Read Mizo_Old_version CHANCHIN ṬHA MARKA ZIAK 11 Bible Online

CHANCHIN ṬHA MARKA ZIAK 11 - Mizo_Old_version bible

CHANCHIN ṬHA MARKA ZIAK 11

¹Tin, Jerusalem khua an thlen dâwna, Olive tlânga Bethphage leh Bethani khaw kiang an thlenin, a zirtîrte zînga mi pahnih a tîr a,

²an hnênah, “In hma zâwn khuaah sâwn va kal ta ula; tin, in luh tirhin sabengtungno thlun, tu ma la chuan ngai lohna in va hmu mai ang; chu chu phelh ula, han kai rawh u.

³Tin, tu pawhin, ‘Kha kha engah nge in tih?’ an tih che u chuan, ‘Lalpa in a duh a ni; hetah a rawn dahtîr leh thuai ang e,’ ti ang che u,” a ti a.

⁴Tin, an kal ta a, kawtthlêrah kawngkhâr pâwn lama sabengtungno thlun an va hmu a; tin, chu chu an phelh ta a.

⁵Tin, chuta ding tute emaw chuan an hnênah, “Sabengtungno kha engah nge in phelh?” an ti a.

⁶Tin, anni chuan Isua sawi ang tak khân an hnênah an sawi a; tichuan, an kal an phal ta a.

⁷Tin, sabengtungno chu Isua hnênah an rawn kai a, a chungah chuan an puante an phah a; tichuan, a chungah a chuang ta a.

⁸Tin, mi tam takin kalkawngah chuan an puan an phah a; mi dangin lova mi chhâwl sâtin an phah bawk a.

⁹Tin, a hma lama kalte leh a hnung lama rawn zuite chuan, “Hosanna! Lalpa hminga lo kal chu fakin awm rawh se,

¹⁰Ram lo thleng tûr, kan pa Davida ram chu chawimawiin awm rawh se. Chungnung berah khian Hosanna!” tiin an au va.

¹¹Tin, Jerusalem khuaa Pathian biak inah chuan a va lût a; tin, engkim a en vêl zawh chuan tlai lam a lo ni ta a, a chhuak a, sâwm leh pahnihte nên Bethani-ah an kal ta a.

¹²Tin, a tûkah chuan Bethani aṭanga a chhuah hnuin a ril a lo ṭâm ta a.

¹³Tin, theipui kûng hnah nei hla takah a han hmu a, “A rah ka hmu dah law maw,” tiin a va kal a; tin, a va thlen chuan a hnah chauh lo chu eng mah a hmu lo va, theipui rah hun a ni lo rêng a.

¹⁴Tichuan, Isuan thing chu a bia a, “Tûn achinah kumkhuain i lakah tu mân rah ei tawh suh se,” a ti a. A zirtîrte chuan chu chu an hria a.

¹⁵Tin, Jerusalem khua chu an thleng a, Pathian biak inah chuan a va lût a, biak ina englo zuartute leh leitute chu a hnawt chhuak ta a, tangka thlengtuho dawhkânte leh ṭhuro zuarho ṭhutphahte pawh chu a nam thlûksak bawk a;

¹⁶tin, Pathian biak inah chuan tu mahin bungrua an ken tlang a phal ta lo bawk a.

¹⁷Tin, an hnênah chuan, “ ‘Ka in chu hnam tin tân ṭawngṭaina in an ti ang,’ tih ziak a ni lo vem ni? Nangni erawh chuan suam hmangte pûkah in siam zâwk hi,” tiin a zirtîr ta a.

¹⁸Tin, puithiam lalte leh lehkhaziaktute chuan chu chu an hria a, amah an hlauh avângin a tihboralna tûrzia an zawng a; mipui zawng zawng chuan a zirtîrna chu mak an ti hle si a.

¹⁹Tin, tlai lam apiangah khawpui ata chu a kal chhuak ṭhîn a.

²⁰Tin, zînga an kal pahin theipui kûng chu a zung thlenga thi zo vekin an hmu ta a.

²¹Tichuan, Peteran a lo hre chhuak leh a, a hnênah chuan, “Rabbi, en teh, theipui kûng ânchhia i lawh kha a thi zo ta!” a ti a.

²²Tin, Isuan an hnênah, “Pathian ring rawh u.

²³Tihtakmeuhvin ka hrilh a che u, tu pawh he tlâng hnênah hian, ‘Lo insawn la, tuifinriatah lo inpaih rawh,’ tia, a rilrua ringhlel lova a sawi chu a lo thleng ngei ang tih ring apiangin an sawi ang apiang chu an hmu ang.

²⁴Chuvângin, ka ti a che u, engkim in ṭawngṭaia in dîl apiang chu hmu tawhah inngai ula; tichuan, in hmu ang.

²⁵Tin, ṭawngṭaia in din hun apiangin, tu chungah pawh thupawi eng emaw in neih chuan ngaidam rawh u; in Pa vâna mi pawhin in bawhchhiatnate chu a ngaihdam theihna tûr che uin,” a ti a, a chhâng a. [1]

²⁷Tin, Jerusalem khua chu an thleng leh a; tin, Pathian biak ina a lên laiin puithiam lalho te, lehkhaziaktuho te, upaho te chu a hnênah an lo kal a,

²⁸a hnênah chuan, “Tu thuin nge hêng thil hi i tih? Hêng thil hi ti tûrin tuin nge thu pe che?” an ti a.

²⁹Tin, Isuan an hnênah, “Kei pawhin thu kam khat ka zâwt ve ang che u; mi chhâng ula; tichuan, tu thuin nge hêng thil hi ka tih ka hrilh ang che u.

³⁰Johana baptisma kha vâna mi thu nge, mihring thu? Mi chhâng rawh u,” a ti a.

³¹Tin, an inngaihtuah a, “ ‘Vâna mi thu,’ kan tih chuan, ‘Engah nge a thu in awih loh le?’ min ti si ang a,

³²‘Mihring thu,’ kan ti emaw chu ni ang?” an ti a. Nimahsela, mipui chu an hlau va; mi zawng zawngin Johana chu zâwlnei tak takah an ruat hlawm si a.

³³Tichuan, Isua an chhâng a, “Kan hre lo,” an ti a. Tin, Isuan an hnênah, “Kei pawhin tu thuin nge hêng thil hi ka tih ka hrilh bîk lo vang che u,” a ti a.