Read Mizo_Old_version CHANCHIN ṬHA MATTHAIA ZIAK 12 Bible Online

CHANCHIN ṬHA MATTHAIA ZIAK 12 - Mizo_Old_version bible

CHANCHIN ṬHA MATTHAIA ZIAK 12

¹Chumi lai chuan Isua chu Chawlhniah buh hmunahte a kal tlang a; a zirtîrte chu an ril a ṭâm a, buhvuite an thliak a, an ei ta a.

²Tin, Pharisaiten chu chu an hmuhin, a hnênah, “En teh, i zirtîrten Chawlhniah tih thiang lo chu an tih hi,” an ti a.

³Ani erawh chuan an hnênah, “Davida a rilṭâm laia a ṭhiante nêna an thiltih kha in chhiar lo vem ni?

⁴Khatia Pathian ina a luha, amah leh a ṭhiante ei thian loh, puithiamte chauh ei thian chhangdah chu an ei thu kha?

⁵A nih leh, Chawlhnia Pathian biak ina puithiam awmte chuan, Chawlhni an bawrh pawhin an thiam zêl tih dân thu-ah chuan in chhiar lo vem ni?

⁶Eng pawh ni sela, Pathian biak in aia ropui zâwk hetah a awm tih ka hrilh a che u.

⁷Nimahsela, ‘Inthawina duh lovin khawngaihna ka duh e,’ tih hi a awmzia lo hre tawh ni ula chu, mi thiamte chu thiam loh in chantîr lo tûr.

⁸Mihring Fapa hi Chawlhni Lal a ni si a,” a ti a.

⁹Tin, chuta ṭang chuan a kal a, an inkhâwmna inah a va lût a.

¹⁰Tin, ngai teh, mi pakhat kutzeng a lo awm a. Tin, an hêk theih nân, “Chawlhniin tihdam a thiang em?” tiin Isua an zâwt a.

¹¹Tin, ani chuan an hnênah, “Nangni zîngah tu pawhin berâm pakhat nei ula, chu chu Chawlhniah khuarkhurumah tla ang sela, tu nge chelhin kai chhuak lo vang che u?

¹²Berâm pakhat ai chuan mihring pakhat chu a va hlu zâwk êm! Chuvângin, Chawlhniah tihṭhat a thiang e,” a ti a.

¹³Chu veleh, chu mi hnênah chuan, “I kut phar rawh,” a ti a. Tichuan, a phar a, a lehlam angin a dam ta viah a.

¹⁴Chutichuan, Pharisaite chu an chhuak a, amah an tihboral theih dân tûr ngaihtuahin an inrâwn a.

¹⁵Nimahsela, Isuan chu chu a hriatin chuta ṭang chuan a kal bo ta a. Tin, mi tam takin amah an zui a, an zain a lo tidam vek a,

¹⁶a chanchin puan loh tûr an hnênah a ti tlat a:

¹⁷Zâwlnei Isaian, “En teh, ka chhiahhlawh, ka thlan, Ka duh tak, ka rilruin a lawm êm êma hi; A chungah ka thlarau ka dah ang a, Tichuan, Jentailte hnênah rorêlna thu a hril ang.

¹⁸

¹⁹A hnial lo vang a, a au hek lo vang a, Kawtthlêrahte pawh tu mân a aw an hre hek lo vang.

²⁰Hneh tûra rorêlna a tirh chhuah hma loh zawng Luang sâwp a titliak fithla lo vang a, La khu pawh a timit lo vang.

²¹Ama hming chu Jentailte chuan an beisei chhan ang,” tia a sawi kha a lo thlen theihna tûrin.

²²Chumi lai chuan, mitdel ṭawngtheilo ramhuai man pakhat a hnênah an rawn hruai a; tin, ani chuan a lo tidam a; chutichuan, ṭawngtheilo chu a lo ṭawng theiin, a lo hmu thei ta a.

²³Tin, mipuiho zawng zawng chuan mak an ti hle a, “He mi hi Davida fapa chu a ni lâwm ni?” an ti a.

²⁴Nimahsela, Pharisaiten chu chu an hriat veleh, “He mi hian ramhuai lal Beelzebula avâng lo chuan ramhuaite a hnawt chhuak lo vang,” an ti a.

²⁵Tin, Isuan an ngaihtuahte chu a lo hria a, an hnênah, “Khawii ram pawh mahni indo apiang an boral ṭhîn; khawii khua pawh, chhûngkhat pawh, mahni indo apiang an ding khawchhuak lo vang.

²⁶Tin, Setanan Setana vêk a hnawh chhuah chuan mahni indo a ni ang asin; a ram chu engtin nge a din chhuah ang le?

²⁷Tin, kei Beelzebula avânga ramhuaite hnawt chhuak ṭhîn ka lo nih chuan, in faten tu vângin nge an lo hnawh chhuah ṭhin le? Chuvângin, anni chu nangmahni ngaihtuahtu tûrte an ni ang.

²⁸Amaherawhchu, kei hian Pathian Thlarau avânga ramhuaite hnawt chhuak ṭhîn ka nih chuan, Pathian ram in hnênah a lo thleng tawh a ni ang.

²⁹Chuti a nih si loh chuan, miin mi chak chu a phuar hmasak zet loh chuan, engtin nge mi chak ina lûtin a sum a lâksak theih ang? Chumi hnuah erawh chuan a in chu a ramsak mai ang.

³⁰Tu pawh ka lama ṭang lo chu mi do an ni; tu pawh mi lâk khâwmpui lo chuan an tidarh a ni.

³¹“Chuvângin, ka ti a che u, mi an sualna tinrêngah leh Pathian an sawichhiatna tinrêngah chuan ngaihdamsak an ni ang a; Thlarau meuh sawichhiatna erawh chu ngaihdamsak a ni lo vang.

³²Tin, tu pawh Mihring Fapa sawisêl apiang chu, an sawisêlna chu ngaihdamsak a ni ang a; tu pawh Thlarau Thianghlim meuh sawisêl apiang erawh chu, an sawisêlna chu tûn dam chhûngah pawh, hun lo la thleng tûrah pawh ngaihdamsak a ni lo vang.

³³“Thing chu a ṭha, a rah pawh a ṭha, in tih loh vêk leh, thing chu a chhia, a rah pawh a chhia, ti law law rawh u; thing chu a rahah a hriat si a.

³⁴Rûl thlahte u, nangnin sual reng chungin engtin nge thu ṭha in sawi theih ang? Thinlunga khat liam chu kain a sawi ṭhîn asin.

³⁵Mi ṭha chuan a ro bâwm ṭha ata thil ṭhate a theh chhuak ṭhîn a, mi sual chuan a ro bâwm chhia ata thil chhiate a theh chhuak ṭhîn.

³⁶Tin, ka hrilh a che u, miten thu lawilo an sawi apiang, chûng thu chu rorêl niah chuan an sawi fiah a la ṭûl ang.

³⁷I thu chuan thiam a chantîr ang chia, i thu vêk chuan thiam loh a chantîr bawk dâwn che asin,” a ti a.

³⁸Chumi lai chuan lehkhaziaktute leh Pharisaite zînga mi tuten emaw an bia a, a hnênah, “Zirtîrtu, i hnên ata chhinchhiahna hmuh kan duh e,” an ti a.

³⁹Ani erawh chuan an hnênah, “Chhuan sual tak leh uire hmang takte chuan chhinchhiahna an zawng a; nimahsela, zâwlnei Jona chhinchhiahna chauh lo chu an hnênah chhinchhiahna rêng rêng pêk a ni lo vang:

⁴⁰Jona chu ni thum leh zan thum nghapui kawchhûnga a awm ang khân, Mihring Fapa hi ni thum leh zan thum lei kawchhûngah a awm bawk dâwn a ni.

⁴¹Ninevi khuaa mite chu ngaihtuah hunah chuan, tûnlai chhuante hnênah hian an ding ve ang a, thiam loh an chantîr ang, Jona thuhril avângin an sim si a; ngai teh u, Jona aia ropui zâwk hetah hian a awm asin.

⁴²Chhim lam lalnu kha ngaihtuah hunah chuan, tûnlai chhuante hnênah hian a tho ve ang a, thiam loh a chantîr ang; Solomona fin ngaithla tûr mahin kâwlkil ata a lo kal si a; ngai teh u, Solomona aia ropui zâwk hetah hian a awm asin.

⁴³“Tin, ramhuai bawlhhlawh chu mi kawchhûng ata a chhuahin, chawlhna zawngin tui awm lohna hmunahte a vâk a vâk a, a hmu ṭhîn si lo va.

⁴⁴Tin, ‘Ka chhuahna inah khân ka kîr leh mai ang,’ a ti a; tin, a va thlen chuan, in chu ruaka, phiah faia, chei mawiin a hmu a.

⁴⁵Chu veleh a va kal a, amah aia sual zâwk ramhuai dang pasarih a hruai a, chutah chuan an lût a, an awm reng ṭhîn a; chu mihringa awmze hnuhnûng chu a hmasa aiin a lo ṭha lo zâwk ṭhîn a ni. Chutiang bawkin tûnlai chhuan sual takte chungah hian a la awm ang,” tiin a chhâng a.

⁴⁶Mipuite hnêna thu a la sawi lai chuan, ngai teh, a nu leh a unaute chu amah biak tumin pâwnah an ding a.

⁴⁷Tin, mi pakhatin a hnênah, “Ngai teh, i nu leh i unaute biak tum chein pâwnah sâwn an ding reng e,” a ti a.

⁴⁸Ani erawh chuan a hrilhtu hnênah chuan, “Ka nu chu tu nge ni? Ka unaute pawh chu tute nge ni?” tiin a chhâng a.

⁴⁹Tin, a zirtîrte lamah a kut a phar a, “En teh u, ka nu leh ka unaute hi!

⁵⁰Tu pawh ka Pa vâna mi duh zâwng ti apiang chu ka unau te, ka farnu te, ka nu te an ni asin,” a ti a.