Read Mizo_Old_version CHANCHIN ṬHA MATTHAIA ZIAK 15 Bible Online

CHANCHIN ṬHA MATTHAIA ZIAK 15 - Mizo_Old_version bible

CHANCHIN ṬHA MATTHAIA ZIAK 15

¹Chumi lai chuan, Jerusalem khua aṭangin Pharisaite leh lehkhaziaktute Isua hnênah an lo kal a,

²“Engati nge i zirtîrten upate thurochhiah chu an bawhchhiat ṭhin? Chhang an eiin an kut an sil ngai si lo va,” an ti a.

³Tin, ani chuan an hnênah, “Nangni pawhin engati nge in thurochhiah avânga Pathian thupêk in bawhchhiat ni?

⁴Pathianin, ‘I nu leh i pa chawimawi rawh,’ ‘Tu pawh a nu emaw, a pa emaw sawichhia apiang chu thi mawlh rawh se,’ a ti si a.

⁵Nangni erawh chuan, ‘Tu pawh a nu emaw, a pa emaw hnêna, “I mi chhawrna tûr hi Pathian hnêna pêk a ni tawh,” ti apiang chuan,

⁶a nu leh a pa a chawimawi tûr a ni lo ve,’ in ti ṭhîn a. Tichuan, in thurochhiah avângin Pathian thu chu in bawh bo ta a nih hi.

⁷Vervêkte u, Isaia hian in chungchâng thu a lo hril lâwk dik zet mai,

⁸‘He miteho hian an kâin min chawimawi a, An thinlung erawh chuan min hlat si a.

⁹Eng pawh ni sela, an zirtîrnaah mihring thupêk an zirtîr avângin An mi biak ṭhin hi a thlâwn mai a ni,’ tiin,” a ti a, a chhâng a.

¹⁰Tin, mipui chu a ko va, an hnênah, “Ngaithla ula, lo ngai thiam rawh u:

¹¹kâa lût chu mihring tibawlhhlawhtu a ni lo va; kâa chhuak chu, chu ngei chu mihring tibawlhhlawhtu a ni zâwk e,” a ti a.

¹²Chumi lai chuan a zirtîrte an lo kal a, a hnênah, “Pharisaiten kha thu kha an hriata an lungnih loh kha i hria em?” an ti a.

¹³Ani erawh chuan, “Kûng zawng zawng ka Pa vâna mi phun loh chu pawh chhuahin a awm ang.

¹⁴Anni chu pawisa suh u; hruaitu mitdel an ni. Tichuan, mitdelin mitdel vêk a hruai chuan khuarkhurumah an tla dûn ang,” a ti a, a chhâng a.

¹⁵Tin, Peteran a hnênah, “Tehkhin thu kha min hrilhfiah ta che,” tiin a chhâng a.

¹⁶Tin, ani chuan, “Tûn thlengin nangni pawh hriatna nei lovin in la awm cheu maw?

¹⁷Kâa lût apiang chu pumah a tla thla a, dailênnaa paih chhuahin a awm tih in hre lâwm ni?

¹⁸Kâa chhuakte erawh chu thinlung aṭanga lo chhuak a ni; chûng ngei chuan mihring a tibawlhhlawh ṭhîn a ni.

¹⁹Thinlung aṭang hian ngaihtuahna sual te, tualthahna te, uirêna te, inngaihna te, rûkrûkna te, hêkna te, sawichhiatna te a lo chhuak si ṭhîn a;

²⁰Chûng chu mihring tibawlhhlawhtu a ni; kut sil lova chaw ei erawh chuan mi a tibawlhhlawh lo ve,” a ti a.

²¹Tin, Isua chu chuta ta chu a chhuak a, Tura leh Sidon bialah a kal ta a.

²²Tin, ngai teh, chûng ram ata chu Kanaan hmeichhe pakhat a lo chhuak a, “Lalpa, Davida Fapa, mi khawngaih rawh; ka fanu ramhuaiin a man tlat a ni,” tiin a au va.

²³Ani erawh chuan kam khat mahin a chhâng lo. Tin, a zirtîrte chuan, “Kan hnungah a au a au si a, kaltîr mai ta che,” tiin an rawn ngên a.

²⁴Ani erawh chuan, “Israel hnam berâm bo hnênah lo chuan tirh ka ni lo ve,” a ti a, a chhâng a.

²⁵Nimahsela, hmeichhia chu a lo kal a, “Lalpa, mi pui rawh a!” tiin chibai a bûk a.

²⁶Tin, ani chuan, “Fate chhang lâksaka, uite hnêna paih chu a mawi lo ve,” a ti a, a chhâng a.

²⁷Ani chuan, “Lalpa, nih zawng a ni a; nimahsela, uite pawhin an pu dawhkân ata chhang nawi tla chu an ei ṭhîn alâwm,” a ti a.

²⁸Chu veleh Isua chuan a hnênah, “Hmeichhia, i rin a nasa êm mai; i duh ang takin i chungah awm rawh se” a ti a, a chhâng a. Tichuan, a fanu chu chumi achinah chuan a lo dam ta mai a.

²⁹Tin, Isua chu chuta ta chu a kal a, Galili dîl kiang a thleng a; tin, tlângah chuan a chho va, chutah chuan a ṭhu ta a.

³⁰Tin, mipui tam tak, kebai te, mitdel te, ṭawngtheilo te, piangsual te rawn hruaiin a hnênah an lo kal a, a ke bulah an dah a; tin, a tidam ta hlawm a.

³¹Chutichuan, mipui chuan ṭawngtheilote chu lo ṭawnga, piangsualte chu lo ṭhaa, kebaite chu kea kala, mitdelte chu hmu theia an hmuhin mak an ti hle a; tichuan, Israel-te Pathian chu an fak ta a.

³²Tin, Isuan a zirtîrte chu a ko va, “Mipuiho hi tûnah ni thum ka hnênah an awm tawh a, ei tûr eng mah an neih loh avângin ka khawngaih êm êm a ni; chaw ngheiin ka kaltîr duh lo ve; chuti lo chuan, kawnglakah an chau dah ang e,” a ti a.

³³Tin, zirtîrte chuan a hnênah, “Mipui heti zozai puarna khawp chhangpêr chuti zozai thlalêrah khawi ata nge kan hmuh ang?” an ti a.

³⁴Tin, Isuan an hnênah, “Chhangpêr eng zât nge in neih?” a ti a. Tin, anni chuan “Pêr sarih, nghatê tlêm tê nên,” an ti a.

³⁵Tin, ani chuan leia ṭhu tûrin mipui chu thu a pe a.

³⁶Tin, chhangpêr pasarih leh sanghate chu a la a, lâwm thu a sawi a, a phel a, zirtîrte hnênah a pe a; tin, zirtîrte chuan mipuite hnênah an pe a.

³⁷Tin, an vaiin an ei a, an puar ta hlawm a; an ei bângnawi pawh chu bâwm sarih an rût khat a.

³⁸A eitute chu, hmeichhia leh naupang tiam lovin, patling hlîr pawh sângli an ni a.

³⁹Tin, mipuite chu a ṭintîr hnuin lawngah a chuang a, Magadan ram a lo thleng a.