Read Mizo_Old_version CHANCHIN ṬHA MATTHAIA ZIAK 19 Bible Online

CHANCHIN ṬHA MATTHAIA ZIAK 19 - Mizo_Old_version bible

CHANCHIN ṬHA MATTHAIA ZIAK 19

¹Tin, heti hi a ni a, Isua chu chûng thu a sawi zawh veleh chuan, Galili ram ata a chhuak a, Jordan lui râla Judai ramah chuan a va kal a;

²tin, mipui tam takin an zui a; chutah chuan anmahni chu a tidam ta a.

³Tin, Pharisaite a hnênah an lo kal a, amah fiah nân, “Eng vâng pawhin miin a nupui mâk a thiang em?” an ti a.

⁴Tin, ani chuan, “A tîr ata an siamtu khân hmeichhia leh mipaa a siam leh,

⁵‘Hemi avâng hian mipain a nu leh a pa a kalsan ang a, a nupui a vuan ang; tichuan, an pahnih chuan tisa pumkhat an lo ni tawh ang,’ a ti tih in chhiar lo vem ni?

⁶Chutichuan, pahnih an ni tawh lo va, tisa pumkhat an ni tawh zâwk a ni. Chuvângin, Pathianin a zawm tawh chu mihringin ṭhen suh se,” a ti a, a chhâng a.

⁷Anni chuan a hnênah, “A nih leh, engati nge Mosian inmâkna lehkha pêka mâk tûr thu a pêk si?” an ti a.

⁸Ani chuan an hnênah, “Mosian in thinlung khauh avângin asin in nupuite mâk a phal ni; nimahsela, a tîr ata chutiang a ni si lo.

⁹Kei chuan ka ti a che u, ‘Tu pawh tlangvâl ngaih vâng ni lova nupui maa mi dang nei apiang chu a uire a ni; mâk hnu nei apiang pawh a uire a ni,’ ” a ti a.

¹⁰Zirtîrte chuan a hnênah, “Nupui kawngah mipa thu chutiang a nih si chuan, inneih hi a ṭha lo ve,” an ti a.

¹¹Ani erawh chuan an hnênah, “Chu thu chu mi nazawngin an pawm thei lo ve, a pêkate chauh lo chuan.

¹²Mi tilreh, an nu pum chhûng ata chutianga piang rêngte an awm a; mi tilreh, mihring kuta rehte an awm bawk a; mi tilreh, vânram avânga tilreha insiam chawpte an awm bawk a. Tu pawh a pawm thei apiangin pawm rawh se,” a ti a.

¹³Chumi lai chuan an chunga a kut a nghaha a ṭawngṭaisak tûrin, a hnênah naupang tête an rawn hruai a; tin, zirtîrte chuan an lo hau va.

¹⁴Isua erawh chuan, “Naupang tête ka hnênah han kaltîr ula, hnar suh u; vânram chu hetiang mite ta a ni si a,” a ti a.

¹⁵Tin, an chungah a kut a nghat a, chuta ta chu a kal ta a.

¹⁶Tin, mi pakhat a hnênah a lo kal a, “Zirtîrtu, chatuana nunna ka neih theih nân thil ṭha eng nge ka tih ang?” a ti a.

¹⁷Tin, ani chuan a hnênah, “Thil ṭha thu engah nge mi zawh? ṭha chu pakhat chauh a awm; eng pawh ni sela, nunnaa luh i duh chuan thupêkte chu zâwm rawh,” a ti a.

¹⁸Tin, ani chuan a hnênah, “A eng ber hi maw?” a ti a. Tin, Isuan, “ ‘Tual i that tûr a ni lo’, ‘I uire tûr a ni lo’, ‘I ru tûr a ni lo’, ‘Dâwtin i hêk tûr a ni lo’,

¹⁹‘I nu leh i pa chawimawi rawh,’ tihte leh, ‘Nangmah i inhmangaih angin i vêngte i hmangaih tûr a ni,’ tih hi,” a ti a.

²⁰Tlangvâl chuan a hnênah, “Chûng thu zawng zawng chu ka zâwm ṭhîn; eng nge ka la bâk?” a ti a.

²¹Isuan a hnênah, “Ṭha famkima awm i duh chuan, kal la, i neih chu hralh la, pachhiate hnênah pe rawh; chutichuan, vânah ro i nei ang; tin, lo kal la, mi zui ang che,” a ti a.

²²Tlangvâl erawh chuan chu thu chu a hriatin, lungngai takin a kal bo ta a; sum tam tak nei mi a nih avângin.

²³Tin, Isuan a zirtîrte hnênah chuan, “Tihtakmeuhvin ka hrilh a che u, mi hausa tân vânrama luh chu harsa tak a ni.

²⁴Tin, ka hrilh leh a che u, mi hausa Pathian rama luh aiin, sanghâwngsei hriau benga luh tlang a awl zâwk,” a ti a.

²⁵Tin, zirtîrten chu chu an hriat chuan mak an ti nasa êm êm a, “Tu nge chhandam ni thei ang le?” an ti a.

²⁶Tin, Isuan anni chu a en a, an hnênah, “Chu chu mihring tân tih rual a ni lo va; Pathian nên erawh chuan engkim tih theih a ni,” a ti a.

²⁷Tin, Peteran a hnênah, “Ngai teh, keinin engkim kalsanin kan zui ta chia; eng nge kan hmuh ang le?” a ti a, a zâwt a.

²⁸Tin, Isuan a hnênah, “Tihtakmeuhvin ka hrilh a che u, Siamtharnaah chuan, Mihring Fapa a ropuina ṭhutphaha a ṭhut hunah, nangni mi zuituteho hi, Israel hnam sâwm leh hnam hnihte chu ngaihtuahin, lalṭhutphah sâwm leh pahnihah in la ṭhu ve ang.

²⁹Tin, mi tin, inte emaw, unaute emaw, farnute emaw, pa emaw, nu emaw, fate emaw, ramte emaw ka hming avânga kalsan apiang chuan a leh za an hmu ang a, chatuana nunna an la chang bawk ang.

³⁰Nimahsela, mi tam tak, hmasa bera awmte chu hnuhnûng berah an la awm ang a; hnuhnûng berte pawh hmasa berah an la awm ang.