Read Mizo_Old_version CHANCHIN ṬHA LUKA ZIAK 1 Bible Online

CHANCHIN ṬHA LUKA ZIAK 1 - Mizo_Old_version bible

CHANCHIN ṬHA LUKA ZIAK 1

¹Kha thil kan zînga lo thleng, a tîr ata a hmutute leh thu rawngbâwltuten keimahni min hrilh ang khân, mi tam takin ziak an tum ta a;

³chuvângin, Theophil ṭha ber, a bul ata engkim fel takin ka chhui a, indawt zêlin i tân ziak ila a ṭha ang, ka ti a ni;

⁴hmâna thu an zirtîr che kha dik tak a ni tih i hriat theih nân.

⁵Judai ram lal Heroda a dam laiin, Abija pâwla mi a hming Zakaria, puithiam pakhat a awm a; chu mi chuan Arona thlah zînga mi nupuiah a nei a, a hming chu Elizabeti a ni.

⁶An pahnihin Pathian mit hmuhin fel takin an awm a, sawisêl bovin, Lalpa thupêk leh a dân zawng zawng zâwmin an awm ṭhîn.

⁷Nimahsela, Elizabeti a chin avângin fa an nei lo, an pahnihin upa tak an ni si a.

⁸Tin, heti hi a ni a, a pâwlte tih dân ang zêla Pathian hmaa puithiama a chêt laiin,

⁹puithiam dân angin Lalpa biak ina luh leh englo rimtui hâl a chang a.

¹⁰Tin, englo rimtui hâl hun laiin mipui chu an zain pâwnah an ṭawngṭai a.

¹¹Tin, Lalpa vântirhkoh pakhat, englo rimtui hâlna maichâm ding lama dingin a hnênah a inlâr a.

¹²Tin, Zakarian a hmuh veleh a mangang a, hlauh pawh a hlau va.

¹³Nimahsela, vântirhkoh chuan a hnênah, “Zakari, hlau suh, i dîl kha a hria asin, i nupui Elizabetin fapa a hrinsak ang che, a hmingah Johana i sa tûr a ni.

¹⁴Tin, nang i hlimin i lâwm ang a; amah a pianin mi tam tak an lâwm bawk ang.

¹⁵Lalpa ngaihin mi lian a ni ang a, uain leh zu rêng reng a in lo vang; a nu pum chhûng aṭang rêngin Thlarau Thianghlimin a lo khat ang.

¹⁶Israela thlahte tam tak Lalpa an Pathian hnên lamah a hawitîr leh ang.

¹⁷Tin, pate thinlung chu fate lama hawitîr tûr te, mi tihmawhte chu mi fel tak finna lama hawitîr tûr te, Lalpa tâna mi lo inpeih tûr tea buatsaih tûrin, Elija rilru leh a thiltihtheihna puin Lalpa hmaah a kal ang,” a ti a.

¹⁸Tin, Zakarian vântirhkoh hnênah chuan, “Chu chu engtin nge ka hriat ang? Kei putar ka ni a, ka nupui pawh pitar a ni si a,” a ti a.

¹⁹Tin, vântirhkoh chuan a chhâng a, a hnênah, “Gabriela, Pathian hmaa ding ṭhîn ka ni a; a be tûr che leh, chûng thu ṭha chu hrilh tûr chein rawn tirh ka ni.

²⁰Ngai rawh, ka thusawite a hun taka lo thleng tûr chu i awih loh avângin, chûng thil chu a lo thlen hma loh zawng i ngawi reng ang a, ṭawng pawh i ṭawng thei lo vang,” a ti a.

²¹Tin, vântlângho chuan Zakaria chu an lo nghâk a, Pathian biak in chhûnga a awm rei avâng chuan mak an ti hle a.

²²Tin, a lo chhuah chuan an hnênah thu a sawi thei ta lo va; tichuan, biak inah thlarau inlâr a hmu a ni tih an hre ta a; tin, an hnênah a zaizir fo va, ṭawng thei lovin a awm ta reng a.

²³Tin, heti hi a ni a, a rawngbâwlna hun ni bi chu a kim veleh a inah a haw ta a.

²⁴Tin, chumi hnuah chuan a nupui Elizabeti chu a lo rai ta a, “Mi hnêna ka hmingchhia chhilh nân Lalpan duhsak takin heti hian mi tihsak ta,” tiin thla nga a biru a.

²⁵

²⁶Tin, a thla ruknaah chuan Pathianin vântirhkoh Gabriela chu Galili rama khaw pakhat, Nazareth an tihah chuan nula thianghlim pakhat hnênah a tîr a,

²⁷chu nula chu Davida thlaha mi, a hming Josefa nupui hual a ni a; nula hming chu Mari a ni.

²⁸Tin, vântirhkoh chu a hnênah a lût a, “Chibai, voh bîk! Lalpa i hnênah a awm,” a ti a.

²⁹Tin, chumi thu avâng chuan a mangang ta êm êm a, “Engtiziaa chibai mi bûk nge ni ang?” tiin a inngaihtuah a.

³⁰Tin, vântirhkoh chuan a hnênah, “Mari, hlau suh; Pathian ngaihsak zâwng i ni e.

³¹Ngai rawh, i rai ang a, fapa i hring ang a, a hmingah chuan ISUA i sa tûr a ni.

³²Ani chu mi lian a la ni ang a, Chungnungbera Fapa an la ti ang; Lalpa Pathianin a hnênah a thlahtu Davida lalṭhutphah chu a pe ang a;

³³Jakoba thlahte chungah chatuanin a lal ang a, a ramin kin ni a nei lo vang,” a ti a.

³⁴Tin, Marin vântirhkoh hnênah chuan, “Chûng chu engtin nge ni ang? Mipa ka nei si lo,” a ti a.

³⁵Tin, vântirhkoh chuan a chhâng a, a hnênah, “Thlarau Thianghlim i chungah a lo thleng ang a, Chungnungbera thiltihtheihnain a hliahkhuh ang che; chuvângin, mi thianghlim lo piang tûr pawh chu Pathian Fapa an ti ang.

³⁶Tin, ngai teh, i laichînnu Elizabeti pawhin a tar hnuin mipa a pai ta; a ching an tih ṭhin kha, tûn thla hi a thla rukna a ni tawh.

³⁷Pathian thuchhuak rêng rêng thiltithei lovin a awm lo vang,” a ti a.

³⁸Tin, Marin “Ngai teh, Lalpa bawihnu ka ni, i thu ang zêlin ka chungah thleng rawh se,” a ti a. Tin, vântirhkoh chuan a kalsan ta a.

³⁹Chûng lai chuan Mari chu a tho va, thingtlângah, Judai rama khaw pakhatah chuan a kal ta thuai a;

⁴⁰tin, Zakaria inah a lût a, Elizabeti chu chibai a bûk a.

⁴¹Tin, heti hi a ni a, Elizabetin Mari chibai bûk chu a hriat veleh, a pum chhûnga nautê chu a che a; tin, Elizabeti chu Thlarau Thianghlimin a lo khat ta a;

⁴²tin, aw ring takin a au va, “Nang chu hmeichhia azawnga engthâwl i ni, i rîla rah pawh a engthâwl a ni.

⁴³Ka Lalpa nu, ka hnêna i lo kal hi engtizia nge ni le?

⁴⁴Ngai teh, i chibai bûk thâwm ka benga a luh veleh, a lâwm avângin nautê ka pum chhûngah a che a ni.

⁴⁵A ring nu pawh a eng a thâwl a ni, a hnêna Lalpan thu a sawi kha a thleng dâwn si a,” a ti a.

⁴⁶Tin, Marin, “Ka nunin Lalpa a chawimawi e,

⁴⁷Ka thlarau pawh mi chhandamtu Pathian chungah a lâwm ta êm êm a.

⁴⁸A bawihnu hnam tlâwmzia a hmu a, a khawngaih a; Ngai rawh, tûn achinah ṭhangthar zawng zawngin nihlawh mi ti dâwn a ni.

⁴⁹Mi chak khân ka chungah thil ropui tak mi tihsak a, A hming pawh a thianghlim a ni.

⁵⁰A ṭihtute chu ṭhangthar thlengin a khawngaih zêl ṭhîn.

⁵¹A bânin a tha chakzia a entîr a, Mi chapote chu an inngaihtuahnain a tidarh ta a.

⁵²An ṭhutphaha lal ṭhute chu a hnûk thla a, Hnam tlâwmte chu a chawimawi ta a.

⁵³Rilṭâmte chu thil ṭha takin a tipuar a, Hausate chu kutruakin a kal botîr ta a.

⁵⁴Kan thlahtute hnêna a sawi ang khân,

⁵⁵Abrahama leh a thlahte chu chatuana a khawngaih tûrzia hriat reng nân, A chhiahhlawh Israel-te chu a chhawmdâwl ta a,” a ti a.

⁵⁶Tin, Mari chu thla thum lai a hnênah a awm a; tin, a in lamah a haw leh ta a.

⁵⁷Tin, Elizabeti nau hrin chu a lo hun ta a; tichuan, fapa a rawn hring a.

⁵⁸Tin, a vêngte leh a laichînte chuan Lalpan a khawngaih êm êm tih an lo hria a, an lawmpui a.

⁵⁹Tin, heti hi a ni a, a ni riat niah chuan nausên serh tan tûrin an lo kal a; a hmingah a pa hming vêk Zakaria bawk sak an tum a.

⁶⁰Tin, a nuin, “Ni lo ve, ani zawng Johana sak zâwk tûr a ni,” a ti a, a chhâng a.

⁶¹Tin, annin a hnênah, “I laichînte zîngah he hming pu hi tu mah an awm hlei nêm,” an ti a.

⁶²Tin, a pa hnênah chuan zaizirin, “A hmingah eng nge sa ila i duh?” an ti a.

⁶³Tin, lehkha ziakna phêk a dîl a, “A hming Johana a ni e,” tiin a ziak a. Tin, an zain mak an ti hle a.

⁶⁴Tin, chawplehchilhin a kâ leh a lei chu a lo inphelh a, Pathian fakin a lo ṭawng chhuak ta nghâl a.

⁶⁵Tin, an vêla awm zawng zawng chuan an hlau ta a. Tin, chûng thu chu Judai ram thingtlâng zawng zawngah a thang vêl ta a.

⁶⁶Tin, a hria apiangin an rilruah lungkhamah an nei a, “Chu nausên chu engtin tak la awm ang maw?” an ti a; Lalpa kutin amah a ṭanpui si a.

⁶⁷Tin, a pa Zakaria chu Thlarau Thianghlimin a lo khat a, a sawi lâwk a:

⁶⁸“Lalpa, Israela Pathian chu fakin awm rawh se, A mite chu a rawn tlawh a, tlanna a siamsak a.

⁶⁹A chhiahhlawh Davida chhûngte zîngah chuan Chhandamna ropui tak min siamsak ta si a.

⁷⁰(Leilung pian tirh ata a zâwlnei thianghlimte kâa a sawi ang khân)

⁷¹Kan dote lakah leh min hawtute zawng zawng laka chhandamna chu;

⁷²Kan thlahtute khawngaih nân leh A thuthlung thianghlim hriat reng nân.

⁷³Kan thlahtu Abrahama hnênah chhia a chham kha,

⁷⁴Kan dote lakah kan hima, Kan dam chhûng zawng a mit hmuha thianghlim leh fel taka awma, Hlau lova a rawng min bâwltîr tûr thu kha.

⁷⁵

⁷⁶“A ni, Taitê, nang hi Chungnungbera zâwlnei an ti ang che; A kawngte siam tûrin Lalpa hmaah i kal dâwn si a;

⁷⁷Kan Pathian thinlunga khawngaihna avângin

⁷⁸An sualte ngaihdam nân, A mite hnênah chhandamna thu hriattîr tûrin. Chumi avâng chuan chung lam aṭangin ni chhuakin min rawn tlawh ang,

⁷⁹Thim zîngah leh thihna hlima ṭhute ên tûr leh Thlamuanna kawnga kan ke pêntîr tûrin,” a ti a.

⁸⁰Tin, nausên chu a lo ṭhang lian deuh deuh va, a rilru lam a lo nghet ta telh telh a, Israel-te hnêna a rawn inlâr hma loh zawng thlalêrah a awm reng a.