Read Mizo_Old_version CHANCHIN ṬHA MARKA ZIAK 2 Bible Online

CHANCHIN ṬHA MARKA ZIAK 2 - Mizo_Old_version bible

CHANCHIN ṬHA MARKA ZIAK 2

¹Tin, ni eng emaw zât hnuah Kapernaum khuaa a luh lehin, inah chuan a awm tih thu a lo thang ta a.

²Tichuan, kawngka bulah pawh awmna rêng awm lo khawp hialin mi tam tak an lo awm khâwm ta a; tin, an hnênah thu a hril ta a.

³Tin, zeng pakhat, mi paliina zâwn a hnênah an rawn hruai a.

⁴Tin, mipui avânga a kiang hnaia an lo kal theih loh avângin, a awmna in chung chu an ṭhiat a; tin, an reh pawh zawhin, a âwngphah chu a chunga mi zeng mu chawp chuan an zuk thlâk a.

⁵Tichuan, Isuan an rinzia chu a lo hmuhin zeng hnênah chuan, “Ka fa, i sualte ngaihdam a ni tawh e,” a ti a.

⁶Tin, lehkhaziaktu ṭhenkhatte chu chutah chuan an ṭhu a,

⁷“He mi hian engati nge hetiang thu hi a sawi ni? Pathian a sawichhia a nih hi; mi pakhat, Pathian chauh lo chuan, tuin nge sualte ngaidam thei ni?” tiin an thinlungin an ngaihtuah a.

⁸Tin, Isuan an rilruin chutiangin an ngaihtuah tih a rilruin a lo hre ta nghâl a, an hnênah, “Chûng thu chu engati nge in thinlunga in ngaihtuah ni?

⁹Zeng hnênah hian, ‘I sualte ngaihdam a ni tawh,’ tih leh, ‘Tho la, i âwngphah la la, kein kal tawh rawh,’ tih hi a eng nge sawi awl zâwk?

¹⁰Eng pawh ni sela, khawvêlah Mihring Fapain sual ngaihdam theihna a nei tih in hriat nân, (zeng hnênah chuan)

¹¹‘Tho la, i âwngphah la la, i inah kal rawh,’ ka ti a che,” a ti a.

¹²Tichuan, ani chu a tho va, a âwngphah chu a la ta nghâl a, an zaa hmuhah chuan a kal chhuak ta a; chutichuan, an zain mak an ti hle a, “Hetiang rêng rêng hi kan la hmu ngai lo,” tiin Pathian an fak ta a.

¹³Tin, a chhuak leh a, dîl kamah chuan a kal ta a; tin, mipui zawng zawng chu a hnênah an va kal a, a lo zirtîr ta a.

¹⁴Tin, a kal pahin Levia, Alphaia fapa chu chhiah chawina hmuna ṭhu a hmu a, a hnênah, “Mi rawn zui rawh,” a ti a. Tin, a tho va, a zui ta a.

¹⁵Tin, heti hi a ni a, Isua chuan Levia inah chuan chaw a kîl a, chhiahkhawntute leh mi sual tam takin Isua leh a zirtîrte chu an kîlpui hlawm a: an tam hle si a, amah chu an zui ve bawk ṭhîn a.

¹⁶Tin, Pharisaite zînga lehkhaziaktute chuan, Isuan mi sual leh chhiahkhawntute a kîlpui an hmuhin, a zirtîrte hnênah chuan, “Engtizia nge chhiahkhawntute leh mi sualte hnênah a eia a in le?” an ti a.

¹⁷Tin, Isuan chu chu a lo hria a, an hnênah chuan, “Mi chakte chuan dâktawr an ngai lo va, mi bawrhsâwmte zâwkin an ngai a ni; mi fel takte lam tûra lo kal ka ni lo va, mi sualte zâwk lam tûra lo kal ka ni,” a ti a.

¹⁸Tin, Johana zirtîrte leh Pharisaite chuan chaw an nghei a; tin, mi an lo kal a, Isua hnênah chuan, “Engati nge Johana zirtîrte leh Pharisai zirtîrten chaw an nghei ṭhina, i zirtîrte lêmin an nghei ve ṭhin loh?” an ti a.

¹⁹Isuan an hnênah, “Mo hruaitute hnênah a pasal tûr chu a awm chhûng zawng, mo hruaitute chuan chaw an nghei thei em ni? A pasal tûr chu an hnêna a awm chhûng zawng an nghei thei lo vang.

²⁰Nimahsela, a pasal tûr chu an hnên ata hruai bo nite a la thleng ang a, chumi niah erawh chuan an la nghei ang.

²¹“Tu mân puan hlui, puan la thlâk mar loh themin an bel ngai lo; bel ang sela, a bel phuina tûr chuan a kai ṭet zâwk ang a, a thar chuan a hlui chu a kai ṭêt ang a, a lo thlêr nasa lehzual ang.

²²Tin, tu mân uain thar, savun uain peng hluiahte an thun ngai lo; thun ang sela, uain chuan savun pengte chu a tâwn puak ang a, uain leh savun pengte chu a boral ve ve ang; uain thar chu savun uain peng tharahte an thun zâwk ṭhîn a ni,” a ti a.

²³Tin, heti hi a ni a, Isua chu Chawlhniah chuan buh hmunahte a kal tlang a; tin, a zirtîrte chuan an kal pahin buhvuite chu an thliak a.

²⁴Tin, Pharisaite chuan a hnênah, “En teh, engati nge Chawlhnia tih thiang lo chu an tih ni?” an ti a.

²⁵Tin, ani chuan an hnênah, “Davida leh a ṭhiante an tlâkchhama, an rilṭâm laia a thiltih kha in chhiar lo vem ni?

²⁶Khatia Abiathara puithiam lalber a nih laia, Pathian ina a luha, puithiamte chauh lo chuan ei thian loh chhangdah chu a eia, a ṭhiante hnêna a pêk ve thu kha?” a ti a.

²⁷Tin, amah vêkin an hnênah chuan, “Chawlhni hi mihring tâna siam a ni a, mihring hi Chawlhni tâna siam a ni lo;

²⁸chutichuan, Mihring Fapa hi Chawlhni chungah lam pawh hian lal a ni,” a ti a.