Read Mizo_Old_version CHANCHIN ṬHA MATTHAIA ZIAK 3 Bible Online

CHANCHIN ṬHA MATTHAIA ZIAK 3 - Mizo_Old_version bible

CHANCHIN ṬHA MATTHAIA ZIAK 3

¹Tin, chûng lai chuan Baptistu Johana chuan,

²“Sim rawh u! Vânram chu a hnai tawh e,” tiin Judai thlalêrah thu hrilin a lo kal a.

³(Amah chu a ni, zâwlnei Isaian, “Thlalêra mi au râwl chuan, ‘Lalpa lamlian sial ula, A kawngte tingîl rawh u,’ a ti,” tia a sawia kha.)

⁴Tin, chu mi Johana chuan sanghâwngsei hmul puan a sin a, a kâwng chu savun kâwnghrênin a hrêng a; a chaw chu khaukhuap leh khawizu a ni.

⁵Chumi lai chuan Jerusalem khuaa mi te, Judai rama mi zawng zawng te, Jordan lui dung vêla mi zawng zawng te chu an chhuak a, a hnên lamah an kal a,

⁶an sualte thupha chawiin Jordan luiah chuan a hnênah baptisma an chang ta hlawm a.

⁷Nimahsela, Pharisaite leh Saddukaite tam tak a baptisma chang tûra lo kal a hmuh veleh an hnênah, “Rûl thlahte u! Thinur lo thleng tûr hi tlânsan tûrin tuin nge zilh che u?

⁸Chutichuan, sim hming pu tlâkin rah rawh u:

⁹‘Abrahama kan thlahtu a ni alâwm,’ tiin inngaihtuah suh u; Pathianin hêng lungte hi Abrahama thlahahte a dintîr thei e, ka tih che u hi.

¹⁰Tûn apangin thingbul tinah hreipui an dah ta; chutichuan, thing tin rah ṭhaa rah lo apiang an kit a, meiah an paih ṭhîn.

¹¹Kei zawngin in simna tûrin tuiin ka baptis ṭhîn che u a; nimahsela, ka hnunga lo kal tûr chu keimah aiin a ropui zâwk a, a pheikhawk keng tlâk pawh ka ni lo ve. Ani chuan Thlarau Thianghlim leh meiin a baptis ang che u;

¹²a kutin a sisêp a keng a, a hruih a zâp fai hliau ang a, zêmah chuan a buh a khung ang, a sî erawh chu mei mit thei lovin a hâl ral ang,” a ti a.

¹³Chumi lai chuan a hnêna baptisma chang tûrin, Galili ram aṭangin Jordan luiah Johana hnênah Isua a lo kal a.

¹⁴Johana erawh chuan, “I mi baptis ka ṭûl zâwk si a, ka hnênah i lo kal zâwk a ni maw?” tiin khap a tum a.

¹⁵Nimahsela, Isuan a hnênah, “Tûnah remti hrâm rawh, hetianga felna zawng zawng hlen chhuah hi kan tân a mawi a ni,” tiin a chhâng a. Tichuan, rem a ti ta a.

¹⁶Tin, Isua chu baptisma a chan veleh tui ata a chhuak ta nghâl a; tin, ngai teh, a tân vân a lo inhawng a, Pathian Thlarau chu ṭhuro anga lo chhukin, a chunga lo fu a hmu a.

¹⁷Tin, ngai teh, vân aṭangin awin, “Hei hi ka Fapa duh tak, ka lawm êm êma chu a ni,” a ti a.