Read Mizo_Old_version CHANCHIN ṬHA MARKA ZIAK 14 Bible Online

CHANCHIN ṬHA MARKA ZIAK 14 - Mizo_Old_version bible

CHANCHIN ṬHA MARKA ZIAK 14

¹Tin, ni hnih chinah chuan kalhlên kût leh chhang dawidim telh loh kût a awm dâwn a; puithiam lalte leh lehkhaziaktute chuan amah chu ngamthlêma mana, an tihhlum theihna tûrzia an zawng an zawng a;

²nimahsela, “Kût chhûng chuan ni suh se; chuti lo chuan, vântlâng zîngah buaina a lo awm hlauh dah ang e,” an ti a.

³Tin, Bethani khuaa phâr Simona inah a awm laia chaw a kîl laiin, hmeichhe pakhat alabasta bâwma spiknard hriak rimtui to tak kengin a lo kal a, a bâwm chu a tikeh a, a luah a leih a.

⁴Nimahsela, ṭhenkhat chu an thinur ta hlawm a, “Eng atân nge hriak rimtui hi a tihboral mai mai ni?

⁵He hriak hi duli zathum aia tam zâwka hralha, mi retheite hnêna pêk theih a ni si a,” an ti a. Tichuan, a chungah chuan an phunnawi ta a.

⁶Isua erawh chuan, “Eng mah tih suh u; engah nge in tihbuai ni? Ka chungah hian thil ṭha tak a ti a ni.

⁷Mi retheite chu kumkhuaa in hnêna awm an ni a, in duh hun apiangah anni chu in khawngaih thei si a; kei erawh chu kumkhuaa in hnêna awm tûr ka ni lo.

⁸A tih theih tâwk a ti a ni; ka taksa hi phûm tûrin a lo hnawih lâwk a nih hi.

⁹Tichuan, tihtakmeuhvin ka hrilh a che u, khawvêl zawng zawngah, khawiah pawh Chanchin Ṭha an hrilna apiangah, he hmeichhe thiltih pawh hi amah hriat rengna tûrin an sawi ve zêl ang,” a ti a.

¹⁰Tin, Juda Iskariota, sâwm leh pahnihte zînga mi pakhat khân, Isua chu an hnêna a mantîr theih nân puithiam lalte hnênah a va kal a.

¹¹Tin, anni chuan an hriat veleh an lâwm hle a, a hnênah tangka pêk an tiam ta a. Tichuan, a mantîrna tûrzia remchâng a zawng ta a.

¹²Tin, chhang dawidim telh loh ni, ni hmasa ber, kalhlên kûtna berâmno an talh ṭhinna niah chuan a zirtîrten a hnênah, “Kalhlên kût chaw i ei theihna tûrin khawiah nge va buatsaih ila i duh?” an ti a.

¹³Tichuan, a zirtîrte zînga mi pahnih a tîr a, an hnênah, “Khawpuiah va lût ula, chutah chuan mipa bêla tui puin a tâwk ang che u; amah chu zui ang che u.

¹⁴Tin, a luhna apiangah, chu in neitupa hnênah chuan, ‘Zirtîrtu chuan, “Ka zirtîrteho nên kalhlên kût chaw kan eina tûr, ka mikhual pindan chu khawiah nge?” a ti e,’ ti ang che u.

¹⁵Tichuan, amah ngei chuan pindan chungnung zau tak, bungraw awm sa peih diam a entîr ang che u; chutah chuan kan tân buatsaih ang che u,” a ti a.

¹⁶Tin, zirtîrte chu an chhuak ta a, khawpuiah chuan an va lût a, an hnêna a sawi ang takin an hmu a; tin, kalhlên kût chaw chu an buatsaih ta a.

¹⁷Tin, khua a lo tlai lam chuan ani chu sâwm leh pahnihte nên an va kal ta a.

¹⁸Tin, an kîla an ei laiin Isuan, “Tihtakmeuhvin ka hrilh a che u, in zînga mi pakhat, ka hnêna ei ve ngei hian mi mantîr ang,” a ti a.

¹⁹Tin, an lungngai ta hle a, a mal malin a hnênah, “Keimah em ni?” an ti ta ṭheuh va.

²⁰Tin, ani chuan an hnênah, “Sâwm leh pahnihte zînga mi pakhat, thlênga mi chiahpuitu hi a ni.

²¹Mihring Fapa hi a chanchin an ziak ang tak khân a kal dâwn a ni; nimahsela, Mihring Fapa mantîrtu tûr mihring chung chu a pik e! Chu mihring chu piang suh sela a tân a ṭha zâwk ang,” a ti a.

²²Tin, an ei laiin Isuan chhang a la a, mal a sâwmsak zawhin a phel a, an hnênah a pe a, “La rawh u; hei hi ka taksa a ni,” a ti a.

²³Tin, no a la a, lâwm thu a sawi zawhin an hnênah a pe a; tichuan, an zain an in ta ṭheuh va.

²⁴Tin, ani chuan an hnênah, “Hei hi ka thisen, mi tam tak tâna chhuak tûr, thuthlunna chu a ni.

²⁵Tihtakmeuhvin ka hrilh a che u, Pathian rama a thar ka in ni a thlen hma loh zawng, grêp hrui raha mi ka in leh tawh lo vang,” a ti a.

²⁶Tin, hla an sak zawhin an chhuak a, Olive tlângah chuan an kal ta a.

²⁷Tin, Isuan an hnênah, “In zain lungni lovin in la awm vek ang, ‘Berâm vêngtu chu ka vua ang a, berâmte chu an darh ang,’ tih ziak a ni si a.

²⁸Nimahsela, ka thawhleh hnuah Galili ramah in hmaah ka kal ang,” a ti a.

²⁹Petera erawh chuan a hnênah, “An zain lungni lovin awm mah sela, kei zawng ka awm lo vang,” a ti a.

³⁰Tin, Isuan a hnênah, “Tihtakmeuhvin ka hrilh a che, vawiinah, zânin la laah hian, âr vawi hnih a khuan hmain nangin vawi thum mi phat ang,” a ti a.

³¹Ani erawh chuan nasa takin, “I thihnaah chuan thi ve dâwn mah ila, ka phat tawp lo vang che,” a ti chiam a. Tin, chutiang bawk chuan an ti ta ṭheuh va.

³²Tin, Gethsemane an tih hmun chu an thleng a; tin, ani chuan a zirtîrte hnênah, “Ka ṭawngṭai chhûng zawng hetah hian lo ṭhu rawh u,” a ti a.

³³Tin, Petera te, Jakoba te, Johana te chu a hruai a, nasa takin a thlaphângin a lo mangang ta êm êm a.

³⁴Tichuan, an hnênah, “Ka rilru a lungngai êm êm a, thihna khawp hial a ni; hetah hian awm ula, inring reng rawh u,” a ti a.

³⁵Tin, tlêmin hma lamah a va kal hlek a, leiah a bawkkhup a, theih ni sela, chumi hun chuan amah pêl tûrin a ṭawngṭai a.

³⁶“Abba! (Ka Pa!) Engkim i ti thei a; he no hi ka hnên ata la sawn rawh; nimahsela, keia thu ni lovin, nangma thu thu ni zâwk rawh se,” a ti a.

³⁷Tin, a lo kal a, anniho chu muhîlin a rawn hmu a; tichuan, Petera hnênah, “Simon, i muhîl a ni maw? Dârkâr khat pawh inring rengin i awm thei lo maw?

³⁸Thlêmnaa in luh loh nân inring rengin ṭawngṭai rawh u. Thlarau zawngin a peih a, tisa erawh chu a chak lo a ni,” a ti a.

³⁹Tin, a va kal leh a, a thusawi ngai sawiin a ṭawngṭai leh a.

⁴⁰Tin, a lo lêt leh chuan anniho chu muhîlin a rawn hmu leh a, an mut a chhuak hle si a, chhân ngaihna pawh an hre lo va.

⁴¹Tin, a lo kal vawi thumnaah chuan an hnênah, “Tûnah zawng muhîl ula, châwl tawh rawh u! A tâwk tawh e; a hun chu a lo thleng ta; ngai teh u, Mihring Fapa hi mi sualte kutah an mantîr dâwn hi.

⁴²Tho ula, i kal ang u; en teh u, mi mantîrtu tûr chu a lo hnaih tâk hi,” a ti a.

⁴³Tin, a la sawi lai mêkin Juda, sâwm leh pahnihte zînga mi pakhat chu, a lo thleng ta nghâl a, ama rual chuan puithiam lalte leh lehkhaziaktute leh upate hnên ata mipuiho, khandaih leh talhtum kengin an lo thleng bawk a.

⁴⁴Tin, a mantîrtu tûr chuan, “Ka fawh apiang chu amah a ni ang; man ula, fel takin hruai bo ang che u,” tiin chhinchhiahna tûr a lo hrilh lâwk tawh diam a.

⁴⁵Tichuan, a thlen veleh amah a va pan ta nghâl a, “Rabbi!” tiin a fâwp ta ngawih ngawih a.

⁴⁶Tin, ani chu an chelh a, an man ta a.

⁴⁷Tin, a kianga dingte zînga mi tuin emaw a khandaih a phawi a, puithiam lalber bawih chu a sât a, a beng a sah thlâksak a.

⁴⁸Tin, Isuan anniho chu a bia a, an hnênah, “Khandaihte, talhtumte kengin, suam hmang man tûr ang rengin mi man tûrin in lo chhuak a ni maw?

⁴⁹Pathian biak inah ni tin zirtîrin in hnênah ka awm ṭhîn a, mi man si lo. Nimahsela, Pathian Lehkha thu chu a lo thlen theihna tûr a nih hi,” a ti a.

⁵⁰Tin, an zain amah chu an thlahthlam a, an tlân bo ta vek a.

⁵¹Tin, tlangvâl tuin emaw, puan zai sîn chauh inbelin amah chu a zui a; tin, ani chu an lo man a;

⁵²nimahsela, a puan zai sîn chu a kalsan a, saruakin a tlân bo ta a.

⁵³Tin, Isua chu puithiam lalber hnênah an hruai a; tin, ama rual chuan puithiam lalte, upate, lehkhaziaktute zawng zawng an lo kal khâwm a.

⁵⁴Tin, Peteran hla tak aṭangin amah chu a zui a, puithiam lalber in hual chhûng kawtlai thlengin; tin, chhiahhlawhte zîngah mei lum aiin a ṭhu ve a.

⁵⁵Tin, Isua an tihhlum theihna tûrin, puithiam lalte leh rorêltuteho zawng zawng chuan amah hêkna an zawng a; an hmu si lo va.

⁵⁶Mi tam takin dâwtin an hêk a; nimahsela, an hêkna thu chu a inhmu thei si lo.

⁵⁷Tin, tute emaw an ding a, dâwtin an hêk a.

⁵⁸“He mi hian, ‘He Pathian biak in kuta sak hi ka ṭhiat ang a, ni thum chhûngin biak in dang, kuta sak loh mi, ka sa ang,’ a tih kan hria,” an ti a.

⁵⁹Nimahsela, chuti pawh chuan an hêkna thu chu a inhmu thei chuang lo.

⁶⁰Tin, puithiam lalber chu a laiah a ding chhuak a, Isua hnênah, “Eng mahin i chhâng lo maw? Hêng hian an hêkna che hi engtizia nge ni?” tiin a zâwt a.

⁶¹Ani erawh chu a ngawi reng a, eng mahin a chhâng lo. Puithiam Lalber chuan a hnênah, “Krista, Engthâwla Fapa chu i ni em?” tiin a zâwt leh a.

⁶²Tin, Isuan, “Ni e; Mihring Fapa hi thiltihtheihna ding lama ṭhua, vân chhûm zînga lo kal in la hmu dâwn a ni,” a ti a.

⁶³Tin puithiam lalber chuan a silhfênte a pawt thlêr a, “Hretu dang engah nge kan ngaih tawh ang?

⁶⁴Pathian a sawichhiatzia in hre tawh a; engtin nge in ngaih?” a ti a. Tin, an zain ani chu thi tlâkah an ruat hlawm a.

⁶⁵Tin, a ṭhenin amah chu chil an chhâk ta pang a, a hmai an tuam a, an hnek a, a hnênah, “Sawi rawh,” an ti a. Tin, chhiahhlawhte chuan an chelh pahin an bêng sawk sawk a.

⁶⁶Tin, Petera chu hnuai lama in hual chhûng kawtlaiah chuan a awm laiin, puithiam lalber rawngbâwltu nula zînga pakhat a lo kal a;

⁶⁷Petera mei lum ai chu a hmu a, a en a, “Nang pawh hi Isua, Nazareth mi hnêna awm kha i nih hi,” a ti a.

⁶⁸Ani erawh chuan, “I thusawi chu ka hre hauh lo mai, a ngaihna rêng pawh ka hre hek lo,” tiin a pha a. Tin, sumhmunah chuan a va chhuak a; tichuan, âr a khuang ta a.

⁶⁹Tin, nula chuan a hmu a, a kianga dingte hnênah chuan, “He mi hi an zînga mi a ni,” a ti leh ta a.

⁷⁰Nimahsela, a pha leh a. Tin, rei lo tê achinah a kianga dingte chuan Petera hnênah, “An zînga mi i ni ngei mai, Galili rama mi i ni si a,” an ti a.

⁷¹Ani erawh chuan, “Chu mihring in sawia chu ka hre lo,” tiin ânchhia inlawhin chhia a chham ta a.

⁷²Tin, âr khuan vawi hnihna chu a khuang ta nghâl a. Tin, Petera chuan, Isuan a hnêna, “Ar vawi hnih a khuan hmain nangin vawi thum mi phat ang,” a tih thu kha a lo hre chhuak leh ta a. Tin, chu chu a ngaihtuahin a ṭap ta a.