Read Mizo_Old_version CHANCHIN ṬHA MATTHAIA ZIAK 21 Bible Online

CHANCHIN ṬHA MATTHAIA ZIAK 21 - Mizo_Old_version bible

CHANCHIN ṬHA MATTHAIA ZIAK 21

¹Tin, Jerusalem khua an thlen dâwnin, Bethphage khua, Olive tlâng chu an thlen chuan, Isuan zirtîrte pahnih a tîr a,

²an hnênah, “In hma zâwn khuaah sâwn va kal ta ula, sabengtung thlun, a kianga a no nên, in hmu mai ang; phelh ula, ka hnênah han kai rawh u.

³Tin, tu pawhin in hnênah eng pawh an sawi chuan, ‘Lalpan a duh a ni,’ in ti ang a; tin, ani chuan a rawn tîr nghâl mai ang,” a ti a.

⁴“ ‘En teh, i Lal chu, thuhnuairawlh takin, Sabengtung chungah - sabengtungno chung ngeia chuangin I hnênah a lo kal dâwn e,’ tiin Zion fanu chu hrilh rawh,” tia zâwlnei kâa a sawi kha a lo thlen theihna tûrin, chûng chu a lo awm ta a ni.

⁶Tichuan, zirtîrte chu an va kal a, Isuan an hnêna thu a pêk ang ngei chuan an va ti a,

⁷sabengtung leh a no chu an rawn kai a, a chungah chuan an puante an phah a, ani chuan a chuan chhan ta a.

⁸Tin, mipui zînga a tam zâwkin kalkawngah chuan an puante an phah a; mi dangin thinga mi chhâwl an sât a, kalkawngah an phah bawk a.

⁹Tin, mipui a hma lama kalte leh a zuite chuan, “Davida fapa hnênah Hosanna! Lalpa hminga lo kal chu fakin awm rawh se, Chungnung berah khian Hosanna!” tiin an au va.

¹⁰Tin, Jerusalem khuaa a lo luh chuan, a khuain, “He mi hi tu nge ni?” tiin, an phu ta mur mur a.

¹¹Tin, mipuiho chuan, “He mi hi zâwlnei Isua, Galili rama Nazareth khuaa mi chu a ni,” an ti a.

¹²Tin, Isua chu Pathian biak inah chuan a va lût a, biak ina englo zuartute leh leitute zawng zawng chu a hnawt chhuak a, tangka thlengtuho dawhkânte leh, ṭhuro zuarho ṭhutphahte pawh chu a nam thlûksak a;

¹³an hnênah, “ ‘Ka in chu ṭawngtaina in an ti ang,’ tih ziak a ni; nangni erawh chuan suam hmangte pûkah in siam zâwk ṭhin a ni,” a ti a.

¹⁴Tin, Pathian biak inah chuan mitdelte leh kebaite a hnênah an lo kal a; anmahni chu a tidam a.

¹⁵Nimahsela, puithiam lalte leh lehkhaziaktuten a thil mak tihte leh biak ina, “Davida fapa Hosanna!” tia naupang aute chu an hmuhin an lungni lo êm êm a,

¹⁶a hnênah, “Hêngho thusawi hi i hria em?” an ti a. Tin, Isuan an hnênah, “Hria e; ‘Nausênte leh hnute hne laite kâa chhuak chuan Fakna i tiṭha famkim ta,’ tih hi in chhiar ngai lo vem ni?” a ti a.

¹⁷Tin, anni chu a kalsan a, khawpui ata chu a chhuak a, Bethani-ah a kal a; chutah chuan a riak ta a.

¹⁸Tin, zîngah khawpui lama a kîr leh laiin a ril a lo ṭâm ta a.

¹⁹Tin, kawng sîrah chuan theipui kûng a hmu a, a va pan a, a hnah chauh lo chu eng mah a hmu lo va. Tin, a hnênah, “Kumkhuain lo rah tawh suh ang che,” a ti a. Tin, theipui chu a vuai ta nghâl mai a.

²⁰Tin, zirtîrte chuan chu chu an hmuhin, “Engtizia nge theipui hi a vuai tâk nghâl mai?” tiin, mak an ti hle a.

²¹Tin, Isuan an hnênah, “Tihtakmeuhvin ka hrilh a che u, rinna in neiha, in rinhlelh loh chuan, theipui chunga tih ang chang hi in ti lo vang a, he tlâng hnênah pawh hian, ‘Lo insawn la, tuifinriatah lo inpaih rawh,’ in tih chuan, in tih ang chuan a lo awm ang.

²²Tin, engkim, ring chunga ṭawngṭaia in dîl apiang chu in hmu ang,” a ti a, a chhâng a.

²³Tin, Pathian biak ina a luh hnua a zirtîr lai chuan, puithiam lalte leh vântlâng upate chu a hnênah an lo kal a, a hnênah, “Tu thuin nge hêng thil hi i tih? Tuin nge thu pe che?” an ti a.

²⁴Tin, Isuan an hnênah, “Kei pawhin thu kam khat ka zâwt ve ang che u, chu chu min hrilh chuan, tu thuin nge hêng thil hi ka tih ka hrilh ve ang che u.

²⁵Johana baptisma kha khawia mi thu nge ni? Vâna mi thu nge mihring thu?” a ti a, a chhâng a. Tin, an inngaihtuah a, “ ‘Vâna mi thu,’ kan tih chuan, ‘Engah nge a thu in awih loh le?’ min ti si ang a.

²⁶Tin, ‘Mihring thu,’ kan tih chuan, mipui chu kan hlau si; mi zawng zawngin Johana chu zâwlneiah an ruat si a,” an ti a.

²⁷Tichuan, Isua an chhâng a, “Kan hre lo,” an ti a. Ani pawh chuan an hnênah, “Kei pawhin tu thuin nge hêng thil hi ka tih ka hrilh bîk lo vang che u.

²⁸“Nimahsela, nangnin engtin nge in ngaih? Mi tu emawin fapa pahnih a nei a. Pakhat hnênah chuan a va kal a, ‘Ka fa, vawiinah grêp huanah va thawk rawh,’ a ti a.

²⁹Ani chuan, ‘Ka duh lo,’ a ti a, a chhâng a; nimahsela, nakinah a rilru chu a lo inlamlêt a, a kal ta a.

³⁰Tin, pakhat hnênah pawh chuan a va kal a, chutiang bawk chuan a va ti a. Tin, ani chuan, ‘Lalpa, ka kal ang e,’ a ti a, a chhâng a; nimahsela, a kal ta si lo va.

³¹Chu mite pahnihah chuan a tu zâwk chuan nge an pa duh zâwng ti le?” a ti a. Anni chuan, “A hmasa zâwk chuan,” an ti a. Isuan an hnênah, “Tihtakmeuhvin ka hrilh a che u, chhiahkhawntute leh nawhchizuarte chuan Pathian ramah an luh khalh dâwn che u a nih hi.

³²Johana chu felna kawngah chuan in hnênah a lo kal a, amah chu in ring si lo va; chhiahkhawntute leh nawhchizuarte erawh chuan amah chu an ring a; nangnin chu chu in hmuh hnu pawhin, amah chu in rin theihna tûrin in inlamlêt chuang si lo va.

³³“Tehkhin thu dang ngaithla rawh u: Mi tu emaw, in neitu a awm a, chu mi chuan grêp huan a siam a, palin a hung vêl a, grêp sâwrna khur a lai a, in sâng a sa a; tin, lo enkawltute hnênah thlawhhlawh tûrin a pe a, ram dangah a kal ta a.

³⁴Tin, a rah lawh a hun dâwn chuan, a rah la tûrin lo enkawltute hnênah a bawihte a tîr a.

³⁵Tin, lo enkawltute chuan a bawihte chu an lo man a, pakhat an vua a, pakhat an tihlum a, pakhat lungin an dêng a.

³⁶Tin, bawih dang, a hmasa pâwl aia tam zâwk a tîr leh a; anniho chungah pawh an hmaa mite an tih ang bawkin an lo ti leh a.

³⁷Chumi hnuah erawh chuan, ‘Ka fapa hi chu an zah ang,’ tiin, a fapa chu an hnênah a tîr a.

³⁸Nimahsela, lo enkawltute chuan a fapa chu an lo hmuh veleh, ‘He mi hi ro luahtu tûr chu a ni; i that ang u khai! A ro luah tûr hi i neihsak ang u,’ an ti a.

³⁹Tichuan, ani chu an man a, grêp huan ata chu an theh chhuak a, an tihlum ta a.

⁴⁰Chutichuan, grêp huan neitupa chu a lo kal hunin, chûng lo enkawltute chungah chuan engtin nge a rawn tih ang le?” a ti a.

⁴¹Anni chuan a hnênah, “Chûng mi sualte chu hrehawm takin a tiboral ang a, grêp huan chu lo enkawltu dang, a lawh hun apianga a rahte chu a hnêna pe zêltu tûrte hnênah, thlawhhlawh tûrin a pe ang,” an ti a.

⁴²Isuan an hnênah, “Pathian lehkhaa, ‘In satute lung duh loh kha, Chu ngei chu a kila lung ṭangkai ber a lo ni ta. Chu chu Lalpa tih a ni a, Kan mit hmuhah a mak a ni,’ tih hi in chhiar ngai lo vem ni?

⁴³Chumi avâng chuan, ‘Pathian ram chu in hnên ata lâksak a ni ang a, a rah chhuah tûr hnam hnênah pêk a ni ang,’ tih ka hrilh a che u.

⁴⁴Tin, chumi lung chunga tlu chu a keh sawm ang a; a delh phei chu a râwt dip ang,” a ti a.

⁴⁵Tin, puithiam lalte leh Pharisaite chuan a tehkhin thute chu an hriatin, anmahni chungthu a sawi tih an hre ta a.

⁴⁶Tin, amah chu man an tum a; nimahsela, mipuite chu an hlau si a, zâwlneia an ruat avângin.