Read Mizo_Old_version CHANCHIN ṬHA MARKA ZIAK 15 Bible Online

CHANCHIN ṬHA MARKA ZIAK 15 - Mizo_Old_version bible

CHANCHIN ṬHA MARKA ZIAK 15

¹Tin, zîng a lo nih veleh, puithiamte chu upate leh lehkhaziaktute leh rorêltuho zawng zawng nên an inrâwn a, Isua chu an phuar a, an hruai a, Pilata hnênah an pe ta nghâl a.

²Tin, Pilata chuan a hnênah, “Juda-te lal i ni em?” tiin a zâwt a. Tin, ani chuan a hnênah, “Ni e,” tiin a chhâng a.

³Tin, puithiamte chuan kawng tam takin an hêk a.

⁴Tichuan, Pilatan a zâwt leh a, a hnênah, “Eng mahin i chhâng lo maw? Ngai rawh, an hêkna che zozai hi!” a ti a.

⁵Isua erawh chuan eng mahin a chhâng ta lo va; chutichuan, Pilata chuan mak a ti hle a.

⁶Tin, Pilata chuan kût niah mi tâng pakhat an ngen apiang a chhuahsak ṭhîn a.

⁷Tin, mi pakhat Barabba an tih chu helte zîngah phuarin a lum reng a, chûng chuan helnaah chuan tual an that a ni.

⁸Tin, mipuiho chu an han chho va, an tân a tihsak ṭhin anga ti tûrin an ngên ta a.

⁹Tin, Pilatan a chhâng a, an hnênah, “Juda-te lal hi chhuahsak che u ila in duh em?” a ti a.

¹⁰(Puithiam lalten îtsîkna avângin an rawn hruai tih a hre si a.)

¹¹Nimahsela, puithiam lalte chuan mipuiho chu Barabba chhuahsak zâwk dîl tûrin an fuihpawrh a.

¹²Pilata chuan an hnênah, “Juda-te lal in tiha hi engtin nge ka tih tâk ang le?” tiin a chhâng leh a.

¹³Tin, anniho chu, “Krawsah khêng bet rawh,” tiin an au leh a.

¹⁴Tin, Pilata chuan an hnênah, “Engah maw? Eng nge a tihsual ni?” a ti a. Nimahsela, anniho chu, “Krawsah khêng bet rawh,” tiin an au chiam a.

¹⁵Tichuan, Pilata chuan mipuiho chu tihlungawi a duh a, Barabba chu a chhuahsak ta a; tin, Isua chu a vuak zawhin krawsa khen beh tûrin a pe ta a.

¹⁶Tin, sipaite chuan in hual chhûng kawtlai, Praitorian an tihah chuan amah chu an hruai lût a, an pâwla mi zawng zawng an ko khâwm a.

¹⁷Tichuan, puan senduk an sintîr a, hlînglukhum an phiar a, an khumtîr a.

¹⁸Tin, “Chibai, Juda-te lal!” tiin chibai an bûk ta a.

¹⁹Tin, a luah chuan luangin an vua a, chil an chhâk a, ṭhingṭhiin chibai an bûk a.

²⁰Tin, nuihza siam nân an hman zawhin puan senduk chu an hlîp a, ama puan an sintîr leh a, krawsa khen beh tûrin an hruai chhuak ta a.

²¹Tin, mi veivâk pakhat, ram lam ata lo kal, a kraws pu tûrin an man a - Simona, Kurini khuaa mi, Aleksandra leh Rufa pa chu.

²²Tin, Isua chu Golgotha hmunah an hruai a (chu chu “Luruh hmun” tihna a ni).

²³Tin, uain, murra nêna pawlh an pe a; nimahsela, a la duh lo va.

²⁴Tin, krawsah an khêng bet a, an chan ṭheuh tûr hriat nân ṭhum vâwrin a silhfênte chu an insem a.

²⁵Tin, Isua an khen beh chu fehrehsân lai a ni a.

²⁶Tin, a hêkna lehkha a chung lamah an ziak a, “JUDA-TE LAL” tiin.

²⁷Tin, ama rual chuan suam hmang pahnih an khêng bet ve a; a ding lamah pakhat, a vei lamah pakhat. [1]

²⁸

²⁹Tin, mi vei apiangte chuan an lu thingin, “Ehei! Nang Pathian biak in ṭhiata ni thuma sa lehtu,

³⁰intidam la, kraws ata kha lo chhuk ta che,” tiin an tiel a.

³¹Chutiang bawkin puithiam lalte chuan, lehkhaziaktute nên anmahni zîngah tielin, “Mi dang mah a tidam ṭhîn a, mahni a intidam thei si lo.

³²Kan hmuha kan rin theih nân, Krista, Israel lal chu, tûnah hian kraws ata chu lo chhuk ang hmiang,” an ti a. Tin, ama ruala khen beh vete chuan ani chu an hau va.

³³Tin, chawfâk hun a lo nih chuan, behliang mun hun thlengin khawvêl a lo thim ta vek a.

³⁴Tin, behliang mun hun lai chuan Isua chu aw ring takin, “Eloi, Eloi, lama sabakthani?” tiin a au chhuak a (chu chu “Ka Pathian, ka Pathian, engah nge mi kalsan?” tihna a ni).

³⁵Tin, a kianga ding ṭhenkhatte chuan chu chu an hriatin, “Ngai teh u, Elija a ko a ni,” an ti a.

³⁶Tin, mi pakhat a tlân a, sponj uain thûra chiah khatin, tiangah a târ a, a han intîr a, “Awm rawh se, amah la thla tûrin Elija a lo kal emaw i en ang u,” a ti a.

³⁷Tin, Isua chu aw ring takin a au va, a thlarau a thlah ta a.

³⁸Tin, Pathian biak in puanzâr chu, a chung lam aṭangin a hnuai lam thlengin a lo thlêr chhuak ta a.

³⁹Tin, a hma zâwna sipai za hotu ding chuan a thlarau chutianga a thlah a hmuh chuan, “He mi hi Pathian Fapa a ni ngei mai,” a ti a.

⁴⁰Tin, hmeichhiate pawh hla taka thlîrin an awm a; chûng zîngah chuan Mari Magdalini te, Mari, Jakoba te leh Josea nu te, Salomi te an tel a,

⁴¹(chûng chu Galili rama a awm laia amah zuia a rawng bâwlsak ṭhînte chu an ni) hmeichhe dang tam tak, Jerusalem khuaa ama ruala chho vete chu an tel bawk a.

⁴²Tin, khua a lo tlai lam chuan Inrinni a nih avângin (chu chu Chawlhni hmaa ni hi a ni)

⁴³Josefa, Arimathai khuaa mi, rorêltu zahawm, Pathian ram beisei mi ve bawk chu a lo kal a, huai takin Pilata hnênah a lût a, Isua ruang chu a dîl ta a.

⁴⁴Tichuan, Pilata chuan chutia a thi ta thuai chu mak a ti hle a, sipai za hotu chu kovin, a thihna a rei tawh em tih a zâwt a.

⁴⁵Tin, sipai za hotu kâ aṭanga a hriat chuan, a ruang chu Josefa hnênah a pe a.

⁴⁶Tin, Josefa chuan puan zai sîn a lei a, amah chu a la thla a, puan zai sîn chuan a tuam a, thlân, lung ker kuakah a zalh a, thlân kawngkaah chuan lung a lum ta a.

⁴⁷Tin, Mari Magdalini leh Josea nu Mari chuan an zalhna chu an hmu reng a.