Read Mizo_Old_version CHANCHIN ṬHA MARKA ZIAK 4 Bible Online

CHANCHIN ṬHA MARKA ZIAK 4 - Mizo_Old_version bible

CHANCHIN ṬHA MARKA ZIAK 4

¹Tin, dîl kamah chuan a zirtîr leh ta a. Tin, mipui tam tak mai a hnênah an rawn inkhâwm a; chutichuan, dîlah chuan lawngah a chuang a, a ṭhu a; mipuiho zawng zawng chu dîl kama khawmualah chuan an awm a.

²Tin, tehkhin thuin thu tam tak a zirtîr a; a zirtîrnaah chuan an hnênah,

³“Ngaithla ula, en teh u; buh chi thehtu buh chi thehin a feh a;

⁴tin, heti hi a lo ni a, a theh laiin a ṭhen kalkawng dungah a tla a, savaten an rawn tlân zo ta a.

⁵Tin, a ṭhen pialtlêp chung lei pan hmunah a tla a; lei a chhah loh avangin a ṭo ta nghâl a;

⁶nimahsela, ni a lo tlângsân deuhvin em vuaiin a lo awm a, zung a neih loh avângin a râwp ta mai a.

⁷Tin, a ṭhen hnimhlîngnei zîngah a tla a, hnim chu a lo ṭo sâng a, a dîp ral ta a, rah rêng rêng a rah ta lo va.

⁸Tin, a ṭhen lei ṭhaah a tla a, a ṭo va, a ṭhang lian a, a rah ta a; sawmthum te, sawmruk te, za tein a pung ta hlawm a,” a ti a.

⁹Tin, amah vêkin, “Tu pawh hriatna tûra beng nei chuan hre rawh se,” a ti a.

¹⁰Tin, fianriala a awm laiin sâwm leh pahnihte leh a ṭhuihruai dangte chuan tehkhin thute chu an zâwt fiah a.

¹¹Tin, ani chuan an hnênah, “Pathian ram thurûk chu nangni hriat zawng phal a ni a, pâwna mite tân erawh chuan engkim tehkhin thua tih a ni;

¹²chutichuan, ‘Hmuh zawng an hmu thei na a, hriat erawh chu an hriat theih lohna tûr leh, beng zawngin an hre thei na a, a ngaihna erawh chu an hriat theih lohna tûrin; chuti lo chuan, an hawi kîr leh ang a, ngaihdam an lo ni hlauh dah ang e,’ ” a ti a.

¹³Tin, amah vêkin an hnênah chuan, “He tehkhin thu hi in hre thei lo maw? Chuti a nih chuan, engtin nge tehkhin thu dang zawng zawngte chu in hriat hleih ang?

¹⁴Buh chi thehtu chuan thu chu a theh a ni.

¹⁵Tin, kawng dunga thu thehnate chu hêng hi an ni: thu an hriat veleh Setana chuan an rilrua thu theh chu a lâksak nghâl ṭhîn.

¹⁶Tin, chutiang bawkin pialtlêp chunga theh chu hêng hi an ni: thu an hriat veleh lâwm taka pawm nghâlte hi;

¹⁷nimahsela, anmahniah chuan zung rêng an nei lo va, rei lo tê chauh an awm a; chumi hnuah chuan thu avânga hrehawmna emaw, tihduhdahna emaw a lo awm veleh an tlu nghâl mai ṭhîn.

¹⁸Tin, mi dangte chu hnimhlîngnei zînga theh chu an ni a; chûngte chuan thu chu an hre tawh a;

¹⁹nimahsela, khawvêl lungkhamnate, hausakna bumnate, thil dang châknate chu a lo luhin, thu chu a dîp a, rah lovin a lo awm ṭhîn.

²⁰Tin, lei ṭhaa theh chu hêng hi an ni: thu chu hriaa, pawma, a leh sawmthum te, a leh sawmruk te, a leh za tea rahte hi an ni,” a ti a.

²¹Tin, amah vêkin an hnênah chuan, “Khâwnvâr chu a dahnaa dah lova, hrai hnuaiah emaw, khum hnuaiah emaw dah tûrin an rawn la ngai em ni?

²²Puan loh tûra zêp eng mah a awm lo va, lang lo tûra thuhrûk eng mah a awm hek lo.

²³Tu pawhin hriatna tûra beng an neih chuan hre rawh se,” a ti a.

²⁴Tin, amah vêkin an hnênah chuan, “In ngaihthlâk chu eng nge a nih fîmkhur rawh u; in tehna ngai bawkin an tehsak ang che u a, an pe tam zâwk mah ang che u.

²⁵Tu pawh a nei chu an pêk belhchhah ang a; tu pawh a nei lo chu a neih chhun pawh an lâksak ang,” a ti a.

²⁶Tin, amah vêkin, “Pathian ram chu hetiang hi a ni; miin leiah hian chi theh sela,

²⁷zânah muhîlin chhûnah tho ṭhîn sela, chi chu, a zia a hriat lohvin lo ṭiakin lo ṭhang sela; chutiang chu a ni.

²⁸Lei hian amahin rah a rawn chhuah ṭhîn; a tîr berah a kûng, chumi hnuah chuan a vui; tin, chumi hnu lehah a vuiah chuan buh fang pum chu.

²⁹Nimahsela, rah chu a lo hmin hunin, buh lâk a lo hun tâk avângin favah chu a phawrh nghâl ṭhîn,” a ti a.

³⁰Tin, amah vêkin, “Pathian ram chu engtin nge kan tehkhin ang? A nih loh leh, eng tehkhin thuin nge kan tehkhin ang?

³¹Anṭam chi fang khat leia an thehin, leia chi zawng zawng aiin tê ber mah sela,

³²a theh hnuah erawh chuan a lo ṭiak a, thlai zawng zawng aiin a lo lian ta zâwk a, zâr lian tak takte a lo nei a; chutichuan, chunglêng savate chu a bukah chuan an riak thei ṭhîn; chutiang chu a ni,” a ti a.

³³Tin, chutiang tehkhin thu tam tak chuan an hriat theih tâwk tâwkin thu chu an hnênah a sawi ṭhîn a.

³⁴Nimahsela, tehkhin thu lovin an hnênah thu a sawi ngai lo; a zirtîrte hnênah erawh chuan fianrialah engkim a hrilhfiah ṭhîn a ni.

³⁵Tin, chumi ni vêkah chuan, khua a lo tlai lamin ani chuan an hnênah, “Râl lehlamah sâwn i kai ang u,” a ti a.

³⁶Tichuan, mipuite chu kalsanin, amah chu a awm pângngai ang chuan lawngah chuan an kalpui ta nghâl a. Lawng dangte pawh a hnênah a awm a.

³⁷Tin, thlipui nasa tak a lo tleh a, tuifâwnte chu lawngah chuan a fâwn lût hlawp hlawp a; chutichuan, lawng chu a lo khat dâwn ta mai a.

³⁸Tin, ani chu lukham chu khama muhîlin, lawng mei lamah chuan a awm a. Tin, an kaitho va, a hnênah chuan, “Zirtîrtu, kan boral hi pawi i ti lo vem ni?” an ti a.

³⁹Tin, ani chu a lo harh a, thli chu a hau va, dîl hnênah pawh chuan, “Ngawi la, awm hle hle rawh!” a ti a. Tin, thli chu a bâng a, a lo reh ta ṭhuap mai a.

⁴⁰Tin, ani chuan an hnênah, “Engati nge chuti êma in hlauh ni le? Rinna rêng in la nei lo a ni maw?” a ti a.

⁴¹Tin, hlauh namênin an hlau ta lo va, “He mi hi tu nge ni le, thli leh dîl lam pawhin a thu an awih hi?” an ti hlawm a.