ang.

⁵Rorêl tûrin ka rawn hnaih dâwn a che u; Dawithiamte, uirête, dâwta chhechhamtute chungah leh, Hmeithai leh fahrah leh inhlawhfa hlawh tikhawlova hnehchhiahtute leh, Hnam dang lo sât thlatute - mi ṭih lotute chungah chuan, Thuhretu ṭuanṭha tak ka ni ang,” sipaihote LALPA chuan a ti.

⁶“Kei Lalpa hi ka danglam si lo; chuvângin, nangni, Aw Jakoba fate u, tihboral in ni lo ve.

⁷In pute hun ata tawh ka thuruatte in kal pênsan a, Zawm pawh in zâwm ngai lo. Ka hnênah lo kîr ula; Tichuan, in hnênah ka lo kîr ang,” sipaihote LALPA chuan a ti. “Nangni erawh chuan, ‘Engahte hian nge kan kîr ang?’ in ti a.

⁸Mihringin Pathian ta chu a rûksak tûr em ni? Mahse, nangni chuan min rûksak ṭhîn. Nangni erawh chuan, ‘Engahte hian nge kan rûksak che?’ in ti a, Sâwma pakhat leh thilhlanahte hian.

⁹Anchhia lawh in ni ta; nangni he hnam pum pui hian Kei hi min rûksak si ṭhîn a.

¹⁰Ka inah ei tûr a awm theih nân, sâwma pakhat zawng zawng chu Thawhlâwm inah rawn la rawh u; Vân tukverhte chu hawnsak che uin, Malsâwmna dawn sên loh khawp hial Ka vûr dâwn che u nge dâwn lo che u, mi han fiah teh rêng u,” Sipaihote LALPA chuan a ti.

¹¹“Eiraltu chu ka khapsak ang che u a; Tichuan, in lei rahte chu a tihchhiatsak tawh lo vang che u a, Huana in grêp rah chu a hlam tla ral tawh hek lo vang,” Sipaihote LALPA chuan a ti.

¹²“Tin, hnam zawng zawngin engthâwl an ti ang che u a, Ram duhawm tak in la nih dâwn avângin,” Sipaihote LALPA chuan a ti.

¹³“Ka chunga in thute chu a paukhauh hle,” LALPA chuan a ti. “Nangni erawh chuan, ‘Engah khân nge i chungah Chutiang thu kan sawi?’ in ti a.

¹⁴‘Pathian rawngbâwl hi a thlâwn a ni; a thuchah kan zawm leh Sipaihote LALPA hmaa intilunghnûr taka kan lêng ṭhîn hi sâwtna eng nge awm?

¹⁵Tin, mi chapote chu an eng a thâwl e kan ti a, Thil suaksual titute chu an dingchang bawk a; Pathian an fiah a, chhanhim an ni bawk ṭhîn,’ ” in ti a ni.

¹⁶Tichuan, LALPA ṭihtute chu an inbe tlâng a, LALPA chuan a lo ngaithla a, a lo hria a; LALPA ṭihtute leh a hming ngaihsaktute tân, Hriat rengna lehkhabu chu a hmaah ziak a ni ta a.

¹⁷“Ro chuam ka siam niah chuan ka ta an ni ang,” Sipaihote LALPA chuan a ti; “Tin, miin a fapa, a rawngbâwlsaktu chu a zuat angin anni chu ka zuat ang.”

¹⁸Tichuan, in inlamlêt ang a, mi fel leh mi suaksual, Pathian rawngbâwltu leh bâwl lotu chu in thliar thei tawh ang.