Read Mizo_Old_version CHANCHIN ṬHA MATTHAIA ZIAK 13 Bible Online

CHANCHIN ṬHA MATTHAIA ZIAK 13 - Mizo_Old_version bible

CHANCHIN ṬHA MATTHAIA ZIAK 13

¹Chumi ni chuan Isua chu in ata a kal chhuak a, dîl kamah chuan a ṭhu a.

²Tin, a hnênah mipui tam tak an rawn inkhâwm a; chutichuan, lawngah a chuang a, a ṭhu a; mipui zawng zawng chu ṭiauphovah an ding a.

³Tin, tehkhin thuin thu tam tak an hnênah a sawi a: “Ngai teh u, buh chi thehtu buh chi thehin a feh a;

⁴tin, a theh laiin a ṭhen kawngdungah a tla a, savaten an rawn tlân zo ta a.

⁵Tin, a ṭhen pialtlêp lei pan hmunah a tla a; lei a chhah loh avângin a ṭo ta nghâl a.

⁶Nimahsela, ni a lo tlângsân deuhvin em vuaiin a lo awm a, zung a neih loh avângin a râwp ta mai a.

⁷Tin, a ṭhen hnimhlîngnei zîngah a tla a, hnim chu a lo ṭo sâng a, a dîp ral ta a.

⁸Tin, a ṭhen leiṭhaah a tla a, ṭhenkhat a leh za te, ṭhenkhat a leh sawmruk te, ṭhenkhat a leh sawmthum tein a lo rah ta a.

⁹Tu pawh beng nei chuan hre rawh se,” a ti a.

¹⁰Tin, zirtîrte chu an lo kal a, a hnênah, “Engati nge an hnênah tehkhin thuin i sawi?” an ti a.

¹¹Tin, ani chuan a chhâng a, an hnênah, “Vânram thurûk chu nangni hriat zawng phal a ni a, anni hriat erawh chu phal a ni lo.

¹²Tu pawh a nei apiang an pêk belhchhah ang a, an nei ṭeuh vang; nimahsela, tu pawh a nei lo apiang chu, an neih chhun pawh an lâksak ang.

¹³Chutih avâng chuan tehkhin thuin an hnênah ka sawi a ni; hmu mah sela an hmuh ṭhin lohva, bengin hre mah sela an hriat ṭhin lohva, a ngaihna pawh an hriat ṭhin loh avângin.

¹⁴“Tin, Isaia thu sawi lâwk kha an chungah a lo thleng a nih hi: Beng zawngin in hre na ang a, a ngaihna erawh chu in hre tawp lo vang; Hmuh zawng in hmu na ang a, Hriat erawh chu in hre tawp lo vang;

¹⁵He chite thinlung hi a lo chawlawl ta a, An bengte a lo ngawng deuh va, An maimitchhîng bawk a; ‘Chuti lo chuan, kan mitin kan hmu ang a, Kan bengin kan hria ang a, Kan thinlungin kan hre bawk ang a, Kan hawi kîr leh ang a, Anin min tidam hlauh dah ang e,’ an ti a, a tih kha.

¹⁶“Nangni mit erawh chu a vânnei a ni, a hmuh ṭhin avângin; in beng pawh a vânnei a ni, a hriat ṭhin avângin.

¹⁷Tihtakmeuhvin ka hrilh a che u, zâwlnei tam takte leh mi fel tam takte pawhin in thil hmuhte hi hmuh an châk a; nimahsela, an hmu si lo; in thil hriatte pawh hi hriat an châk a; nimahsela, an hre si lo.

¹⁸“Chutichuan, buh chi thehtu tehkhin thu chu hre rawh u.

¹⁹Tu pawhin ram thu chu benga a lo hriata, a ngaihna a hriat si loh chuanin, mi sual chu a lo kal a, a thinlunga theh sa chu a chhuhsak ṭhîn. Chu mi chu kawngdunga theh chu a ni.

²⁰Tin, pialtlêp hmuna theh chu, thu chu hriaa lâwm taka pawm nghâl ṭhîn hi a ni;

²¹nimahsela, amahah chuan zung a awm lo va, rei lo tê chauh a awm a; tin, thu avâng chuan hrehawmna emaw, tihduhdahna emaw a lo awm veleh a tlu nghâl mai ṭhîn.

²²Tin, hnimhlîngnei zînga theh chu, thu hretu a ni a; nimahsela, khawvêl lungkhamna leh hausakna bumna chuan thu chu a dîp a, rah lovin a lo awm ṭhîn.

²³Tin, leiṭhaa theh chu, thu chu benga hriaa a ngaihna hre bawk hi a ni; chu mi chu a rah ngei a, ṭhenkhat a leh za te, ṭhenkhat a leh sawmruk te, ṭhenkhat a leh sawmthum tein a pung ṭhîn,” a ti a.

²⁴Tehkhin thu dang an hnênah a sawi leh a: “Vânram chu, mi a lova chi ṭha thehtu nên chuan tehkhin a ni;

²⁵nimahsela, mi an muthilh hlânin a hmêlma a lo kal a, buh zîngah chuan buh lem a theh a, a kal bo leh ta a.

²⁶Tin, buh chu a lo ṭo va, a lo vui chuan buh lem chu a lo lang ve ta a.

²⁷Tin, in neitu bawihte chu an lo kal a, a hnênah chuan, ‘Ka pu, i lovah chi ṭha i theh lo vem ni? Buh lem saw khawi ata lo awm nge ni le?’ an ti a.

²⁸Tin, ani chuan an hnênah, ‘Chu chu hmêlmain a lo ti ta a nih chu,’ a ti a. Tin, bawihte chuan a hnênah, ‘A nih leh chûng chu va la khâwm mai ila rem i ti em?’ an ti a.

²⁹Ani erawh chuan, ‘Remti lo ve; buh lem chu in lâk khâwm zâwngin buh chu in pawt tel hlauh dah ang e.

³⁰Buh seng thlengin ṭo za rawh se; tin, buh seng hunah chuan buh âttute hnênah, buh lem chu la khâwm hmasa zet ula, hâl tûrin têl rawh u; buh erawh chu ka buh inah seng lût rawh u, ka la ti ang e,’ a ti a,” a ti a.

³¹Tehkhin thu dang an hnênah a sawi leh a: “Vânram chu anṭam chi fang khat miin a lâka, a lova a theh ang chu a ni a;

³²chu chu chi zawng zawng aiin a tê ber a; nimahsela, a lo ṭo sân hunah chuan thlaite ai chuan a lian zâwk a, thing a lo ni ṭhîn a; chutichuan, chunglêng savate chu an lo kal a, a zârahte chuan an riak ṭhîn a,” a ti a.

³³Tehkhin thu dang an hnênah a sawi leh a: “Vânram chu, dawidim hmeichhiain a lâka, chhangphut tehkhâwng thum zîngah a zaa a thawh vek thlenga a phûma ang chu a ni,” a ti a.

³⁴Chûng zawng chu Isuan tehkhin thuin mipuite hnênah a sawi a, tehkhin thu lovin an hnênah eng mah a sawi lo:

³⁵zâwlneiin, “Tehkhin thuin ka kâ ka âng ang a, Leilung pian tirh ata thil inthup chu Ka sawi chhuak ang,” tia a sawi kha a lo thlen theihna tûrin.

³⁶Chumi lai chuan mipuite chu a kalsan a, inah chuan a lût ta a; tin, a zirtîrte chu a hnênah an lo kal a, “Lova buh lem tehkhin thu kha min hrilhfiah rawh,” an ti a.

³⁷Tin, ani chuan a chhâng a, “Chi ṭha thehtu chu Mihring Fapa hi a ni a;

³⁸lo chu khawvêl hi a ni a; chi ṭhate chu ram fate an ni a; buh lemte chu mi sual fate an ni a;

³⁹hmêlma, a thehtu chu Diabola a ni a; buh seng chu khawvêl tâwpna tûr a ni; buh âttute chu vântirhkohte an ni.

⁴⁰Chutichuan, buh lemte chu an la khâwm a, meiin an hâl ang hian khawvêl tâwpnaah chuan a la awm ang.

⁴¹Mihring Fapa hian a vântirhkohte chu a tîr chhuak ang a, a ram ata tihsualtîrtute leh thil tisualtute zawng zawng chu an thiar chhuak ang a,

⁴²rawh tuina meiah chuan an paih ang; chutah chuan ṭah leh ha ṭhial chu a awm ang.

⁴³Chumi hunah chuan mi felte chu an Pa ramah chuan ni angin an êng tawh ang. Beng nei chuan hre rawh se.

⁴⁴“Vânram chu lova ro phûm rûk ang a ni; chu chu miin a hmu a, a thukru a; a lâwm avângin a neih zawng zawng chu a va hralh a, chu lo chu a lei ta a.

⁴⁵“Tin, vânram chu sumdâwng mi, tuikeplung ṭha tak zawngtu ang chu a ni leh a;

⁴⁶tin, ani chuan tuikeplung hlu tak pakhat a hmu a, a neih zawng zawng chu a va hralh a, a lei ta a.

⁴⁷“Tin, vânram chu lênkhang, tuifinriata dena, chi tinrêng fûn khâwmna ang chu a ni leh pek a.

⁴⁸Chu chu a khah veleh a kamah an hnûk chhuak a; tin, an ṭhu a, a ṭha zawng chu bâwmah an la khâwm a, a chhia erawh chu an paih a.

⁴⁹Khawvêl tâwp hunah chuan chutiang bawkin a awm ang; vântirhkohte chu an lo chhuak ang a, mi fel zîng ata mi sualte chu an hlîr ang a,

⁵⁰rawh tuina meiah chuan an paih ang; chutah chuan ṭah leh ha ṭhial chu a awm ang,” a ti a.

⁵¹Isua vêkin an hnênah, “Chûng zawng zawng chu in hria em?” a ti a. Anni chuan a hnênah, “Hria e,” an ti a.

⁵²Tin, ani chuan an hnênah, “Chuti a nih chuan, lehkhaziaktu vânram kawng zirtîra awm apiang chu, in neitu, a ro bâwm ata thil tharte leh thil hluite phawrh chhuak ṭhîntu ang chu a ni,” a ti a.

⁵³Tin, heti hi a ni a, Isua chu chûng tehkhin thute a sawi zawh veleh chuan chuta ṭang chuan a kal ta a.

⁵⁴Tin, a awmna khaw lam chu a thleng a, an inkhâwmna inah chuan anmahni a zirtîr ta a; chutichuan, mak an ti hle a, “He mi hian he finna leh hêng thil mak tih theihnate hi khawi ata nge a hmuh?

⁵⁵He mi hi thingrem siamtu fapa kha a ni lo vem ni? A nu chu Mari an tih hi a ni lo vem ni? A unaute pawh Jakoba, Josefa, Simona, Juda an tihte chu an ni lo vem ni?

⁵⁶A farnute pawh kan hnêna awm an ni vek lo vem ni? He mi hian khawi ata tehlul nge hêng zawng zawng hi a hmuh ni?” an ti a.

⁵⁷Tichuan, a chungah an lungni ta lo va. Nimahsela, Isuan an hnênah, “Zâwlnei chu ama khaw lamah leh ama inah chauh lo chuan chawimawi lohvin a awm ngai lo,” a ti a.

⁵⁸Tin, an rin loh avângin chutah chuan thil mak tam a ti lo.