Read Mizo_Old_version CHANCHIN ṬHA MATTHAIA ZIAK 28 Bible Online

CHANCHIN ṬHA MATTHAIA ZIAK 28 - Mizo_Old_version bible

CHANCHIN ṬHA MATTHAIA ZIAK 28

¹Tin, Chawlhni tlai takah, ni sarih ni hmasa ber tûra khua a vâr dâwnin, Mari Magdalini leh Mari dang chu thlân en tûrin an kal a.

²Tin, ngai teh, lîr nasa takin a lo nghîng a; Lalpa vântirhkoh vân ata a lo chhuk a, lung chu a rawn lum sawn a, a chungah a ṭhu ta a.

³A hmêl awmzia chu kâwlphe ang a ni a, a silhfên chu vûr angin a vâr a;

⁴amah an hlauh avângin vêngtute chu an khûr a, mitthi ang maiin an lo awm ta a.

⁵Tin, vântirhkoh chuan hmeichhiate chu a bia a, an hnênah, “Nangni chuan hlau suh u. Isua, an khen beha kha in zawng tih ka hria e.

⁶Hetah a awm tawh lo ve; a sawi ang ngeiin a thawhleh tawh kha. A mutna hmun hi rawn en teh mah u.

⁷Tin, kal thuai ula, a zirtîrte hnênah, ‘Mitthi zîng ata a tholeh ta a ni; ngai teh u, Galili ramah in hmaah a kal e; chutah chuan amah chu in hmu ang,’ tiin hrilh rawh u. Ngai teh u, ka hrilh tawh che u hi,” a ti a.

⁸Tin, hlau leh lâwm êm êm chungin thlân aṭang chuan an kal thuai thuai a, a zirtîrte hrilh tûrin an tlân ta a.

⁹Tin, ngai teh, Isuan anni chu a tâwk a, “Chibai u,” a ti a. Tichuan, anni chuan a kephahte chu an va vuan a, chibai an bûk a.

¹⁰Tin, Isuan an hnênah, “Hlau suh u, kal ta ula, Galili rama kal tûrin ka unaute va hrilh rawh u; chutah chuan min hmu ang,” a ti a.

¹¹Tin, an va kal lai chuan vêngtu sipai ṭhenkhat chu khawpuiah an va lût a, thil awmzia zawng zawng chu puithiam lalte hnênah an va hrilh a.

¹²Tin, upate nên an inkhâwma, an inrâwn zawhin sipaite hnênah chuan tangka tam tak an pe a,

¹³“ ‘Zânah, kan muthilh hlânin a zirtîrte an lo kal a, amah chu an ru ta a ni,’ ti ang che u.

¹⁴Tin, ram awptuin chu chu a lo hriat chuan amah chu kan thlêm ang a, lungkham lovin kan siam ang che u,” an ti a.

¹⁵Chutichuan, tangka chu an la a, an hrilh ang zêl chuan an ti ta a; tichuan, tûn thlengin chumi thu chu Juda-te zîngah an la sawi huai huai a ni.

¹⁶Nimahsela, zirtîr sâwm leh pakhatte chu Galili ramah, Isuan tlâng a ruatsakah chuan an kal a.

¹⁷Tin, amah an hmuh chuan chibai an bûk a; ṭhenkhat erawh chuan an ringhlel a.

¹⁸Tichuan, Isua chu an hnênah a lo kal a, anniho chu a bia a, “Lei leh vâna thuneihna zawng zawng ka hnênah pêk a ni tawh.

¹⁹Chutichuan, kal ula, hnam tina mi zirtîrahte siam ula, Pa leh Fapa leh Thlarau Thianghlim hmingah chuan baptis ula,

²⁰thu ka pêk zawng zawng che u pawm tûrin zirtîr rawh u. Tin, ngai teh u, kei kumkhuain, khawvêl tâwp thleng pawhin, in hnênah ka awm zêl ang,” a ti a.