Read Mizo_Old_version CHANCHIN ṬHA MATTHAIA ZIAK 16 Bible Online

CHANCHIN ṬHA MATTHAIA ZIAK 16 - Mizo_Old_version bible

CHANCHIN ṬHA MATTHAIA ZIAK 16

¹Tin, Pharisaite leh Saddukaite an lo kal a, amah fiah nân vân ata chhinchhiahna anmahni entîr tûrin an dîl a.

²Nimahsela, ani chuan an hnênah, “Tlai lam a lo nihin, ‘Khua a ṭha dâwn a ni ang, kâwl a sen êm mai,’ in ti ṭhîn a.

³Tin, zîngah chuan, ‘Vawiin chu khua a chhe dâwn a ni ang, kâwl a sen a, khua a dûr êm mai,’ in ti ṭhîn a. Vân awmzia in hre fiah thiam si a; nimahsela, hun chhinchhiahnate hi in hre fiah thei lo.

⁴Chhuan sual tak leh uire hmang takte chuan chhinchhiahna an zawng a; nimahsela, Jona chhinchhiahna chauh lo chu an hnênah chhinchhiahna rêng rêng pêk a ni lo vang,” a ti a, a chhâng a. Tin, anni a kalsan a, a kal ta daih a.

⁵Tin, zirtîrte chu râl lehlam an thlen chuan chhang an lo ken theihnghilh a.

⁶Tin, Isuan an hnênah, “Pharisaite leh Saddukaite dawidim lakah chuan invêng ula, fîmkhur rawh u,” a ti a.

⁷Tin, anni chu, “Chhang kan keng hauh lo,” tiin an inngaihtuah a.

⁸Tin, Isuan chu chu a hria a, “Rin tlêmte u, engati nge chhang in neih loh avânga in inngaihtuah ni?

⁹Tûnah pawh in rilruin in la hre lo fo maw? Mi sângnga chhangpêr pangaa hrai leh, in bâwmrâng ruh khah zât kha in hre reng lâwm ni?

¹⁰Mi sângli chhangpêr pasariha hraia in bâwm ruh khah zât pawh kha?

¹¹Chhang thu in hnênah ka sawi lo tih engtizia nge in hriat loh? Pharisaite leh Saddukaite dawidim lakah erawh chuan fîmkhur rawh u,” a ti a.

¹²Chu veleh chhang dawidim lakah fîmkhur tûrin a tîr lo va, Pharisaite leh Saddukaite zirtîrna laka fîmkhur tûrin anmahni a tîr zâwk tih an lo hre ta a.

¹³Tin, Isua chu Kaisara Philippi bial a lo thlen chuan, a zirtîrte hnênah, “Miten Mihring Fapa hi tu nge a ni an tih?” tiin a zâwt a.

¹⁴Tin, anni chuan, “Ṭhenkhatin, ‘Baptistu Johana a ni,’ an ti a; ṭhenkhatin, ‘Elija a ni,’ an ti; ṭhenkhatin ‘Jeremia emaw, zâwlnei tua emaw a ni,’ an ti,” an ti a.

¹⁵Ani chuan an hnênah, “A nih leh, nangnin tu nge a ni mi tih?” a ti a.

¹⁶Tin, Simon Peteran, “Krista, Pathian nung Fapa chu i ni,” a ti a, a chhâng a.

¹⁷Tin, Isuan a hnênah, “Simon Bar-jona, i eng a thâwl e; tisa leh thisenin a hriattîr che a ni si lo va, ka Pa vâna miin a hriattîr zâwk che a ni.

¹⁸Tin, nang Petera i ni tih ka hrilh bawk a che; he lungpui chungah hian ka kohhranho ka rem chho vang a, Mitthi Khaw kulh kawngkhârte chuan chu chu an ngam lo vang.

¹⁹Vânram chabite ka pe ang chia, lei chungah eng pawh i phuar apiang vânah phuar a ni ang a; lei chungah eng pawh i phelh apiang vânah phelh a ni ang,” a ti a, a chhâng a.

²⁰Chumi zawhah Krista a ni tih tu mah hrilh lo tûrin zirtîrte chu a ti tlat a.

²¹Chumi achinah chuan Isuan Jerusalem khuaa a kal tûrzia te, upate, puithiam lalte, lehkhaziaktute laka thil tam tak a tuar tûrzia te, tihhluma a awm tûrzia te, ni thum nia kaihthawha a awm tûrzia te chu a zirtîrte a hriattîr ṭan ta a.

²²Tin, Petera chuan ani chu a hruai hrang a, “Lalpa, Pathianin khawngaih che rawh se; chûng chu i chungah a thleng tawp lo vang,” tiin a zilh ta a.

²³Ani erawh chu a hawi a, Petera hnênah chuan, “Setan, ka hnungah kal rawh; ka tân tlûkna i ni e; Pathian thilte ngaihtuah lovin, mihring thilte i ngaihtuah zâwk a nih hi,” a ti a.

²⁴Tin, Isuan a zirtîrte hnênah, “Tu pawhin mi zui a duh chuan, mahni hrehawm pawisa lovin, a kraws puin mi zui rawh se.

²⁵Tu pawh a nun humhim duh apiangin a chân ang a; tu pawh keimah avânga a nun chân apiangin a humhim ang.

²⁶Miin khawvêl hi a pumin nei sela, a nun chân si sela, a tân eng nge sâwt ang? A nih loh leh, miin a nun aiah eng nge a pêk ang?

²⁷Mihring Fapa hi a vântirhkohte nên, a Pa ropuinaa inthuamin a lo kal dâwn si a; chumi hunah chuan mi tin an thiltih ang zêlin a rûl ṭheuh vang.

²⁸Tihtakmeuhvin ka ti a che u, heta dingho a ṭhente hi, Mihring Fapa a rama lo kal an hmuh hma loh chuan, thihna tem tawp lo tûr an awm,” a ti a.