Read Mizo_Old_version CHANCHIN ṬHA MATTHAIA ZIAK 14 Bible Online

CHANCHIN ṬHA MATTHAIA ZIAK 14 - Mizo_Old_version bible

CHANCHIN ṬHA MATTHAIA ZIAK 14

¹Chumi lai tak chuan Lal Heroda chuan Isua chanchin chu a lo hria a,

²a chhiahhlawhte hnênah, “Chu chu Baptistu Johana kha a nih chu; mitthi zîng ata a tholeh ta zuk nia; chuvângin, chûng thiltihtheihnate chuan amahah a thawk a nih chu,” a ti a.

³(Heroda chuan a unau Philipa nupui Herodi avângin Johana chu a man a, a phuar a, tân inah a lo khung tawh a ni;

⁴Johana chuan a hnênah, “Ani i neih hi a thiang lo ve,” a tihsak avângin.

⁵Tin, Johana chu tihhlum a tumin mipui a hlau va, zâwlneia an ruat avângin.

⁶Nimahsela, Heroda pian champhaphâk ni chu a lo thlenin Herodi fanu chu a laiah a lâm a, Heroda chu a tilâwm ta a.

⁷Chumi avâng chuan a dîl apiang pe tûrin chhechhamin a tiam ta a.

⁸Tin, ani chuan a nu fuihin, “Hetah hian thlêngin Baptistu Johana lu mi pe rawh,” a ti a.

⁹Tin, lal chu a lungngai ta a; nimahsela, a thutiamte leh a chaw kîlpuite avâng chuan pêk tûr thu a pe a;

¹⁰tichuan, mi a tîr a, tân ina Johana lu chu a tantîr a.

¹¹Tin, a lu chu thlêngin an rawn la a, hmeichhe naupang hnênah chuan an pe a; ani chuan a nu hnênah a kalpui ta a.

¹²Tin, zirtîrte chuan a ruang chu an va hlâwm a, an phûm a; tin, Isua an va hrilh a.)

¹³Tin, Isuan chu chu a hriatin, chuta ta chu lawngin thlalêr hmunah a kal hrang ta a. Nimahsela, mipuite chuan an hriat veleh khua aṭangte chuan kea kalin an zui ta a.

¹⁴Tichuan, ani chu vaukama a chhuah chuan mipui tam tak a hmu a, a khawngaih êm êm a, an damlote a tidam a.

¹⁵Tin, tlai lam a lo nihin zirtîrte chu a hnênah an lo kal a, “Hei hi thlalêr hmun a ni a, khua pawh a lo tlai ta si a; khuaahte kalin an tân ei tûr an lei theihna tûrin mipuite hi kaltîr ta che,” an ti a.

¹⁶Isua erawh chuan an hnênah, “An kal bo a ngai lo ve; nangmahnin ei tûr pe rawh u,” a ti a.

¹⁷Tin, anni chuan a hnênah, “Hetah chhangpêr panga leh sangha pahnih chauh kan nei a ni,” an ti a.

¹⁸Tin, ani chuan, “Hetah ka hnênah han la rawh u,” a ti a.

¹⁹Tin, hlobet chunga ṭhu tûrin mipuite chu thu a pe a, chhangpêr panga leh sangha pahnih chu a la a, vân lam enin mal a sâwm a, a phel a, chhangpêrte chu zirtîrte hnênah a pe a; tin, zirtîrte chuan mipuite hnênah an pe a.

²⁰Tin, an vaiin an ei a, an puar ta hlawm a; an ei bângnawi pawh chu bâwmrâng sâwm leh pahnih an rût khat a.

²¹A eitute chu, hmeichhia leh naupang tiam lovin, patling hlîr pawh sângnga lai an ni a.

²²Tin, mipuite chu a ṭîntîr vêl chhûngin, a kal hmaa râl lehlama lo kal hmasa tûrin zirtîrte chu lawngah a chuan luihtîr ta nghâl a.

²³Tin, mipuite chu a ṭîntîr hnuin, ṭawngtai tûrin tlângah chuan a han kal hrang a; tin, tlai lam a lo nihin chutah chuan amah chauhvin a awm ta a.

²⁴Lawng erawh chu dîl lai takah a awm tawh a; thliin a ni lo zâwnga a nem avângin tuifâwnin a vawrh a vawrh ta a.

²⁵Tin, khawfîng chah dawn laiin, dîl chungah kea kalin an hnên lam a rawn pan a.

²⁶Tin, zirtîrte chuan amah chu dîl chunga kea a kal an han hmuh chuan, “Hmuithla a nih saw!” tiin an thlaphâng a, hlauvin an au ta vak mai a.

²⁷Nimahsela, Isuan anmahni a be ta nghâl a, “Thlamuang takin awm rawh u; keimah ka ni alâwm; hlau suh u,” a ti a.

²⁸Tin, Peteran a chhâng a, “Lalpa, nang i nih chuan tui chunga i hnêna lo kal thu mi pe rawh,” a ti a.

²⁹Tin, ani chuan, “Lo kal ta che,” a ti a. Petera chu lawng ata a chhuk a, Isua hnên lam panin tui chungah chuan kein a kal a.

³⁰Nimahsela, thli tleh chu a hmuhin a hlau va, a pil dâwn ta mai a, “Lalpa, min chhandam rawh,” tiin a au ta a.

³¹Tin, Isuan a ban ta nghâl a, amah chu a chelh a, a hnênah, “Nang, rin tlêm, engah nge i rinhlelh le?” a ti a.

³²Tin, lawnga an chuan chuan thli chu a bâng ta mai a.

³³Tin, lawnga awmte chuan, “Pathian Fapa i lo nih takzet hi,” tiin amah chibai an bûk a.

³⁴Tin, râl lehlam an kai chuan Gennesaret ram khawmual an thleng ta a.

³⁵Tin, chumi hmuna mite chuan amah an hriat veleh, chumi kiang vêl ram zawng zawngah chuan mi an tîr a, damlo zawng zawng chu a hnênah an rawn hruai a;

³⁶tin, a puan hmâwr tal deh theih an dîl chiam a; tin, a dek apiang chu an lo dam ta zêl a.