Read Mizo_Old_version CHANCHIN ṬHA MARKA ZIAK 13 Bible Online

CHANCHIN ṬHA MARKA ZIAK 13 - Mizo_Old_version bible

CHANCHIN ṬHA MARKA ZIAK 13

¹Tin, Pathian biak in ata chu a kal chhuah laiin a zirtîrte zînga mi pakhatin a hnênah, “Zirtîrtu, en teh, a lung leh a inte hi a ropui teh a nia!” a ti a.

²Tin, Isuan a hnênah, “Hêng in ropui tak hi i hmu maw? Tihchim lohva lung intiang rêng rêng hetah a awm lo vang,” a ti a.

³Tin, Olive tlânga Pathian biak in zâwna a ṭhut laiin Petera te, Jakoba te, Johana te, Andria te chuan a hnênah,

⁴“Chûng chu eng tikah nge a lo awm ang? Chûng zawng zawng chu a thlen dâwn hunah chhinchhiahna eng nge awm ang, min hrilh rawh,” tiin an zâwt ru a.

⁵Tin, Isuan an hnênah, “Tu mân an tihder loh nân che u fîmkhur rawh u.

⁶Mi tam tak, ‘Krista chu ka ni,’ tiin keima hming chhâlin an lo kal ang a, mi tam tak an tihder ang.

⁷Tin, indo thu leh indo thuthangte in hriat hunin mangang suh ang che u; chûng chu a lo thleng tûr rêng a ni; nimahsela, tâwpna chu a la ni rih lo vang.

⁸Hnam hrang leh hnam hrang an indo vang a, ram hrang leh ram hrang an indo vang a; hmun hrang hrangah lîrte a nghîng ang a, ṭâmte a tla ang; chûng chu nau vei ṭan tirhna a ni.

⁹“Nimahsela, fîmkhur rawh u; rorêltute an mantîr dâwn che u a; inkhâwmna inahte an vua ang che u a; keimah avângin hotute leh lalte hmaah anmahni hriattîrna tûrin in la ding bawk ang.

¹⁰Tin, Chanchin Ṭha hi hnam zawng zawng hnêna hril hmasak tûr a ni.

¹¹Tin, an hruai che ua, an mantîr hunah che u chuan, ‘Eng nge ka sawi ang?’ tiin ngaihtuah lâwk suh u; a hun takah chuan a hriattîr che u apiang, chu ngei chu sawi zâwk rawh u; a sawitu chu nangni in ni dâwn si lo va, Thlarau Thianghlim a ni zâwk ang.

¹²Tin, tihhlum tûrin unaupa leh unaupa an inmantîr ang a, pa pawhin a fa a mantîr bawk ang; fate pawhin an nu leh an pate an do vang a, an tihhlumtîr bawk ang.

¹³Keima hming avângin mi zawng zawng huat in ni ang; nimahsela, a tâwp thlenga tuar peih apiang, chu mi ngei chu chhandamin a awm ang.

¹⁴“Nimahsela, tiṭiautu tenawm chu a din lohna tûra ding in hmuh hunah (a chhiar apiangin a awmzia hre rawh se), chumi hunah chuan Judai rama awmte chu tlângahte tlân bo rawh se;

¹⁵tin, in chunga awm chu chhuk suh se, a ina englo chuh tûrin lût hek suh se;

¹⁶tin, lova awm chu a puan chuh tûrin kîr leh suh se.

¹⁷Chûng ni chuan raite leh nauno pawmte chung chu a pik ang.

¹⁸Tin, chûng chu thlasika a lo thlen loh nân ṭawngṭai rawh u.

¹⁹Chûng ni chu hrehawmna ni a ni dâwn si a, chutianga nasa rêng rêng chu, Pathian siam leilung pian tirh ata tûn thlengin a la awm ngai lo va, eng tikah mah a awm leh tawh hek lo vang.

²⁰Tin, Lalpan chûng nite chu titawi suh sela, mihring rêng rêng damin an chhuak lo vang; nimahsela, mi thlan, a ruatate avâng chuan nite chu a titawi a ni.

²¹“Tin, chutih hunah chuan tu pawhin in hnênah, ‘En teh u! Krista chu heta hi a awm,’ emaw, ‘En teh u, sawta saw!’ emaw an tih chuan awih suh ang che u;

²²Krista derte leh zâwlnei derte an lo chhuak dâwn si a, chûng chuan chhinchhiahna leh thil makte an ti ang, thei ang sela, thlante meuh pawh an tihder theih nân.

²³Nangni erawh chu fîmkhur rawh u, ngai teh u, engkim ka hrilh lâwk tawh che u hi.

²⁴“Nimahsela, chûng nia, chûng hrehawmna hnuah chuan, ni tihthimin a awm ang a, thla a êng tawh lo vang a,

²⁵vân aṭangin arsite a lo tla ang a, vâna thiltihtheihna awmte chu tihnghîn a ni ang.

²⁶Chutih hunah chuan Mihring Fapa hi, thiltihtheihna nasa tak leh ropuina nasa tak nên, chhûm zînga lo kal an hmu ang.

²⁷Chumi hunah chuan vântirhkohte chu a tîr chhuak ang a, a thlante chu kâwlkil li ata - lei tâwp aṭanga vân tâwp thlengin - a lâwr khâwm ang.

²⁸“Tichuan, theipui kûngah hian a tehkhin thu zir rawh u: a ṭang a lo nova, a hnah a lo chawr chuan nipui a thaw dâwn tih in hre ṭhîn;

²⁹chutiang bawkin nangni pawhin chûng chu a lo thleng in hmuh hun chuan, amah chu a lo hnai tawh a, kawngka bul ngeiah a awm tih hria ang che u.

³⁰Tihtakmeuhvin ka hrilh a che u, chûng zawng zawng chu a thlen hma loh zawng tûnlai chhuante hi an ral lo vang.

³¹Lei leh vân a ral ang a, ka thu erawh chu a ral lo vang.

³²“Nimahsela, chumi ni leh a dâr thu chu Pa chauh lo chuan tu mân, vâna vântirhkohte pawhin, Fapa pawhin an hre lo.

³³“Fîmkhur ula, inring renga awmin ṭawngṭai rawh u; a hun chu in hre si lo va.

³⁴Mi, a in kalsana, a bawihte chu thuneihtîra, an hnathawh tûr pe ṭheuhva, kawngkhâr vêngtu pawh inrin tûr thu pe zeta, ram hla taka zin ta daih ang a ni.

³⁵Chutichuan, inring rengin awm rawh u; in neitupa lo haw hun tûr chu tlai lamah nge, zânah nge, ârkhuanah nge, zîngah nge a nih dâwn in hre si lo;

³⁶chuti lo chuan, a lo haw phutin, muhîlin a rawn hmu hlauh dah ang che u.

³⁷Tin, in hnêna ka sawi hi mi zawng zawng hnêna sawi ka ni. Inring rengin awm rawh u,” a ti ta a.