Read Mizo_Old_version CHANCHIN ṬHA MARKA ZIAK 6 Bible Online

CHANCHIN ṬHA MARKA ZIAK 6 - Mizo_Old_version bible

CHANCHIN ṬHA MARKA ZIAK 6

¹Tin, chuta ta chu a chhuak a, a awmna khaw lam chu a thleng ta a; a zirtîrte chuan an zui zêl a.

²Tin, Chawlhni a lo ni a, inkhâwmna inah a zirtîr ta a; tin, mi tam tak a thu hriate chuan, “He mi hian hêng thute hi khawi ata nge a hriat ni? He mi hnêna finna pêk hi eng finna nge ni? A kutin heti kauva thil mak a tih hi engtizia nge ni?

³He mi hi Mari fapa, Jakoba te, Josea te, Juda te, Simona te unaupa, thingrem siamtu kha a ni lo vem ni? A farnute pawh hetah kan hnêna awm an ni lo vem ni?” an ti a, mak an ti hle a. Tichuan, a chungah an lungni ta lo va.

⁴Tin, Isuan an hnênah, “Zâwlnei chu ama khaw lamah te, ama laichîn zîngah te, ama inah te chauh lo chuan chawimawi lohvin a awm ngai lo,” a ti a.

⁵Tin, mi damlo tlêm te chunga kut nghata a tihdam chauh lo chu, chutah chuan thil mak rêng a ti thei lo va.

⁶An rin loh avângin mak a ti hle a. Tin, zirtîr chung zêlin khuate chu a fang vêl a.

⁷Tin, sâwm leh pahnihte chu a ko va, pahnih zêlin a tîr chhuak ta a; ramhuai bawlhhlawhte chunga thuneihna a pe bawk a.

⁸Tin, an zinna atân tiang chauh lo chu eng mah - chhang pawh, iptê pawh, an kâwnghrêna tangka pawh - ken loh tûr a ti tlat a;

⁹pheikhawk erawh chu bun tûr a ti a; “Kawr pahnih ha suh u,” a ti bawk a.

¹⁰Tin, amah vêkin an hnênah, “Khawiah pawh in thlenna inah chuan, chuta ta in chhuah hma loh chu thleng reng ang che u.

¹¹Tin, khawii khua pawhin an lawm loh che ua, in thu an ngaihthlâk lohna apiangah, chuta ṭanga in chhuah hun chuan, anmahni hriattîrna tûrin, in kephah hnuaia vaivut kai chu thing thla ang che u,” a ti a.

¹²Tichuan, an kal chhuak a, simna tûr thu an hril a;

¹³ramhuai tam tak an hnawt chhuak a; Tin damlo tam tak chu hriak an hnawih a, an tidam bawk a.

¹⁴Tin, Lal Heroda chuan a lo hria a, a hming chu a lo thang ta si a; “Baptistu Johana kha mitthi zîng ata a lo tholeh ta a; chuvângin, chûng thiltihtheihnate chuan amahah a thawk a nih chu,” a ti a.

¹⁵Mi dang erawh chuan, “Elija a nih chu,” an ti a; mi dangin, “Zâwlnei a nih chu, zâwlneite zînga pakhat ang kha,” an ti a.

¹⁶Heroda erawh chuan a lo hriatin, “Johana, a lu ka tana ngei kha, a lo tholeh ta a nih chu,” a ti a.

¹⁷Heroda ngei chuan a unau Philipa nupui Herodi avângin mi a tîr chhuak a, Johana chu a mantîr a, tân inah phuar chungin a lo khung tawh si a; Herodi chu nupuiah a lo nei tawh si a;

¹⁸Johana chuan Heroda hnênah, “I unau nupui i neihsak hi a thiang lo a ni,” a lo ti tawh bawk a ni.

¹⁹Chuvângin, Herodi chuan amah chu a hal riau va, tihhlum a châk a; nimahsela, a thei si lo va.

²⁰Herodan Johana chu mi fel leh thianghlim tak a ni tih a hriat avângin amah chu a hlau va, a humhim tlat si a; a thu a ngaihthlâk chuan a mangang hle ṭhîn a; nimahsela, lâwm takin a ngaithla si ṭhîn.

²¹Tin, Herodan a pian champhaphâk niah chuan a mi ropuite, sipai hotu lianhote, Galili rama mi lianhote tâna zâna ruai a ṭheh laiin hun remchâng a lo awm ta a.

²²Herodi fanu ngei chu a lo lût a, a lâm a, Heroda leh a chaw kîlpuite chu a tilâwm ta a; tichuan, lal chuan hmeichhe naupang hnênah chuan, “I duh apiang mi dîl rawh, ka pe ang che,” a ti a.

²³“Eng pawh mi dîl apiang chu, ka ram chanve hial pawh ka pe ang che,” tiin a hnênah chhia a chham bawk a.

²⁴Tin, ani chu a chhuak a, a nu hnênah chuan, “Eng nge ka dîl ang?” a va ti a. Tin, ani chuan, “Baptistu Johana lu le,” a lo ti a.

²⁵Tin, ani chu hmanhmawh takin lal hnênah chuan a va lût ta nghâl a, “Thlêngin Baptistu Johana lu i mi pêk nghâl ka duh a ni,” tiin a dîl a.

²⁶Tin, lal chu a lungngai ta êm êm mai a; nimahsela, a chhechhamte leh a chaw kîlpuite avâng chuan a lo hnial duh lo va.

²⁷Tin, lal chuan a vêngtu sipai pakhat a tîr ta nghâl a, a lu rawn lâk tûr thu a pe a. Tin, ani chuan tân inah chuan a lu a va tan a,

²⁸a lu chu thlêngin a rawn la a, hmeichhe naupang hnênah chuan a pe a; tin, hmeichhe naupang chuan a nu hnênah a pe a.

²⁹Tin, a zirtîrte chuan an hriat veleh a ruang chu an va hlâwm a, thlânah an zalh ta a.

³⁰Tin, tirhkohte chu Isua hnênah an rawn inkhâwm a, engkim, an thiltih apiang leh an zirtîr apiang an hrilh a.

³¹Tin, ani chuan an hnênah, “Nangmahniho ngawtin thlalêr hmunah a hrangin lo kal ula, châwl rih rawh u,” a ti a. (Mi tam tak an insûl zut zut a, chaw takngial pawh an ei hman si lo va.)

³²Tichuan, thlalêr hmun panin lawngin an va kal hrang ta a.

³³Tin, miten an kal lai chu an hmu a, mi tam takin anmahni chu an hria a, khaw tin ata chutah chuan kein an tlân khâwm a, an lo lehkhalh ta a.

³⁴Tichuan, ani chu vaukama a chhuah chuan mipui tam tak a hmu a, vêngtu nei lo berâmte ang an nih avângin a khawngaih ta êm êm a, thu tam tak a zirtîr ta a.

³⁵Tin, khua chu a lo tlai ta hle a, zirtîrte chu a hnênah an lo kal a, “Hei hi thlalêr hmun a ni a, khua pawh a tlai tawh si a;

³⁶anniho hi kan kiang vêl lovah leh khuaahte kalin, an ei tûr eng emaw tal an lei theih nân kaltîr ta che,” an ti a.

³⁷Ani erawh chuan an hnênah, “Nangmahnin ei tûr pe rawh u,” tiin a chhâng a. Tin, anni chuan a hnênah, “Chhang duli zahnih man va leiin ei tûr kan pe em ni ang?” an ti a.

³⁸Tin, ani chuan an hnênah, “Chhângpêr eng zât nge in neih, han en teh u,” a ti a. Tin, an neih chin an hriat veleh, “Panga, sangha pahnih nên,” an ti a.

³⁹Tin, ani chuan an vaiin hlobet hring chungah chuan, a pâwl zêla ṭhuttîr tûrin an hnênah thu a pe a.

⁴⁰Tin, a tlarin za te, sawmnga te zêlin an ṭhu ta hlawm a.

⁴¹Tin, ani chuan chhangpêr panga leh sangha pahnih chu a la a, vân lam enin mal a sâwm a, chhangpêrte chu a phel a, an hmaa hlui tûrin a zirtîrte hnênah chuan a pe a; sangha pahnih pawh chu mi zawng zawng zîngah a sem bawk a.

⁴²Tin, an vaiin an ei a, an puar ta hlawm a.

⁴³Tin, chhang nawi leh sangha nawite chu bâwmrâng sâwm leh pahnih an rût khat a.

⁴⁴Chhangpêr eitute chu patling hlîr pawh sângnga an ni.

⁴⁵Tin, amah ngeiin mipui chu a ṭîntîr vêl chhûngin, râl lehlama Bethsaida khuaa lo kal hmasa tûrin a zirtîrte chu lawngah a chuan luihtîr ta nghâl a.

⁴⁶Tin, anni chu a ṭîntîr hnu chuan ṭawngṭai tûrin tlângah chuan a kal ta a.

⁴⁷Tin, khua a lo tlai lamin, lawng chu dîl lai takah chuan a lo awm a, ani chu amah chauhvin khawmualah chuan a awm a.

⁴⁸Tin, an lawng karah chuan an mangangin a hmu a (thliin a ni lo lamah a nem si a) khawfîngchah dâwn lai vêlin dîl chungah kea kalin an lam a rawn pan a; anmahni kal pelh a tum a.

⁴⁹Nimahsela, anni chuan amah chu dîl chunga kea a kal an han hmuh chuan hmuithla emaw an ti a, an au ta vak mai a,

⁵⁰an vaiin amah an hmu a, an thlaphâng hle a. Nimahsela, ani chuan anmahni a be ta nghâl a, an hnênah, “Thlamuang takin awm rawh u; keimah ka ni alâwm, hlau suh u,” a ti a.

⁵¹Tin, lawngah chuan an hnênah a chuang chho ve ta a, thli chu a bâng ta mai a. Tin, mak chu an ti rilru hle a;

⁵²chhang thu chu a ngaihna an hrethiam si lo va, an thinlung a sak si a.

⁵³Tin, râl lehlam an kai chuan Gennesaret ram khawmual an thleng a, vaukamah chuan lawng chu an thlung a.

⁵⁴Tin, lawng ata an chhuah hnu chuan miten ani chu an lo hre ta nghâl a,

⁵⁵chumi ram vêl zawng zawngah chuan an tlân ta sup sup a, a awm tih an hriatna apiangah, damlote an âwngphaha mu chungin an zâwn vêl ta ruai a.

⁵⁶Tin, khaw têah te, khaw lianah te, lovah te, khawiah pawh a luhna apiangah damlote chu dâwr hmunahte an muttîr hlawm a, a puan hmâwr tal deh theih an dîl chiam a; tin, amah dek apiang chu an dam ta zêl a.