Read Mizo_Old_version CHANCHIN ṬHA MATTHAIA ZIAK 6 Bible Online

CHANCHIN ṬHA MATTHAIA ZIAK 6 - Mizo_Old_version bible

CHANCHIN ṬHA MATTHAIA ZIAK 6

¹“In thil ṭha tihte mi hmuh atân, mihring mit hmuha ti lo tûrin fîmkhur rawh u; chuti lo chuan, in Pa vâna mi hnênah chuan lâwmman in nei lo vang.

²“Chutichuan, mi hnêna englo i pêkin, mi vervêkten mi fak an hlawh theihna tûra inkhâwmna inah te, kawtthlêrah te an tih ṭhin ang hian, i hmaah tawtawrâwt hamtîr suh. Tihtakmeuhvin ka hrilh a che u, an lâwmman chu an hmu zo tawh.

³Nang erawh chuan mi hnêna englo i pêkin, i kut ding lamin a tih chu i kut vei lamin hre suh se,

⁴i englo pêk chu a rûkin a awm theih nân; chutichuan, i Pa a rûka hmu ṭhîntu chuan a rûl ang che.

⁵“Tin, in ṭawngṭaiin, mi vervêkte angin in ti tûr a ni lo; miin an hmuh theihna tûrin inkhâwmna inah te, kawtthlêr pêng takah te, ding chunga ṭawngṭai an ngaina si ṭhîn a. Tihtakmeuhvin ka hrilh a che u, an lâwmman chu an hmu zo tawh.

⁶Nang erawh chu i ṭawngṭaiin, i pindan chhûngrilah lût la, i kawng khâr la, i Pa a rûka awm hnênah chuan ṭawngṭai rawh; tichuan, i Pa a rûka hmu ṭhîntu chuan a rûl ang che.

⁷“Tin, in ṭawngṭaiin, Jentailte angin sawi nawn mai mai suh u; an ṭawng tam avângin hriain an ring a ni.

⁸Chutichuan, anmahni angin awm suh u; amah in dîl hmain in Pa chuan engte nge in mamawh tih a hre reng si a.

⁹“Chutichuan, nangni chu hetiang hian ṭawngṭai rawh u: “ ‘Kan Pa, vâna mi, I hming zahawm rawh se.

¹⁰I ram lo thleng rawh se. I duh zâwng vâna an tih angin leia min ti rawh se.

¹¹Vawiinah hian kan ei khawpin chaw min pe ang che.

¹²Kan batte hi min ngaidam ang che, Keini pawhin kan englo bate kan ngaihdam tâk ang khân.

¹³Sual tûra thlêmnaah min hruai lût suh la, Mi sual lakah chuan min chhandam zâwk ang che,’ tiin.

¹⁴“Mi an bawhchhiatte in ngaihdam chuan, in Pa vâna miin a ngaidam ve ang che u.

¹⁵Nimahsela, mite in ngaihdam si loh chuan, in Pain in bawhchhiatte a ngaidam bîk lo vang.

¹⁶“Chaw in nghei hun pawhin, mi vervêkte angin ngui hmêl pu suh u; anni zawngin mi mit hmuha chaw ngheia an lan theihna tûrin an hmêl an tipawr si ṭhîn a. Tihtakmeuhvin ka hrilh a che u, an lâwmman chu an hmu zo tawh.

¹⁷Nang erawh chuan chaw i nghei hunin sahriak thih la, i hmai phih rawh;

¹⁸chutichuan, i Pa a rûka awm mit hmuhah chauh lo chuan, mihring mit hmuhah chaw ngheiin i lang lo vang; tichuan, i Pa a rûka hmu ṭhîntu chuan a rûl ang che.

¹⁹“Leia sûlrûl leh tuiêkin a ei chhiatnaah, rûkruten an reh pawha an rûknaah hian, in tân rote khâwl khâwm suh u;

²⁰vânah, sûlrûl leh tuiêkin a ei chhiat lohnaah, rûkruten an reh pawha an rûk hek lohnaah chuan, in tân rote khâwl khâwm zâwk rawh u;

²¹i ro awmna apiangah i rilru pawh a awm ang.

²²“Taksa khâwnvâr chu mit hi a ni; chutichuan, i mit a fîm chuan i taksa a pumin a êng chhuak ang.

²³I mit a chhiat erawh chuan i taksa a pumin a thim zo vek ang. Chutichuan, i chhûnga êng chu thim ni sela, thim chu a va nasa dâwn êm!

²⁴“Tu mân hotu pahnih rawng an bâwl kawp thei lo: pakhat huain pakhat an duh ang; a nih loh leh, pakhat ṭanin pakhat an hmusit ang. Pathian leh sum rawng in bâwl kawp thei lo ve.

²⁵“Chuvângin, ka hrilh a che u, ‘Eng nge ka ei anga, eng nge ka in ang aw?’ tiin in nunna thu leh, ‘Eng nge ka silhin ka fên ang aw?’ tiin in taksa thu lungkham suh u. Ei tûr aiin nunna a thupui zâwk lo vem ni? Silhfên aiin taksa pawh a thupui zâwk lo vem ni?

²⁶Chunglêng savate hi en rawh u; buh an tuh lo va, an ât hek lo, buh inah an seng lût hek lo; nimahsela, in Pa vâna mi chuan a châwm si a. Nangni chu anni ai chuan nasa takin in hlu zâwk lo vem ni?

²⁷Tin, nangni zîngah lungkham avângin tuin nge mahni dung lam tawng khata tisâng chuang thei?

²⁸Tin, silhfên thu engah nge in lungkham ni? Ram tûktinpâr ṭhanzia hi ṭha takin ngaihtuah rawh u; hna an thawk lo, la pawh an kai hek lo;

²⁹nimahsela, ka hrilh a che u, Solomona meuh pawh a ropuina zawng zawnga a inthuam khân, hêng tûktinpâr pakhat tluk pawh hian cheiin a awm lo.

³⁰Chutichuan, ram hnim, vawiin anga nung, a tûka thuka tuah leh mai tûr mah Pathianin chuti kauva a chei chuan, aw nangni rin tlêmte u, silhfên a pe zâwk êm êm dâwn lo che u em ni?

³¹Chutichuan, ‘Eng nge kan ei ang?’ emaw, ‘Eng nge kan in ang?’ emaw, ‘Eng sinin nge kan awm ang?’ tih emaw lungkham suh u,

³²Jentailten chûng zawng zawng chu an zawng ṭhîn a ni. Chûng zawng zawng chu in mamawh tih in Pa vâna min a hre reng a ni.

³³A ram leh a felna chu zawng hmasa zâwk rawh u; tichuan, chûng zawng zawng chu a pêk belhchhah dâwn che u nia.

³⁴Chutichuan, a tûk atân lungkham suh u, a tûk chuan ama tân a lungkham chawp dâwn si a. Ni khat atân ni khat hrehawm chu a tâwk a ni.