Read Mizo_Old_version CHANCHIN ṬHA MATTHAIA ZIAK 23 Bible Online

CHANCHIN ṬHA MATTHAIA ZIAK 23 - Mizo_Old_version bible

CHANCHIN ṬHA MATTHAIA ZIAK 23

¹Tin, Isuan mipuite leh a zirtîrte hnênah thu a sawi a,

²“Lehkhaziaktute leh Pharisaite chu Mosia ṭhutphahah chuan an ṭhu ṭhîn a;

³chuvângin, an hrilh apiang che u chu ti ula, zâwm zêl ang che u; an thiltih ang erawh chu ti ve suh ang che u, sawi zawng an sawi ṭhîn a, an ti si ṭhîn lo a ni.

⁴Phur rit hrehawm takte an siam a, mite an bel ṭhîn a, anmahni erawh chuan an kutzungṭang pawhin an tisawn duh lo.

⁵An thiltih zawng zawng chu mihring hmuh atân a ni an tih zâwk ṭhin ni, an thil bun leh khimte chu an tihlai a, an puan hmâwrfêm an tibuk ṭhîn a,

⁶ruaiṭhehnaah hmun ṭha ber te, inkhâwmna inah ṭhutphah ṭha ber te,

⁷dâwr hmuna chibai bûk te, miten ‘Rabbi’ an tih te an ngaina si ṭhîn a.

⁸“Nangni erawh chu ‘Rabbi’ tihin awm suh u; in zirtîrtu chu pakhat chauh a ni a, nangni zawng zawng chu unau in ni si a.

⁹Tin, lei chungah hian tu mah ‘Ka pa’ ti suh u; in Pa chu pakhat chauh a ni, vâna mi khi.

¹⁰‘Hruaitute’ tihin awm hek suh u, in hruaitu chu pakhat chauh a ni, Krista chu.

¹¹In zînga ropui ber chu in rawngbâwltuah a awm zâwk tûr a ni.

¹²Tu pawh inngaihlu apiang an tlâwm ang a, tu pawh inngaitlâwm apiang chawimawiin an awm ang.

¹³“Nimahsela, nangni lehkhaziaktu leh Pharisai vervêkte u, in chung a pik e! Vânram kawng chu mite in khârsak si ṭhîn; nangni lah in lût si lo va, mi lût tûrte pawh luh in phal ṭhîn hek lo. [1]

¹⁵Nangni lehkhaziaktu leh Pharisai vervêkte u, in chung a pik e! Saphun pakhat pawh siam tûrin tuifinriat leh khawmual in kal hual si a; tin, chutianga a lo awm veleh ani chu nangmahni leh hnihin Gehenna fapaah in siam ṭhîn.

¹⁶“Nangni, hruaitu mitdel, ‘Tu pawh Pathian biak in chhâla chhechham apiang, chu chu eng mah a ni lo; tu pawh Pathian biak ina rangkachak chhâla chhechham apiang erawh chuan hlen tûr a ni,’ tite u, in chung a pik e!

¹⁷Nangni mi â, mitdelte u! A eng nge ropui zâwk, rangkachak nge Pathian biak in, rangkachak tithianghlimtu chu?

¹⁸Tin, ‘Tu pawh maichâm chhâla chhechham apiang, eng mah a ni lo; a chunga thilpêk awm chhâla chhechham apiang erawh chuan hlen tûr a ni,’ in ti.

¹⁹Nangni mitdelte u! A eng nge ropui zâwk, thilpêk nge maichâm, thilpêk tithianghlimtu chu?

²⁰Chutichuan, tu pawh maichâm chhâla chhechham apiang chuan, maichâm leh a chunga awm zawng zawng chhâlin chhia a chham ṭhîn.

²¹Tu pawh Pathian biak in chhâla chhechham apiang chuan, Pathian biak in leh a chhûnga awm chu chhâlin chhia a chham ṭhîn.

²²Tu pawh vân chhâla chhechham apiang chuan, Pathian ṭhutphah leh a chunga ṭhu chhâlin chhia a chham ṭhîn a ni.

²³“Nangni lehkhaziaktu leh Pharisai vervêkte u, in chung a pik e! Pudina te, mohuri te, zira te chu sâwmah pakhat in pe ṭhîn a, dân thu pawimawh zâwk - felna te, khawngaihna te, rinawmna te chu - in ngaihthah si ṭhîn; nimahsela, chûng chu asin in tih tûr ni, a dangte chu tih ṭhulh chuang lovin.

²⁴Nangni hruaitu mitdel, thosi thli faia sanghâwngsei lem si ṭhînte u!

²⁵“Lehkhaziaktu leh Pharisai vervêkte u, in chung a pik e! No leh thlêng pâwn lam in sil fai a, a chhûng erawh chu hlêprûkna leh insûm lohnain a khat si a.

²⁶Nang Pharisai mitdel, no leh thlêng chhûng lam chu sil fai hmasa rawh, a pâwn lam pawh a lo fai theihna tûrin.

²⁷“Lehkhaziaktu leh Pharisai vervêkte u, in chung a pik e! Thlân hnawih vâr, pâwn lam mawi taka lang, a chhûng lam erawh chu mitthi ruhte leh bawlhhlawh tinrênga khat angte chu in ni asin.

²⁸Nangni pawh chutiang takin, pâwn lamah chuan mihring mit hmuhin fel takin in lang ṭhîn a, in chhûng lamah erawh chuan vervêkna leh sualnain in khat si a.

²⁹“Nangni lehkhaziaktu leh Pharisai vervêkte u, in chung a pik e! Zâwlneiho thlân inte in sa a, mi fel thlânte pawh in chei mawi a,

³⁰‘Kan pute dam lai khân lo awm ve mah ila, zâwlneite thisen an chhuahnaah chuan kan tel ve lo vang,’ in ti ṭhîn.

³¹Chutichuan, zâwlneiho thattute fa in ni tih in inhriattîr a ni.

³²In pute tehkhâwng chu tikhat nghâl mai rawh u.

³³Rûlte u, rûl thlahte u, Gehenna rorêlna chu engtin nge in pumpelh theih ang?

³⁴“Ngai teh u, chumi avâng chuan in hnênah zâwlneite, mi fingte, lehkhaziaktute ka rawn tîr dâwn; ṭhenkhat in tihlum ang a, krawsah in khêng bet ang, ṭhenkhat in inkhâwmna inahte savun hruiin in vua ang a, khaw tinah in tiduhdah zui zêl ang;

³⁵chutichuan, Abela, mi fel tak thisen aṭangin, Pathian biak in leh maichâm inkâra, Berekia fapa Zekaria in thaha thisen thleng khân, lei chunga mi fel thisen an chhuah zawng zawng chu nangmahni chungah a lo la thleng thei ang.

³⁶Tihtakmeuhvin ka hrilh a che u, chûng zawng zawng chu tûnlai chhuante chungah hian a lo la thleng ang.

³⁷“Aw Jerusalem, Jerusalem, zâwlneiho thattu! I hnêna an rawn tirhte lunga lo dêng hlumtu, arpuiin a notê a thla hnuaia a awp khâwm angin i fate vawi eng zât nge awp khâwm ka tum kha! Nimahsela, in duh si lo.

³⁸En teh u, in in chu a ruaka hnutchhiah che uin a awm ta.

³⁹Ka hrilh a che u, ‘Lalpa hminga lo kal chu fakin awm rawh se,’ in tih hma loh chuan, tûn achinah mi hmu leh dâwn tawh lo a nih hi,” a ti a.