Read Mizo_Old_version CHANCHIN ṬHA MATTHAIA ZIAK 7 Bible Online

CHANCHIN ṬHA MATTHAIA ZIAK 7 - Mizo_Old_version bible

CHANCHIN ṬHA MATTHAIA ZIAK 7

¹“Sawisêl suh u, sawisêla in awm loh nân.

²In sawisêl ang bawkin an sawisêl ang che ua, in tehna ngai bawkin an tehsak leh ang che u.

³Tin, engati nge mahni mita khanchhuk awm chu ngaihtuah si lovin, i unau mita hmawlh tê tak tê awm chu i hmuh ni?

⁴Engtin nge i unau hnênah, ‘I mit ata hmawlh tê tak tê kha mi lâk chhuahtîr rawh,’ i tih theih ang? Ngai teh, nangma mit ngeiah khanchhuk a awm reng si a.

⁵Mi vervêk! I mit ata khanchhuk kha la chhuak hmasa rawh; chutichuan, i unau mit ata hmawlh tê tak tê lâk chhuah tûr chu fiah takin i hmu ang.

⁶“Ui hnênahte thil thianghlim chu pe suh u; vawk hmaahte in tuikeplungte paih hek suh u, an chîl chhe hlauh ang a; hawiin an tai thlêr dah ang che u.

⁷“Dîl rawh u, tichuan, an pe ang che u; zawng rawh u, tichuan, in hmu ang; kik rawh u, tichuan, an hawnsak ang che u;

⁸tu pawh a dîl apiang chuan an hmu ṭhîn a; tu pawh a zawng chuan an hmu ṭhîn a; tu pawh a kik chu an hawnsak dâwn a ni.

⁹A nih leh, nangniho hi tu pawh in fapain chhangpêr dîl che u sela, tuin nge lung pe ang che u?

¹⁰A nih leh, sangha dîl che u sela, tuin nge rûl pe ang che u?

¹¹Chutichuan, nangni mi sual mahin in fate thil ṭha pêk nachâng in hriat chuan, in Pa vâna mi chuan a dîltute chu thil ṭha a pe zâwk êm êm dâwn lo vem ni?

¹²“Chutichuan, thil engkim miin in chunga an tiha in duh tûr ang apiang chu, mi chungah pawh ti ve rawh u; chu chu dân thu leh zâwlneite thu a ni rêng si a.

¹³“Kawngka zîmah chuan lût rawh u: boralnaa kalna kawngka chu a zau va, a kawng pawh a zau bawk a, chumi lama lût chu tam pawh an tam hle a ni;

¹⁴nunnaa kalna kawngka chu a zîm a, a kawng pawh a chêp bawk a, a hmutute pawh tlêm tê an ni.

¹⁵“Zâwlnei derte lakah fîmkhur rawh u; chûng chu berâm vun sinin in hnênah an lo kal ṭhîn a, an chhûng lamah erawh chuan chinghne koham takte an ni si a.

¹⁶Anmahni chu an rahah in hre mai ang. Hruihlîngnei kûngah grêp rah an lo ngai em ni? Lênhlîngah pawh theipui an lo ngai em ni?

¹⁷Chutiang bawkin thing ṭha apiang a rah ṭha ṭhîn a; thing chhia erawh chu a rah chhe ṭhîn.

¹⁸Thing ṭha a rah chhe thei lo va, thing chhia lah a rah ṭha thei hek lo.

¹⁹Thing tin rah ṭha lo apiang chu an kit a, meiah an paih ṭhin.

²⁰Chuvângin, anmahni chu an rahah in hre mai ang.

²¹“ ‘Lalpa, Lalpa’ mi ti nazawng chu vânramah an lût lo vang a; ka Pa vâna mi duh zâwng titu erawh chu an lût ang.

²²Chumi niah chuan mi tam takin, ‘Lalpa, Lalpa, i hmingin thute kan sawiin, i hmingin ramhuaite kan hnawt chhuakin, i hmingin thil mak tam tak kan ti ṭhîn lo vem ni?’ an la ti ang.

²³Chumi hunah chuan, ‘Nangni thil sual tite u, ka hre ngai lo a che u, ka hnên ata kal bo rawh u,’ tiin anni chu ka la hrilh ang.

²⁴“Chutichuan, mi tin hêng ka thu hi hriaa zâwm apiang chu, mi fing, lungpui chunga in satu nên tehkhin tûr a ni.

²⁵Ruahte a lo sûr a, tuite a lo lian a, thlite a lo tleh a, chu in chu a rawn nam sawk sawk a; nimahsela, a chim lo va; lungpui chunga rem tlat a nih avângin.

²⁶Tin, mi tin, hêng ka thu hi hriaa zâwm lo apiang chu, mi â, ṭiauvut chung maia in satu nên tehkhin tûr a ni.

²⁷Ruahte a lo sûr a, tuite a lo lian a, thlite a lo tleh a, chu in chu a rawn nam sawk sawk a; a chim ta a; a sawp chu nasa tak a ni,” a ti a.

²⁸Tin, heti hi a ni a, Isuan chûng thu chu a sawi zawh veleh, mipuiten a thu zirtîr chu mak an ti hle a;

²⁹lehkhaziaktute ang lova thuneihna nei âwm taka anmahni a zirtîr avângin.