Read Mizo_Old_version CHANCHIN ṬHA MARKA ZIAK 16 Bible Online

CHANCHIN ṬHA MARKA ZIAK 16 - Mizo_Old_version bible

CHANCHIN ṬHA MARKA ZIAK 16

¹Tin, Chawlhni chu a lo ral chuan Mari Magdalini te; Mari, Jakoba nu te; Salomi te chuan amah hnawih tûra an va kal theih nân englo rimtui an lei a.

²Tin, ni sarih ni hmasa berah, zîng takah, ni chhuah hnuin thlân chu an va thleng a.

³Tin, “Thlân kawngka ata lung chu tuin nge min lum sawnsak ang aw?” an tih lai mêkin,

⁴an han dâk a, lung chu lum sawn sain an hmu ta a, a lian hle si a.

⁵Tin, thlân chhûngah chuan an lût a, tlangvâl pakhat puan vâr sin, ding lampanga ṭhu an hmu a; an mangang ta a.

⁶Tichuan, ani chuan an hnênah, “Mangang suh u; Isua, Nazareth mi an khen beh kha in zawng a ni âwm a, a tholeh ta; hetah a awm tawh lo; en teh u, an zalhna hi!

⁷Nimahsela, kal ula, a zirtîrte leh Petera hnênah chuan, ‘Galili ramah in hmaah a kal dâwn a; in hnêna a sawi ang ngei khân chutah chuan in hmu ang,’ tiin hrilh rawh u,” a ti a.

⁸Tichuan, an lo khurha, an lo mangan tâk avângin an chhuak a, thlân aṭang chuan an tlân ta vang vang a; an hlauh avângin tu ma hnênah eng mah an sawi lo.

⁹Tin, ni sarih ni hmasa ber zînga a thawhleh chuan Mari Magdalini, a kawchhûng ata ramhuai pasarih a hnawh chhuaha hnênah khân a inlâr hmasa ber a.

¹⁰Tin, ani chu Isua awmpui ṭhinte hnênah a va kal a, mitthi ngaia an ṭap lai chu a hrilh ta a.

¹¹Nimahsela, anni chuan a nung leha, hmuh pawh a hmu tih an hre na a, an awih si lo.

¹²Tin, chumi hnuah chuan an zînga mi pahnih ram lam pana an kal laiin, hmêl danglam puin an hnênah a inlâr leh a.

¹³Tin, anni chuan zirtîr dangte an va hrilh a, anni thu pawh chu an awih chuang lo.

¹⁴Tin, chumi hnu lehah chuan, chaw an kîl laiin sâwm leh pakhatte hnên ngeiah a inlâr a, a thawhleh hnua a hmutute thu chu an awih loh avângin, an rin loh leh an thinlung sak kawngah chuan a zilhhau ta a.

¹⁵Tin, an hnênah, “Khawvêl zawng zawngah kal ula, thil siam zawng zawng hnênah chuan Chanchin Ṭha hi hril rawh u.

¹⁶A ringa baptisma chang chu chhandamin an awm ang a; a ring lo erawh chu thiam loh changin an awm ang.

¹⁷Tin, hêng chhinchhiahnate hian ringtute chu a zui zêl ang: a hmingin ramhuaite an hnawt chhuak ang a; ṭawng thartein an ṭawng ang a;

¹⁸rûlte kutin an la ang a; thihna tûr eng pawh in mah sela eng mah an ti lo vang a; damlote chungah an kut an nghat ang a, an dam zêl ang,” a ti a.

¹⁹Chutichuan, Lal Isua chu, an hnêna thu a sawi zawh chuan vâna hruai chhohvin a awm a. Pathian ding lamah a han ṭhu ta a.

²⁰Tichuan, anni chu an kal chhuak a, ram tinah thu an hril ta a, Lalpan anmahni a thawhpui a, a zuitu chhinchhiahnate chuan thu chu a tinghet zêl a. Amen.