Read Mizo_Old_version CHANCHIN ṬHA MATTHAIA ZIAK 27 Bible Online

CHANCHIN ṬHA MATTHAIA ZIAK 27 - Mizo_Old_version bible

CHANCHIN ṬHA MATTHAIA ZIAK 27

¹Tin, zîng a lo nih chuan, puithiam lalte leh vântlâng upate zawng zawng chu Isua tihlum tûrin a chungthuah an inrâwn a;

²tin, an phuar a, an hruai a, ram awptu Pilata hnênah an pe ta a.

³Tin, Juda, a mantîrtu khân Isua chu thiam loh an chantîr tih a hriat veleh a inchhîr a, tangka sawmthum kha puithiam lalte leh upate hnênah chuan a rawn la leh a,

⁴“Mi thiam thisen ka mantîr kha thil ka lo tisual a ni,” a ti a. Anni erawh chuan, “Chu chu kan tân eng nge pawi ang? Nangin i tih tihin ti rawh,” an tihsan a.

⁵Tin, ani chuan tangka chu hmun thianghlimah chuan a paih lût a, a kal bo va; a va inâwk hlum ta a.

⁶Tin, puithiam lalte chuan tangkate chu an la a, “Hei hi thawhlâwm bâwma dah a thiang lo ve, thisen man a ni si a,” an ti a.

⁷Tichuan, an inrâwn a, mikhualte phûmna tûrin Bêlvawtu Hmun chu an lei ta a.

⁸(Chu vâng chuan a ni, chumi hmun chu tûn thlenga “Thisen Hmun” an tih tâk ni.)

⁹Chumi lai chuan zâwlnei Jeremian, “Tin, tangka sawmthum, An chhiara man, Israel thlah, tuten emaw an chhiara man chu, An la a, Lalpan min tiam angin Bêlvawtu hmun man atân an pe a,” tia a sawi kha a lo thleng ta a ni.

¹⁰

¹¹Tin, Isua chu ram awptu hmaah chuan a ding a. Tin, ram awptu chuan, “Juda-te lal i ni em?” tiin a zâwt a. Tin, Isuan a hnênah, “Ni e,” a ti a.

¹²Tin, puithiam lalte leh upaten an hêk laiin eng mahin a chhâng lo va.

¹³Tichuan, Pilatan a hnênah, “An hêkna zozai che hi i hre lo vem ni?” a ti a.

¹⁴Tin, kam khat mahin a chhâng lo va; chutichuan, ram awptu chuan mak a ti hle a.

¹⁵Tin, ram awptuin kût niah chuan mi tâng pakhat, an duh apiang, mipuite chu a chhuahsak ṭhîn a.

¹⁶Tin, chumi lai chuan mi tâng hmingthang tak, Barabba an tih chu an nei a.

¹⁷Chutichuan, an rawn inkhâwm chuan Pilatan an hnênah, “Tu nge chhuahsak che u ila in duh? Barabba nge Isua, Krista an tiha chu?” a ti a.

¹⁸(Itsîkna avângin ani chu an mantîr tih a hre si a.)

¹⁹Tin, rorêlna ṭhutphahah chuan a ṭhut laiin a nupuiin, “Kha mi fel tak chungah khân eng mah ti suh; vawiinah hian amah avângin mumangah thil tam tak ka tuar a ni,” tiin a chah a.

²⁰Tin, puithiam lalte leh upaten Barabba dîla Isua tiboral tûrin mipuite chu an thlêm a.

²¹Ram awptu erawh chuan anniho chu a bia a, “Anni pahnih chu a tu zâwk nge chhuahsak che u ila in duh?” a ti leh a. Tin, anni chuan, “Barabba,” an ti a.

²²Pilatan an hnênah, “Isua, Krista an tih hi engtin nge ka tih tâk ang le?” a ti a. An zain, “Ani chu krawsah khen behtîr rawh,” an ti a.

²³Tin, ani chuan, “Engah maw? Eng nge a tihsual ni?” a ti a. Nimahsela, anniho chu, “Krawsah khen behtîr rawh,” tiin an au chiam a.

²⁴Tichuan, Pilata chuan eng mah a ti thei lo va, a buai deuh deuh zâwk dawn tih a hriatin tui a la a, mipuiho hmaah chuan a kut a sil a, “He mi fel thisenah hian ka thiang e; nangnin in tih tihin ti rawh u,” a ti a.

²⁵Tin, vântlâng zawng zawng chuan, “A thisen chu keimahni chungah leh kan fate chungah awm rawh se,” tiin an chhâng a.

²⁶Chumi zawhah chuan Barabba chu a chhuahsak a; Isua erawh chu a vua a, krawsa khen beh tûrin a pe ta a.

²⁷Chumi zawhah chuan, ram awptu sipaite chuan Isua chu lal inah an hruai lût a, an pâwla mi zawng zawng a hnênah an ko khâwm a.

²⁸Tichuan, a puante an hlihsak a, puan sen an sintîr a.

²⁹Tin, hlînglukhum an phiar a, an khumtîr a, a kut ding lamin luang an kentîr a; a hmaah an ṭhingṭhi a, “Chibai, Juda-te lal!” tiin nuihza siam nân an hmang a.

³⁰Tin, amah chu chil an chhâk a, luang chu an lâksak a, a luah chuan an vua a.

³¹Tin, nuihza siam nân an hman zawhin puan chu an hlihsak a, ama puante chu an sintîr leh a, krawsa khen beh tûrin an hruai ta a.

³²Tin, an kal chhuah laiin, Kurini khuaa mi, a hming Simona an hmu a; chu mi chu a kraws pu tûrin an man a.

³³Tin, Golgotha an tih hmun an lo thlenin (chu chu “Luruh hmun” tihna a ni)

³⁴uain thûr, englo khâ nêna pawlh, a in tûrin an pe a; nimahsela, a tem veleh a in duh ta lo va.

³⁵Tin, krawsa an khen beh zawhin ṭhum vâwrin a silhfênte chu an insem a.

³⁶Tin, chutah chuan an ṭhu a, an vêng a;

³⁷a hêkna, “He mi hi Isua, Juda-te Lal a ni,” tia ziak, a lu chungah an bel a.

³⁸Tin, a rual chuan suam hmang pahnih an khêng bet ve a, a ding lamah pakhat, a vei lamah pakhat.

³⁹Tin, mi vei apiangte chuan an lu thingin, “Nang, Pathian biak in ṭhiata ni thuma sa lehtu, intidam rawh; Pathian Fapa i nih chuan kraws ata kha lo chhuk ta che,” tiin an tiel a.

⁴⁰

⁴¹Chutiang bawkin puithiam lalte chuan lehkhaziaktute nên tielin,

⁴²“Mi dang mah a tidam ṭhîn a, mahni a intidam thei si lo. Israel lal a ni alâwm, tûnah hian kraws ata chu lo chhuk ang hmiang; tichuan, amah chu kan ring ang.

⁴³Pathian a ring alâwm, amah hi a duh chuan tûnah hian chhandam rawh se; ‘Pathian Fapa ka ni,’ a ti si a,” an ti a,

⁴⁴Suam hmang an khen beh vete pawh chuan chutiang bawk chuan an tiel a.

⁴⁵Tin, chawfâk hun achin behliang mun hun thlengin khawvêl a lo thim ta vek a.

⁴⁶Tin, behliang mun hun lai vêl chuan Isua chu aw ring takin, “Eloi, eloi, lama sabakthani?” tiin a au chhuak a (chu chu, “Ka Pathian, ka Pathian, engah nge mi kalsan?” tihna a ni).

⁴⁷Tin, a kianga ding ṭhenkhatte chuan chu chu an hriatin, “He mi hian Elija a ko a ni,” an ti a.

⁴⁸Tin, an zînga mi pakhat chu a tlân ta nghâl a, sponj a la a, uain thûrin a chiah khat a, tiangah a târ a, a han intîr a.

⁴⁹Tin, mi dangte chuan, “Awm rawh se; amah la thla tûrin Elija a lo kal emaw i en ang u,” an ti a.

⁵⁰Tin, Isua chu aw ring takin a au leh a, a thlarau a thlah ta a.

⁵¹Tin, ngai teh, Pathian biak in puanzâr chu a chung lam aṭangin a hnuai lam thlengin a lo thlêr chhuak ta a; tin, lîrte a lo nghîng a, lungpuite a lo khi chat a;

⁵²thlânte a lo inhawng a; mi thianghlim muhîl tawhte taksa tam tak pawh kaihthawhin an awm ta a;

⁵³chûngte chu, a thawhleh hnuah chuan thlân ata lo chhuakin khaw thianghlimah chuan an lût a, mi tam tak hnênah an inlâr ta a.

⁵⁴Tin, sipai za hotu leh a hnêna Isua vênga awm vete chuan, lîrnghîng leh thil awmziate chu an hmuhin an hlau ta êm êm a, “He mi hi Pathian Fapa a ni ngei mai,” an ti a.

⁵⁵Tin, chutah chuan hmeichhe tam tak, a rawngbâwlsak chung zêla Galili ram aṭanga Isua rawn zuitute chu an awm a, hla takah an thlîr a;

⁵⁶chûng zîngah chuan Mari Magdalini te, Mari, Jakoba leh Josea nu te, Zebedaia fapate nu te an tel a.

⁵⁷Tin, tlai lam a lo nih chuan mi hausa, a hming Josefa, Arimathai khuaa mi a lo kal a, amah ngei pawh chu Isua zirtîr a ni a;

⁵⁸chu mi chu Pilata hnênah a va kal a, Isua ruang chu a dîl a. Tin, Pilatan pe tûrin thu a pe a.

⁵⁹Tichuan, Josefa chuan ruang chu a la a, puan zai sîn fai takin a tuam a,

⁶⁰ama thlân thar, lung a ker kuakah chuan a zalh a; thlân kawngkaah chuan lung lian tak a lum a, a kal ta a.

⁶¹Tin, chutah chuan Mari Magdalini leh Mari dang chu an awm a, thlân hma zâwnah chuan an ṭhu a.

⁶²Tin, a tûkah chuan (chu chu Inrinni zawh tûk a ni) puithiam lalte leh Pharisaite chu Pilata hnênah an awm khâwm huai huai a,

⁶³“Ka pu, chu tihdertu chuan a dam lai khân, ‘Ni thum chinah ka tholeh ang,’ a ti tih kan hre reng a.

⁶⁴Chutichuan, thlân chu ni thum ni thlenga vêng ṭha tûrin thu pe rawh; chuti lo chuan a zirtîrten amah chu an va ru hlauh ang a, vântlâng hnênah, ‘Mitthi zîng ata a tholeh ta a ni,’ an ti dah ang e; tichuan, tihderna hnuhnûng zâwk chu a hmasa ai khân a ṭha lo lehzual ang,” an ti a.

⁶⁵Pilatan an hnênah, “Vêngtu sipaite in nei alâwm; kal ula, in theih ang angin vên ṭhattîr ta che u,” a ti a.

⁶⁶Chutichuan, vêngtu sipaite nên an va kal a, thlân chu an vên ṭhattîr a, lung chu an chhinchhiah a.