Read Mizo_Old_version CHANCHIN ṬHA MATTHAIA ZIAK 18 Bible Online

CHANCHIN ṬHA MATTHAIA ZIAK 18 - Mizo_Old_version bible

CHANCHIN ṬHA MATTHAIA ZIAK 18

¹Chumi lai tak chuan zirtîrte chu Isua hnênah an lo kal a, “Vânramah tu nge ropui ber ang le?” an ti a.

²Tin, ani chuan naupang tê a ko va, an zîngah a dintîr a,

³“Tihtakmeuhvin ka ti a che u, in inlamlêta, naupang tê ang in lo nih loh chuan vânramah in lût tawp lo vang.

⁴Chutichuan, tu pawh he naupang tê anga inngaitlâwm apiang, chu mi chu vânramah chuan a ropui ber ang.

⁵Tin, tu pawh ka hming avânga hetiang naupang tê pakhat lâwm apiang chu, keimah mi lâwm an ni ang.

⁶Amaherawhchu, tu pawh hêng mi ringtu mi tête zînga pakhat pawh titlu apiang chu, an nghâwngah buh râwt sawmna lung lian pui awrhtîrin, tuifinriat thûk laiah thlâk daih sela an tân a sâwt zâwk ang.

⁷“Tlûknate avângin khawvêl chung a pik e! Tlûknate chu lo awm tûr rêng zawng a ni a; nimahsela, tlûkna awmtîrtu chung chu a pik e!

⁸Tin, i kutin emaw, i kein emaw a tihtlûk che chuan, tan la, paih daih rawh; kut pahnih emaw, ke pahnih emaw neia kumkhaw meia paih ai chuan, piangsualin emaw, kebaiin emaw nunnaa luh i tân a ṭha zâwk e.

⁹Tin, i mitin a tihtlûk che chuan, kher chhuak la, paih daih rawh; mit khing hnih neia Gehenna meia paih ai chuan, mit khing khat neia nunnaa luh i tân a ṭha zâwk e.

¹⁰“Hêng mi tête zînga pakhat pawh hi hmusit lo tûrin fîmkhur rawh u; an vântirhkohten vânah ka Pa vâna mi hmêl chu an hmu fo ṭhîn tih ka hrilh che u hi. [1]

¹²“Engtin nge in ngaih? Mi tu pawhin berâm za nei sela, an zînga pakhat vâk bo sela, sawmkua leh pakuate chu hnutchhiaha tlânga han kalin, a bo chu a zawng lo vang em ni?

¹³Tihtakmeuhvin ka hrilh a che u, a hmuh leh hlauh chuan, sawmkua leh pakua vâk bo lote chungah ai chuan a chungah a lâwm zâwk ang.

¹⁴Chutiang bawkin hêng mi tête zînga pakhat boral pawh hi, in Pa vâna mi duh zâwng a ni lo ve.

¹⁵“Tin, i unauvin i chungah thil tisual sela, kal la, amah leh nangmah chauhva hriatah a sualnaah chuan zilh ang che; a ngaihthlâk che chuan i unau chu i hneh a ni tawh ang.

¹⁶A ngaihthlâk loh che erawh chuan, mi dang pakhat emaw, pahnih emaw i hnênah hruai ang che; chutichuan, thu tinrêng chu hretu pahnih emaw, pathum emaw kâa tihngheha a awm theih nân.

¹⁷Tin, anni pawh chu a ngaihthlâk duh loh chuan, kohhranho hnênah thlen ang che; tin, kohhranho pawh a ngaihthlâk duh loh chuan, ani chu i tân Jentail leh chhiahkhawntu ang ni rawh se.

¹⁸Tihtakmeuhvin ka hrilh a che u, lei chungah eng pawh in phuar apiang vânah phuar a ni ang a; lei chungah eng pawh in phelh apiang vânah phelh a ni ang.

¹⁹Tihtakmeuhvin ka hrilh leh a che u, lei chungah hian in zînga mi pahnih, an thil dîl kawnga an thurual chuan, ka Pa vâna mi tihsakin an awm ang.

²⁰Mi pahnih emaw, pathum emaw ka hminga an inkhâwmna apiangah chuan, an zîngah ka awm si ṭhîn a,” a ti a.

²¹Chumi lai chuan Petera a lo kal a, a hnênah, “Lalpa, ka unauvin ka chungah thil tisual sela, vawi eng zât nge ka ngaihdam ang? Vawi sarih thlengin em ni ang?” a ti a.

²²Isuan a hnênah, “ ‘Vawi sarih thlengin,’ ka ti lo a che, ‘Vawi sarih hmun sawmsarih thlengin,’ ka ti zâwk che a ni.

²³“Chumi avâng chuan, vânram chu, lalber tu emaw a bawihte hnêna sum chanchin tihfel tum nên chuan tehkhin a ni.

²⁴Tin, a han tihfel ṭan chuan mi pakhat talent sîngkhat ba a hnênah an rawn hruai a.

²⁵Tin, pêk tûr a neih loh avângin a pu chuan amah nên, a nupui nên, a fate nên, a neih zawng zawng nên hralha rulh tûr thu a pe a.

²⁶Chutichuan, bawih chuan, ‘Ka pu, ka chungah zahngai rih la, a zain ka pe vek ang che,’ tiin bawkkhupin chibai a bûk a.

²⁷Tichuan, chu bawiha pu chuan a khawngaih ta êm êm a, a thlah a, a bat chu a ngaidam ta a.

²⁸Nimahsela, chu bawih chu a kal chhuak a, a bawihpuite zînga pakhat, a duli za ba a va hmu a; tin, a man a, ‘I bat kha mi pe rawh,’ tiin a hrawkah a rêk a.

²⁹Chutichuan, a bawihpui chu a bawkkhup a, ‘Ka chungah zahngai rih la, ka la pe ang che,’ tiin a ngên chiam a.

³⁰Nimahsela, a duh lo va; a bat chu a tlâk hma loh zawng tân inah a va khung ta a.

³¹Chutichuan, a bawihpuite chuan a thiltih chu an hmuhin an lungngai êm êm a, a thiltih zawng zawng chu an pu an va hrilh ta a.

³²Chu veleh a pu chuan ani chu a ko va, a hnênah, ‘Bawih sual, mi dîl chiam avâng khân i bat zawng zawng kha ka ngaidam che a ni a;

³³ka khawngaih che ang khân nang pawhin i bawihpui chu i khawngaih ve tûr a ni lâwm ni?’ a ti a.

³⁴Tin, a pu chu a thinur ta a, a bat zawng zawng a tlâk hma loh zawng nghaisatute hnênah a pe ta a.

³⁵Mi tinin thinlung taka in unaute in ngaihdam loh chuan, ka Pa vâna mi pawhin chutiang bawkin in chungah a ti ve ang,” a ti a.