Read Mizo_Old_version CHANCHIN ṬHA MATTHAIA ZIAK 10 Bible Online

CHANCHIN ṬHA MATTHAIA ZIAK 10 - Mizo_Old_version bible

CHANCHIN ṬHA MATTHAIA ZIAK 10

¹Tin, a zirtîr sâwm leh pahnihte chu a ko va, anmahni hnawh chhuah theihna tûrin ramhuai bawlhhlawhte chunga thuneihna a pe a; damlohna tinrêng leh natna tinrêng tihdam theihna tûrin thuneihna a pe bawk a.

²Tin, tirhkoh sâwm leh pahnihte hming chu hêng hi a ni: a hmasa berah chuan Simona (Petera an tih) leh a unau Andria te; Zebedaia fapa Jakoba leh a unau Johana te;

³Philipa leh Bartholomaia te; Thoma leh chhiahkhawntu Matthaia te; Alphaia fapa Jakoba leh Thaddaia te;

⁴Kanaan-a mi Simona leh a mantîrtu Juda Iskariota-te hi.

⁵Chûng sâwm leh pahnihte chu Isuan a tîr chhuak a, an hnênah heti hian thu a pe a: “Jentailte kawngah kal suh ula, Samari mite khua rêng rêngah pawh lût suh ang che u;

⁶amaherawhchu, Israel hnam berâm bote hnênah chuan kal zâwk ang che u.

⁷Tin, in kalin, ‘Vânram chu a lo hnai ta,’ tiin hril zêl ang che u.

⁸Damlote tidam ula, mitthite kaitho ula, phârte tithianghlim ula, ramhuaite hnawt chhuak ang che u; a thlâwnin in hmu a, a thlâwnin pe ang che u.

⁹In kâwnghrênahte chuan rangkachak emaw, tangkarua emaw, dâr emaw keng suh ula;

¹⁰zinna atân iptê emaw, kawr pahnih emaw, pheikhawk emaw, tiang emaw keng hek suh u; hnathawktu chu a ei tûr hmu tlâk a ni si a.

¹¹“Tin, khaw lianah emaw, khaw têah emaw in luhna apiangah, a thleng tlâk mi tûr che u zawng chhuak ula, in chhuah leh hma loh chuan chutah chuan thleng reng ang che u.

¹²Tin, inah chuan in luh dâwnin chibai bûk ang che u.

¹³Tin, ina mite chu chibai bûk tlâk an nih chuan, in thlamuanna thu chu an chungah lo thleng rawh se; an tlâk loh erawh chuan, in thlamuanna thu chu in chungah lo kîr leh rawh se.

¹⁴Tin, tu pawh lâwm lo che ua, in thu pawh ngaithla lo apiang, chu in ata emaw, chu khua ata emaw in chhuah hun chuan, in kephaha vaivut chu thing thla ang che u.

¹⁵Tihtakmeuhvin ka hrilh a che u, ngaihtuah niah chuan, chumi khuate ai chuan Sodom leh Gomorra ram tuar tûr chu a ziaawm zâwk ang.

¹⁶“Ngai teh u, chinghne zînga berâm awm angin ka tirh che u hi; chutichuan, rûl anga finga, ṭhuro anga pawikhawih lovin awm ang che u.

¹⁷Nimahsela, mihring lakah chuan fîmkhur rawh u; rorêltuhote an mantîr dâwn si che u a, inkhâwmna inahte an vua ang che u a;

¹⁸a ni, keimah avângin hotute leh lalte hmaah, anmahni leh Jentailte hriattîrna tûrin an la hruai ang che u.

¹⁹Nimahsela, an mantîr hunah che u chuan, ‘Engtin nge, eng thu nge ka sawi ang?’ tiin lungkham suh ang che u; in sawi tûr chu a hun takah chuan a hriattîr dâwn si che u a.

²⁰A sawitu chu nangni in ni dâwn si lo va, in Pa Thlarauvin nangmahniah a sawi zâwk dâwn a ni.

²¹“Tin, tihhlum tûrin unaupa leh unaupa an inmantîr ang a, pa pawhin a fa a mantîr bawk ang; fate pawhin an nu leh an pate an do vang a, an tihhlumtîr bawk ang.

²²Keima hming avângin mi zawng zawng huat in ni ang; nimahsela, a tâwp thlenga tuar peih apiang, chu mi ngei chu chhandamin a awm ang.

²³“Chutichuan, he khuaah hian an tihduhdah hunah che u, khaw dangah tlânsan ang che u; tihtakmeuhvin ka hrilh a che u, Mihring Fapa a lo kal hmain Israel khuate chu in fang chhuak lo vang.

²⁴“Zirtîr a zirtîrtu chungah a awm lo; bawih pawh a pu chungah a awm hek lo.

²⁵Zirtîr chu a zirtîrtu anga lo awm leh, bawih chu a pu anga lo awm chu a tâwk e. In neitupa mah ‘Beelzebula’ an tih chuan, a chhûngte chu an va ti nasa dâwn êm!

²⁶“Chutichuan, anmahni chu hlau suh ang che u; lang lo tûra thuhrûk eng mah a awm si lo, hriat loh tûra zêp pawh eng mah a awm hek lo.

²⁷Thima ka hrilh che u hi êngah sawi ang che u; beng bula in hriat hi in chunga chuangin tlângaupui ang che u.

²⁸“Tin, taksa tihluma thlarau tihlum thei lotute chu hlau suh ula; Gehenna-a thlarau leh taksa tiboral theitu chu hlau zâwk ang che u.

²⁹Chawngzawng pahnih dâr tangka pakhatah an hralh ṭhîn lo vem ni? Nimahsela, an zînga pakhat mah in Pa lovin leiah a tla lo vang.

³⁰In samzaite lam pawh hi chhiar vek a ni asin.

³¹Chuvângin, hlau suh u; chawngzawng tam tak aiin in hlu zâwk si a.

³²“Chutichuan, mite hmaa mi ṭan apiang, ka Pa vâna mi hmaah ka ṭan ve ang.

³³Nimahsela, tu pawh mite hmaa mi phat apiang, ka Pa vâna mi hmaah ka phat ve ang.

³⁴“Khawvêlah hian rem lêntîr tûra lo kal emaw min ti suh u; rem lêntîr tûra lo kal ka ni lo va, khandaih lêntîr tûra lo kal ka ni zâwk.

³⁵Mi a pa dotîr tûrin, fanu a nu dotîr tûrin, mo a pi dotîr tûrin lo kal ka ni asin.

³⁶Mi a hmêlmate chu ama chhûngte zînga mi ngei an ni ang.

³⁷Tu pawh a nu emaw, a pa emaw keimah aia hmangaih zâwk chu ka mi ni tlâk a ni lo; tu pawh a fanu emaw, a fapa emaw keimah aia hmangaih zâwk pawh ka mi ni tlâk a ni lo.

³⁸Tu pawh a kraws pua mi zui lo chu ka mi ni tlâk a ni lo.

³⁹Tu pawh a nunna hmu chuan a chân ang a; keimah avânga a nunna chân chuan a hmu ang.

⁴⁰“Tu pawh a lâwm che u chu mi lâwm an ni a, tu pawh mi lâwm chu mi tîrtu lâwm an ni.

⁴¹Tu pawh zâwlnei chu zâwlnei a nih avânga lâwm chuan zâwlnei lâwmman an hmu ang a; tu pawh mi fel chu mi fel a nih avânga lâwm chuan mi fel lâwmman an hmu ang.

⁴²Tin, tu pawh hêng mi tê tak zînga pakhat hnênah hian, zirtîr a nih avânga tui vâwt no khat chauh pawh pe apiang chuan, tihtakmeuhvin ka hrilh a che u, an lâwmman chu an chân tawp lo vang,” a ti a.