Read Mizo_Old_version CHANCHIN ṬHA MATTHAIA ZIAK 22 Bible Online

CHANCHIN ṬHA MATTHAIA ZIAK 22 - Mizo_Old_version bible

CHANCHIN ṬHA MATTHAIA ZIAK 22

¹Tin, Isuan anmahni a bia a, an hnênah tehkhin thuin a sawi leh a,

²“Vânram chu lal tu emaw, a fapa tâna lawi chaw siam nên chuan tehkhin a ni.

³Tin, lawi chaw eia a sâwmte chu ko tûrin a bawihte a tîr a; nimahsela, an lo kal duh lo va.

⁴Tin, ani chuan, ‘Ka sâwmte hnênah, “Ngai teh u, ka ruai chu ka peih ta; ka sebâwngpate leh ka ran châwm thaute ka talh a, engkim peih a ni ta e; lawi chaw ei tûrin lo kal tawh rawh u,” ti rawh u,’ tiin bawih dangte a tîr leh a.

⁵Nimahsela, an lo ngaihsak lo va, an kal ta mai a, pakhat chu a lovah a kal a, pakhat chu a sumdâwnnaah;

⁶mi dangte chuan a bawihte chu an man a, zahthlâk takin an siam a, an tihlum ta mai a.

⁷Chutichuan, lal chu a thinur ta a; a sipaihote a tîr a, chûng tualthattute chu a tiboral a, an khua pawh a hâlsak ta a.

⁸“Tin, a bawihte hnênah chuan, ‘Lawi chaw peih a ni ta, ka sâwmte erawh kha chu ei tlâk an ni lo.

⁹Chutichuan, kawng pêng ṭhuamahte kal ula, mi in hmuh apiang lawi chaw ei tûrin sâwm rawh u,’ a ti a.

¹⁰Tichuan, chûng bawihte chu an chhuak a, kawngahte chuan an va kal a, an hmuh apiang, mi sual leh mi ṭhate pawh an hruai khâwm ta vek a; tichuan, lawi chaw pindan chu mi sâwmtein an lo khat ta a.

¹¹“Nimahsela, lal chu mi sâwmte en tûra a lo luh chuan, inneihna puan sin lo mi pakhat chutah chuan a hmu a;

¹²tichuan, a hnênah, ‘ṭhiana, engtizia nge ni inneihna puan sin lovin hetah i lo luh le?’ a ti a. Tin, ani chu a ngawi reng a.

¹³Tin, lal chuan a bawihte hnênah, ‘A kut leh a ke phuar ula, pâwn lam thimah paih chhuak rawh u; chutah chuan ṭah leh ha ṭhial a awm ang,’ a ti a.

¹⁴“Sâwmte chu tam tak an ni a, thlante erawh chu tlêm tê an ni,” a ti a.

¹⁵Chumi lai chuan Pharisaite chuan a thusawia an man theihna zia tûr an va inrâwn a.

¹⁶Tin, an zirtîrte, Heroda pâwla mite nên, a hnênah an tîr a, chu mite chuan, “Zirtîrtu, mi dik tak i ni a, tihtakzetin Pathian kawng thu i zirtîr ṭhîn a, pawisak chuan tu mah i nei lo tih kan hria e; tu mah thlei bîk i nei si lo va.

¹⁷Chutichuan, engtin nge i ngaih min hrilh teh khai? Kaisara hnêna chhiah chawi hi a thiang nge thiang lo?” an ti a.

¹⁸Nimahsela, Isuan an sualzia chu a lo hria a, “Vervêkte u, engah nge min fiah?

¹⁹Chhiah tangka chu min entîr rawh u,” a ti a. Tin, a hnênah duli an rawn la a.

²⁰Tin, ani chuan an hnênah, “Hei hi tu lem leh tu hming nge ni?” a ti a.

²¹Anni chuan a hnênah, “Kaisara,” an ti a. Tin, ani chuan an hnênah, “A nih ahnu, Kaisara thilte chu Kaisara hnênah pe ula, Pathian thilte chu Pathian hnênah pe ta che u,” a ti a.

²²Chûng thu chu an hriatin mak an ti hle a, amah chu an kalsan a, an kal ta daih a.

²³Chumi ni vêk chuan Saddukaiho, thawhlehna a awm lo tite chu a hnênah an lo kal a; a hnênah,

²⁴“Zirtîrtu, Mosian, ‘Mi, fa nei lovin thi sela, a unaupain a nupui chu neiin a unaupa tân chi a thlahsak tûr a ni,’ a ti a.

²⁵Aw le, kan zîngah sal sarih an awm a; a upa berin nupui a nei a, a thi a; tin, chi a thlah loh avângin a nupui chu a unaupa rochun tûrin a hnutchhiah a;

²⁶chutiang bawkin a pahnihna chuan a ti a, a pathumna chuan a ti bawk a, a pasarihna thlengin an ti ṭheuh va.

²⁷Tin, an zaa an thih hnuah chuan hmeichhia pawh chu a thi ta a.

²⁸Chutichuan, thawhleh hunah chuan an pasarih zîngah chuan tu nupui ber nge ni ang? An zain an nei ṭheuh si a?” tiin an zâwt a.

²⁹Isuan an hnênah, “Pathian Lehkha Thu leh Pathian thiltihtheihna in hriat loh avângin in ngai sual ṭhîn a ni.

³⁰Thawhlehnaah chuan nupui pasal an innei dâwn tawh lo va, vâna vântirhkohte ang an ni dâwn zâwk asin.

³¹Tin, mitthi thawhlehna thu chu, Pathianin, ‘Kei Abrahama Pathian, Isaaka Pathian, Jakoba Pathian ka ni,’ tia in hnêna a sawi kha in chhiar lo vem ni? Pathian chu mitthi Pathian a ni lo va, mi nung Pathian a ni zâwk,” a ti a, a chhâng a.

³³Tin, mipuite chuan chu chu an hriatin a thu zirtîr chu mak an ti hle a.

³⁴Pharisaite erawh chu, Isuan Saddukaite a hnial dang tih an hriatin an inkhâwm ta a.

³⁵Tin, an zînga mi pakhat, dân hretuin, “Zirtîrtu, dân thu-ah eng thupêk hi nge ropui ber?” tiin amah fiah nân thu a zâwt a.

³⁷Tin, ani chuan a hnênah, “ ‘Lalpa i Pathian chu i thinlung zawng zawngin, i thlarau zawng zawngin, i rilru zawng zawngin i hmangaih tûr a ni,’ tih hi.

³⁸Chu chu thupêk ropui leh pawimawh ber a ni.

³⁹Tin, a dawttu, a anpui chu hei hi a ni, ‘Nangmah i inhmangaih angin i vêngte pawh i hmangaih tûr a ni,’ tih hi.

⁴⁰Chûng thupêk pahnihah chuan dân thu leh zâwlneite thu zawng zawng a inkhai khâwm vek a ni,” a ti a.

⁴¹Tin, Pharisaite chu an inkhâwm lai chuan, Isuan anmahni chu thu a zâwt a,

⁴²“Krista chu engtin nge in ngaih? Tu fapa nge ni?” a ti a. Anni chuan a hnênah, “Davida fapa,” an ti a.

⁴³Ani chuan an hnênah, “Davidan, ‘Lalpa chuan, ka Lalpa hnênah, I hmêlmate i kephah hnuaia ka dah hma loh zawng Ka ding lamah ṭhu rawh, a ti,’ tiin, engtiziain nge Thlarauvin ani chu ‘Lalpa’ a tih le?

⁴⁵Davidan ani chu ‘Lalpa’ a tih si chuan, engtin nge a fapa a nih theih?” a ti a.

⁴⁶Tin, tu mân kam khat mahin an chhâng thei lo va, chumi ni achin chu tu mân thu dang rêng rêng an zâwt ngam tawh hek lo.