Read Mizo_Old_version CHANCHIN ṬHA MARKA ZIAK 12 Bible Online

CHANCHIN ṬHA MARKA ZIAK 12 - Mizo_Old_version bible

CHANCHIN ṬHA MARKA ZIAK 12

¹Tin, tehkhin thuin an hnênah a sawi ta a: “Tuin emaw grêp huan a siam a, palin a hung vêl a, grêp sâwrna tûr khur a lai a, in sâng a sa a, lo enkawltute hnênah thlawh hlawh tûrin a pe a, ram dangah a kal ta a.

²Tin, a lawh hun chuan huana rah chu a chan ai lo enkawltute hnên ata la tûrin lo enkawltute hnênah chuan bawih pakhat a tîr a.

³Tin, chu mi chu an lo man a, an vêl a, kutruakin an kaltîr leh ta a.

⁴Tin, bawih dang an hnênah a tîr leh a; chu pawh chu lungin an dêng a, a luah an lo tipem a, zahthlâk takin an lo sawisa a.

⁵Tin, bawih dang a tîr leh pek a; chu mi chu an lo tihlum a. Bawih dang tam tak pawh - ṭhenkhat an vêl a, ṭhenkhat an lo tihlum a.

⁶Tin, pakhat, fapa duh tak a la nei a; ‘Ka fapa hi chu an zah ang,’ tiin ani chu a hnuhnûng berah an hnênah a tîr a.

⁷Nimahsela, chûng lo enkawltute chuan, ‘He mi hi ro luahtu tûr a ni; i that ang u khai! Tichuan, a ro luah tûr hi kan ta a ni mai ang,’ an ti a.

⁸Tichuan, ani chu an lo man a, an tihlum a, grêp huan ata chu an theh chhuak ta a.

⁹Chutichuan, huan neitupa chuan engtin nge a rawn tih ang? Lo enkawltute chu a rawn tiboral ang a, huan chu mi dangte a pe ang.

¹⁰He Pathian Lehkha thu hi in chhiar lâwm ni? ‘In satute lung duh loh kha, Chu ngei chu a kila lung ṭangkai ber a lo ni ta.

¹¹Chu chu Lalpa tih a ni a, Kan mit hmuhah a mak a ni,’ tih hi,” a ti a.

¹²Tin, amah chu man an tum ta a; nimahsela, mipui chu an hlau va; chu tehkhin thu chu anmahni demin a sawi tih an hre si a. Tichuan, amah chu an kalsan a, an kal bo ta a.

¹³Tin, a thusawia man tûrin Pharisaite leh Heroda pâwla mi tute emaw a hnênah an tîr a.

¹⁴Tichuan, anni chu an lo thlen chuan a hnênah, “Zirtîrtu, mi dik tak i ni a, pawisak chuan tu mah i nei lo tih kan hria, tu mah thlei bîk lovin, tihtakzetin Pathian kawng thu i zirtîr ṭhîn a ni: Kaisara hnêna chhiah chawi hi a thiang nge thiang lo?

¹⁵Kan pe ang nge pe lo vang?” an ti a. Ani erawh chuan an vêrvêkzia chu hriain, an hnênah, “Engah nge mi fiah? Duli mi han lâk ula, ka lo en ang e,” a ti a.

¹⁶Tin, an rawn la a. Tin, ani chuan an hnênah, “Hei hi tu lem leh tu hming nge ni?” a ti a. Tin, anni chuan, “Kaisara,” an ti a.

¹⁷Tin, Isuan an hnênah, “Kaisara thilte chu Kaisara hnênah pe ula, Pathian thilte chu Pathian hnênah pe ta che u,” a ti a. Tichuan, mak an ti nasa êm êm a.

¹⁸Tin, Suddukaiho, thawhlehna a awm lo tite chu a hnênah an lo kal a; a hnênah,

¹⁹“Zirtîrtu, Mosian, ‘Tu pawh a unaupain fa nei lovin a nupui thihsan sela, a unaupa chuan a nupui chu a rochungin a unaupa tân chi a thlahsak tûr a ni,’ tiin min ziaksak a ni.

²⁰Aw le, sal sarih an awm a; a upa berin nupui a nei a, chi thlah lovin a thi a.

²¹Tichuan, a pahnihna chuan a rochung a, chi thlah lovin a thi leh bawk a; a pathumna chuan chutiang bawkin.

²²Tichuan, sal sarihte chu chi rêng rêng thlah lovin an thi zêl a. A hnuhnûng berah hmeichhia pawh chu a thi ta a.

²³Thawhleh hunah chuan a tu bera nupui nge ni ang? An pasarih chuan nupuiah an nei ṭheuh si a,” tiin an zâwt a.

²⁴Isuan an hnênah, “Hemi avâng hian a ni lâwm ni in ngaih sual ṭhin, Pathian Lehkha Thu leh Pathian thiltihtheihna in hriat loh avâng hian?

²⁵Mitthi zîng ata an thawhlehin nupui pasal an innei dâwn tawh lo va, vâna vântirhkohte ang an ni dâwn tawh zâwk a ni.

²⁶Tin, mitthite kaihthawha an awm tûr thu chu, Mosia lehkhabua hnimbuk thu-ah khân, Pathianin, ‘Kei Abrahama Pathian, Isaaka Pathian, Jakoba Pathian ka ni,’ tia a biakzia kha in chhiar lo vem ni?

²⁷Ani chu mitthi Pathian a ni lo va, mi nung Pathian a ni zâwk; in ngai sual nasa hle a ni,” a ti a.

²⁸Tin, lehkhaziaktute zînga mi pakhat a lo kal a, an inhnial chu a lo ngaithla a, Isuan anniho chu ṭha takin a chhâng tih a hria a, a hnênah, “Thupêk zawng zawngah eng hi nge ropui ber?” tiin a zâwt a.

²⁹Isuan, “A ropui ber chu hei hi a ni: ‘Israel-hote u, ngai teh u, Lalpa kan Pathian chu Lalpa pakhat chauh a ni a;

³⁰Lalpa i Pathian chu i thinlung zawng zawngin, i thlarau zawng zawngin, i rilru zawng zawngin, i chakna zawng zawngin i hmangaih tûr a ni,’ tih hi.

³¹A dawttu chu hei hi a ni: ‘Nangmah i inhmangaih angin i vêngte pawh i hmangaih tûr a ni,’ tih hi. Hêng aia thupêk ropui zâwk rêng rêng hi a awm lo,” tiin a chhâng a.

³²Tin, lehkhaziaktu chuan a hnênah, “A ni tak e, zirtîrtu, amah chu pakhat chauh a ni a, amah lo chu tu mah dang an awm lo va,

³³amah chu thinlung zawng zawnga, hriatna zawng zawnga, chakna zawng zawnga hmangaiha, mahni inhmangaih anga vêngte hmangaih hi pumhâl thilpêk leh inthawina zawng zawng aiin a ṭha zâwk êm êm tih hi i sawi dik zet mai,” a ti a.

³⁴Tin, fing takin a chhâng tih Isuan a hriatin, a hnênah chuan, “Pathian ram i hlat lo ve,” a ti a. Chumi chinah chuan tu mân thu rêng rêng an zâwt ngam ta lo va.

³⁵Tin, Isuan Pathian biak inah chuan a zirtîr laiin anmahni a bia a, “Krista chu Davida fapa a ni tih lehkhaziaktuten engtiziaa sawi ṭhîn nge an nih?

³⁶Davida ngeiin, Thlarau Thianghlimin, Lalpa chuan ka Lalpa hnênah, ‘I hmêlmate i ke nghahchhana ka siam hma loh zawng Ka ding lamah ṭhu rawh,’ a ti, a ti a.

³⁷Davida ngei chuan ani chu ‘Lalpa’ a ti si a, khawiah nge a fapa a nih ang?” a ti a. Tin, vântlângho chuan lâwm takin a thu an ngaithla a.

³⁸Tin, a zirtîrnaah chuan, “Lehkhaziaktute lakah fîmkhur rawh u; anni chuan kawrfual haa lên an duh ṭhîn a, dâwr hmunah chibai bûk te,

³⁹inkhâwmna inah ṭhutphah tha ber te, ruaiṭhehnaah hmun ṭha ber te an ngiat ṭhîn a;

⁴⁰hmeithai sum an ei a, tlâng bum nân rei tak an ṭawngṭai ṭhîn; chûngho chuan thiam loh an chang nasa lehzual ang,” a ti a.

⁴¹Tin, thawhlâwm bâwm zâwnah chuan a ṭhu a, thawhlâwm bâwma mipuiho tangka thlâk zia chu a en a; mi hausa tam takin tam tak tak an thlâk a.

⁴²Tin, hmeithai rethei tê a lo kal a, dâr tangka dere pahnih a thlâk a (chu chu pawisa pakhat hu a ni.)

⁴³Tin, Isua chuan a zirtîrte chu a ko va, an hnênah, “Tihtakmeuhvin ka hrilh a che u, thawhlâwm bâwma thlâktu zawng zawng ai hian he hmeithai rethei tê hian a thlâk tam zâwk.

⁴⁴Hêng zawng zawng hian an neih liama mi an thlâk a ni; ani erawh hi chuan a duh lai tak, a neih chhun tak, a intunnunna tûr zawng zawng chu a thlâk vek a ni,” a ti a.