Read Mizo_Old_version CHANCHIN ṬHA MARKA ZIAK 10 Bible Online

CHANCHIN ṬHA MARKA ZIAK 10 - Mizo_Old_version bible

CHANCHIN ṬHA MARKA ZIAK 10

¹Tin, a tho va, chuta ṭang chuan Judai ramah leh Jordan râlah a kal ta a; tin, mipuihote chu a hnênah an rawn inkhâwm leh a; tichuan, a tih dân pângngaiin a lo zirtîr leh a.

²Tin, Pharisai ṭhenkhat a hnênah an lo kal a, amah fiah nân, “Miin nupui mâk a thiang em?” tiin an zâwt a.

³Tin, ani chuan an hnênah, “Mosian engtin nge thu a pêk che u?” tiin a chhâng a.

⁴Tin, anni chuan, “Mosia chuan inmâkna lehkha ziakin mâk a phal ṭhîn a ni,” an ti a.

⁵Nimahsela, Isuan an hnênah, “In thinlung khauh avângin asin chu thupêk chu a ziaksak che u ni.

⁶Nimahsela, leilung pian tirh aṭang chuan, ‘Anni chu hmeichhia leh mipaah a siam a ni.’

⁷Chumi avâng chuan, ‘Mipain a nu leh a pa a kalsan ang a, a nupui a vuan ang;

⁸tichuan, an pahnih chuan tisa pumkhat an lo ni tawh ang;’ chutichuan, pahnih an ni tawh lo va, tisa pumkhat an ni tawh zâwk a ni.

⁹Chutichuan, Pathianin a zawm tawh chu mihringin ṭhen suh se,” a ti a.

¹⁰Tin, inah chuan a zirtîrte chuan chûng thu chu amah an zâwt leh a.

¹¹Tin, ani chuan an hnênah, “Tu pawh a nupui maa mi dang nei apiang chuan a nupui chu a uiresan a ni;

¹²ani pawh chuan a pasal a ṭhen a, mi dang a neih chuan a uire a ni bawk,” a ti a.

¹³Tin, a deh atân a hnênah naupang tête an rawn hruai a; tin, zirtîrte chuan an lo hau va.

¹⁴Nimahsela, Isuan chu chu a hmuhin a lungni lo êm êm a, zirtîrteho hnênah chuan, “Naupang tête ka hnênah han kaltîr ula, hnar suh u; Pathian ram chu hetiang mite ta a ni si a.

¹⁵Tihtakmeuhvin ka hrilh a che u, tu pawh Pathian ram chu naupang têin a lawm anga lâwm lo apiang, a chhûngah an lût tawp lo vang,” a ti a.

¹⁶Tin, anmahni chu a kuangkuah a, an chungah a kut nghatin mal a sâwmsak ta a.

¹⁷Tin, kal tûra a chhuah laiin mi pakhat a lamah a lo tlân a, a hmaah a ṭhingthi a, a hnênah, “Zirtîrtu ṭha, chatuana nunna ka chan theih nân engtin nge ka tih ang?” tiin a zâwt a.

¹⁸Tin, Isuan a hnênah, “Engati nge ṭha mi tih? Mi pakhat chauh lo chu tu mah ṭha an awm lo, chu chu Pathian a ni.

¹⁹Thupêkte chu i hria alâwm ‘Tualthat suh,’ ‘Uire suh,’ ‘Ru suh,’ ‘Dâwtin hêk suh,’ ‘Bum suh,’ ‘I nu leh i pa chawimawi rawh,’ tihte hi,” a ti a.

²⁰Tin, ani chuan a hnênah, “Zirtîrtu, chûng thu zawng zawng chu ka naupan têt ata ka zâwm ṭhîn,” a ti a.

²¹Tin, Isuan amah chu a en a, a hmangaih ta a, a hnênah, “Kawng khat i la bâk e; kal la, i neih apiang hralh la, pachhiate hnênah pe rawh; chutichuan, vânah ro i nei ang; tin, lo kal la, mi zui ang che,” a ti a.

²²Amaherawhchu, chûng thu chungah chuan a hmêl a lo dur ta khup a, lungngai takin a kal bo ta a; sum tam tak nei a nih avângin.

²³Tin, Isuan a en vêl a, a zirtîrte hnênah chuan, “Sum ngahte chu Pathian rama luh a va harsa dâwn êm!” a ti a.

²⁴Tin, a zirtîrte chuan a thusawi chu mak an ti hle a. Isua erawh chuan a chhâng leh a, an hnênah, “Naute u, sum ringte tân Pathian rama luh a va harsa ṭhîn êm!

²⁵Mi hausa Pathian rama luh aiin, sanghâwngsei hriau benga luh tlang a awl zâwk,” a ti a.

²⁶Tin, anni chuan mak an ti nasa êm êm a, a hnênah, “A nih leh, tu nge chhandam ni thei ang le?” an ti a.

²⁷Isuan anni chu a en a, “Chu chu mihring tân tih rual a ni lo va, Pathian tân erawh chuan tih rual loh a ni lo; Pathian nên engkim tih theih a ni si a,” a ti a.

²⁸Peteran a hnênah, “Ngai teh, keinin engkim kalsanin kan zui ta chia,” tiin a han sawi ṭan a.

²⁹Isua chuan, “Tihtakmeuhvin ka hrilh a che u, tu pawh keimah avâng leh Chanchin Ṭha avânga in emaw, unaupate emaw, farnute emaw, nu emaw, pa emaw, fate emaw, ramte emaw kalsan tawh phawt chu,

³⁰tûn dam chhûng la la hian inte, unaupate, farnute, nute, fate, ramte a leh zain, tihduhdahnate nên hmu lo tûr tu mah an awm lo; hun lo la thleng tûra chatuana nunna nên.

³¹Nimahsela, mi tam tak hmasa bera awmte chu hnuhnûng berah an la awm ang a, hnuhnûng berte pawh hmasa berah an la awm ang,” a ti a.

³²Tin, Jerusalem khuaa chho tûrin kawngah an awm a, Isua chuan an hma a hruai a; anni chuan mak an ti hle a; a rawn zuitute chuan an hlau va. Tin, ani chuan sâwm leh pahnihte chu a hruai hrang leh a,

³³“Ngai teh u, Jerusalem khuaah kan chhoh dâwn hi; Mihring Fapa hi puithiam lalte leh lehkhaziaktute hnênah mantîrin a awm dâwn a ni; tin, anni chuan thi tûrin a chungah thu an titlu ang a, Jentailte hnênah an pe ang.

³⁴Tin, anni chuan nuihza siam nân an hmang ang a, chil an chhâk ang a, an vua ang a, an tihlum ang; tin, ni thum chinah a tholeh ang,” tiin, a chunga thil lo thleng tûrte chu an hnênah a hrilh ta a.

³⁵Tin, Zebedaia fapa Jakoba leh Johana chuan ani chu an rawn hnaih a, a hnênah, “Zirtîrtu, i hnêna kan dîl tûr apiang che chu i mi tihsak kan duh e,” an ti a.

³⁶Tin, ani chuan an hnênah, “In tân eng nge tihsak che u ila in duh le?” a ti a.

³⁷Tin, anni chuan a hnênah, “I ropuinaah chuan, i ding lamah pakhat, i vei lamah pakhat min ṭhuttîr ang che,” an ti a.

³⁸Isua erawh chuan an hnênah, “In dîl chu in hre lo a ni. Ka no in tûr chu in in thei em ni? Ka baptisma chan tûr pawh in chang thei em ni?” a ti a.

³⁹Tin, anni chuan a hnênah, “Thei e,” an ti a. Tin, Isuan an hnênah, “Ka no in tûr chu in in ang a, ka baptisma chan tûr pawh chu in chang ve ang;

⁴⁰nimahsela, ka ding lamah emaw, ka vei lamah emawa ṭhut tûr thu chu keia pêk tûr a ni lo va, an buatsaihsakate tân a ni zâwk ang,” a ti a.

⁴¹Tin, sâwmte chuan chu chu an lo hriatin Jakoba leh Johana chungah chuan an lungni ta lo êm êm a.

⁴²Isua erawh chuan anniho chu a ko va, an hnênah, “Jentailte chunga rorêltua an ruatte chu an chungah an lal êm êm ṭhîn a, an mi liante chuan an chungah thu an nei êm êm bawk ṭhîn tih in hria.

⁴³Nimahsela, nangni zîngah zawng chutiang a ni lo vang; tu pawh in zînga mi lian nih duh apiang chu in rawngbâwltuah a awm zâwk tûr a ni.

⁴⁴Tu pawh in zînga hmasa ber nih duh apiang chu mi zawng zawng chhiahhlawhah a awm bawk tûr a ni.

⁴⁵Mihring Fapa meuh pawh rawngbâwlsaka awm tûrin a lo kal lo va, rawngbâwl tûr leh mi tam tak tlan nâna a nun pe zâwk tûrin a lo kal a ni si,” a ti a.

⁴⁶Tin, Jeriko khua an lo thleng a; tin, Isua chu Jeriko aṭang chuan a zirtîrte leh mipui tam tak nên a chhuah laiin, kutdawh mitdel, Timaia fapa Bartimaia chu kawng sîrah a lo ṭhu a.

⁴⁷Tin, Nazareth Isua a ni tih a hriat veleh, “Isu, Davida Fapa, mi khawngaih rawh,” tiin a au ta a.

⁴⁸Tin, mi tam takin ngawi tûrin an hau va; nimahsela, ani chu, “Davida Fapa, mi khawngaih rawh,” tiin a au zual sauh va.

⁴⁹Tin, Isua chu a ding a, “Amah chu han ko teh u,” a ti a. Tin, mitdel chu an ko va, a hnênah chuan, “Thlamuang takin awm la, tho rawh; a ko va che,” an ti a.

⁵⁰Tin, ani chuan a puan a paih a, a zuang tho va, Isua hnênah chuan a kal ta a.

⁵¹Tin, Isuan amah chu a lo bia a, “I chungah engtia ka tih nge i duh?” a ti a. Tin, mitdel chuan a hnênah, “Rabboni, hmuh theih ka duh,” a ti a.

⁵²Tin, Isuan a hnênah, “Kal tawh rawh, i rinna hi i dampui a ni e,” a ti a. Tichuan, a hmu thei ta nghâl a, kalkawngah chuan Isua a zui ta a.