Read Mizo_Old_version CHANCHIN ṬHA MATTHAIA ZIAK 8 Bible Online

CHANCHIN ṬHA MATTHAIA ZIAK 8 - Mizo_Old_version bible

CHANCHIN ṬHA MATTHAIA ZIAK 8

¹Tin, tlâng ata chu a lo chhuk hnuin mipui tam takin amah an zui ta a.

²Tin, ngai teh, a hnênah phâr a lo kal a, “Lalpa, i duh chuan mi tithianghlim thei e,” tiin chibai a bûk a.

³Tin, Isuan a han ban a, a dek a, “Ka duh e, lo thianghlim tawh ang che,” a ti a. Tin, chawplehchilhin a phâr chu a lo thianghlim ta nghâl a.

⁴Tin, Isuan a hnênah, “Tu mah hrilh lo tûrin fîmkhur ang che; amaherawhchu, puithiam hnênah va inentîr la, Mosian thilpêk tûr a ruat kha hlân rawh, an hriat fiahna tûrin,” a ti a.

⁵Tin, Kapernaum khuaa a luhin, a hnênah sipai za hotu a lo kal a,

⁶“Lalpa, ka naupang zengin inah a mu reng a, nasa taka tihnatin a awm a ni,” tiin a ngên chiam a.

⁷Tin, ani chuan a hnênah, “Ka lo kal ang a, ka tidam ang,” a ti a.

⁸Tin, sipai za hotu chuan, “Lalpa, ka in chhûng i luhna tlâk a ni lo ve; thu chauh sawi la, ka naupang a dam mai ang.

⁹Kei pawh mi thua awm ka ni a, ka hnuaiah sipaite an awm a; chu mi chu, ‘Kal rawh,’ ka tih leh a kal ṭhîn; mi dang hnênah pawh, ‘Lo haw rawh,’ ka tih leh a lo haw ṭhîn; ka bawih hnênah pawh, ‘Hei hi ti rawh,’ ka tih leh a ti ṭhîn,” tiin a chhâng a.

¹⁰Tin, Isuan chûng thu chu a hriatin mak a ti hle a, a zuitute hnênah chuan, “Tihtakmeuhvin ka hrilh a che u, Israel-te zîngah pawh heti êma rinna nasa hi ka hmu lo.

¹¹Ka hrilh a che u, chhak leh thlang aṭangin mi tam tak an lo kal ang a, vânramah chuan Abrahama te, Isaaka te, Jakoba te hnênah an ṭhu ang a;

¹²ram fate erawh chu pâwn thimah chuan hnawh chhuahin an awm ang a; chutah chuan ṭah leh ha ṭhial chu a awm ang,” a ti a.

¹³Tin, Isuan sipai za hotu hnênah chuan, “Kal tawh rawh, i rin angin i chungah lo thleng rawh se,” a ti a. Tichuan, naupang chu chumi dâr ngeiah chuan a lo dam ta a.

¹⁴Tin, Isua chu Petera ina a luhin, a nupuia nu chu khawsika mu a hmu a.

¹⁵Tichuan, a kut chu a dehsak a, a khawsik chu a reh ta a; tin, a tho va, a rawng a bâwlsak ta a.

¹⁶Tin, khua a lo tlai lam chuan, a hnênah ramhuai mante tam tak an rawn hruai a; tin, thuin ramhuaite chu a hnawt chhuak a, damlo zawng zawngte chu a tidam bawk a:

¹⁷Zâwlnei Isaian, “Amah ngeiin kan chak lohnate a la a, kan nâte a phur a,” tia a sawi chu a lo thlen theihna tûrin.

¹⁸Tin, Isuan mipui tam tak a vêla a hmuhin, râl lehlama kal tûrin thu a pe a.

¹⁹Tin, lehkhaziaktu pakhat a lo kal a, a hnênah, “Zirtîrtu, i kalna apiangah ka zui ang che,” a ti a.

²⁰Tin, Isuan a hnênah, “Sihalten kua an nei a, chunglêng savate pawhin bu an nei a, Mihring Fapa erawh hi chuan a lu nghahna a nei lo,” a ti a.

²¹Tin, a zirtîrte zînga mi dangin a hnênah, “Lalpa, ka pa mi vuitîr zet rawh,” a ti a.

²²Nimahsela, ani chuan a hnênah, “Mi zui rawh; mitthiin anmahni mitthi chu vui rawh se,” a ti a.

²³Tin, lawngah a chuang a, zirtîrte chuan an zui a.

²⁴Tin, ngai teh, dîl chu nasa takin a lo fâwn ta a; chutichuan, tuifâwnin lawng chu a vûr hlup hlup mai a; ani erawh chu a muhîl a.

²⁵Tin, a hnênah an lo kal a, an kaitho va, “Lalpa, min chhanhim rawh, kan boral dâwn hi le,” an ti a.

²⁶Tin, ani chuan an hnênah, “Rin tlêmte u, engah nge in hlauh?” a ti a. Chumi hnuah chuan a tho va, thlite leh dîl chu a hau va; tin, a lo reh ta ṭhuap mai a.

²⁷Tin, mite chuan mak an ti hle a, “He mi hi mi eng nge a nih, thli leh dîl lam pawhin a thu an awih hi?” an ti a.

²⁸Tin, râl lehlam, Gadarin mite ram chu a thlenin, ramhuai man pahnih, thlân aṭanga lo chhuakin an rawn tâwk a, an kawlh êm êm a; chutichuan, chumi kawngah chuan tu mah an kal thei lo va.

²⁹Tin, ngai teh, anni chuan, “Pathian Fapa, keini leh nang eng nge kan inzâwlna? Hun tiam thlen hmain min nghaisa tûrin hetah i lo kal em ni?” tiin an au va.

³⁰Tin, an awmna aṭanga hla feah vawk rual tam tak an tla a.

³¹Tin, ramhuaite chuan, “Min hnawh chhuah chuan vawk rual kawchhûngahte sâwn min kaltîr ang che,” tiin a hnênah an ngên a.

³²Tin, ani chuan an hnênah, “Kal ta che u,” a ti a. Tichuan, an lo chhuak a, vawk kawchhûngahte chuan an va lût a; tin, ngai teh, vawk rual zawng zawng chu khâmah an tlân chhuk chiam a, dîlah an tlân lût a, tuiah chuan an boral ta a.

³³Tin, a vulhtute chu an tlân a, khuaah chuan an kal a, engkim an hrilh ta a, ramhuai mante chunga thil lo thlengte pawh chu.

³⁴Tin, ngai teh, a khuain Isua hmuak tûrin an lo chhuak a; tin, amah an hmuh veleh an ram ata chhuak tûrin an ngên chiam a.