Read Mizo_Old_version CHANCHIN ṬHA LUKA ZIAK 10 Bible Online

CHANCHIN ṬHA LUKA ZIAK 10 - Mizo_Old_version bible

CHANCHIN ṬHA LUKA ZIAK 10

¹Tin, chumi zawhah chuan Lalpan mi dang sawmsarih a ruat a, a kalna tûr khaw tinah leh hmun tinah, a hmaah pahnih zêlin a tîr a.

²Tin, an hnênah, “Buh seng tûr a tam hle a; nimahsela, a thawktute an tlêm; chutichuan, a buh seng tûra thawktu tûrte tîr tûrin buh Neitupa hnênah chuan ngên rawh u.

³“Kal rawh u; ngai teh u, chinghne zînga berâmno awm angin ka tirh che u hi.

⁴Tangka ip te, iptê te, pheikhawk te keng suh ula, kalkawngah tu mah chibai bûk suh u.

⁵Tin, in luhna in apiangah a hmasa berin, ‘He inah hian thlamuanna thleng rawh se,’ ti ang che u.

⁶Tin, chutah chuan thlamuanna fa a awm chuan, in thlamuanna thu chu a chungah a awm reng ang; a awm loh erawh chuan in chungah a lo kîr leh ang.

⁷Chumi inah chuan awm reng ula, an pêk apiang che u eiin bâr ang che u; hnathawktu chu hlawh hmu tlâk a ni a. In tinah kal lâwr suh ang che u.

⁸“Tin, khua in luhna apiangah an lawm che u chuan, an hlui apiang che u chu ei ang che u;

⁹an khuaa damlo awmte pawh tidam ula, an hnênah, ‘Pathian ram in kiangah a lo thleng ta,’ ti ang che u.

¹⁰Khua in luhna apiangah an lawm loh che u erawh chuan, an kawtthlêrahte kal chhuak ula,

¹¹‘In khaw vaivut kan kephaha kai pawh hi in chungah kan tah fai hi; nimahsela, Pathian ram in kiangah a lo thleng ta tih hi hre rawh u,’ ti ang che u.

¹²Ka ti a che u, chumi niah chuan chumi khuate tuar tûr ai chuan Sodom khaw tuar tûr chu a zia a awm zâwk ang.

¹³“Korazin, i chung a pik e! Bethsaida, i chung a pik e! Nangmahnia thil mak tak tihte kha Tura leh Sidon khuaa tih ni sela, saiip puan sina vut zînga ṭhuin an sim daih tawh ang.

¹⁴Nimahsela, ngaihtuah niah chuan nangni tuar tûr ai chuan Tura leh Sidon khaw tuar tûr chu a ziaawm zâwk ang.

¹⁵Tin, nang Kapernaum, vân thlengin chawimawi i ni dâwn em ni? Mitthi khaw thlenga nam thlâk asin i nih dâwn.

¹⁶“Tu pawh nangni thu ngai chu keima thu ngai a ni e; tu pawh a duh lo che u chu kei mi duh lo a ni e; tu pawh kei mi duh lo chu mi tîrtu duh lo a ni e,” a ti a.

¹⁷Tin, sawmsarihte chu lâwm takin an lo hâwng a, “Lalpa, ramhuaite pawh i hming avângin kan thu thuin an awm,” an ti a.

¹⁸Tin, ani chuan an hnênah, “Ṭêk anga Setana vân aṭanga a lo tla kha ka hmu asin.

¹⁹Ngai teh u, rûlte, khawmualkaikuangte rah theihna thu ka pe che u a; eng mahin a tina tawp lo vang che u.

²⁰Nimahsela, ramhuaite in thu thua an awm avâng hian lâwm suh u; vâna in hming ziak a nih avângin lâwm zâwk rawh u,” a ti a.

²¹Tin, chumi lai tak chuan Isua chu Thlarau Thianghlimah a lâwm êm êm a, “Aw ka Pa, lei leh vân Lalpa, nangin mi fing leh mi bengvârte hnênah hêng thu hi i zêpa, nausênte hnêna i puan avâng hian ka fak a che; a ni, ka Pa, chutiang tih chu i ngaihin a ṭha a ni.

²²Ka Pain engkim mi kawltîr tawh, Fapa chu tu nge a nih, Pa lo chuan tu mân an hre lo; Pa pawh chu tu nge a nih, Fapa leh an hnêna Fapain a puan duhnate chauh lo chuan tu mân an hre lo,” a ti a.

²³Tin, zirtîrte lam a hawi a, a rûkin, “In thil hmuhte hi a hmuhna mitte chu a vânnei e!

²⁴Ka ti a che u, zâwlnei tam tak leh lal tam takte pawhin in thil hmuhte hi hmuh an châk ṭhîn a; nimahsela, an hmu si lo; benga in hriatte pawh hi hriat an châk ṭhîn a; nimahsela, an hre si lo a ni,” a ti a.

²⁵Tin, ngai teh, dân hretu tu emaw a ding a, amah fiah nân, “Zirtîrtu, chatuana nun neihna tûrin engtin nge ka tih ang?” a ti a.

²⁶Tin, ani chuan a hnênah, “Dân lehkhabuah eng nge inziak ni? Chutah chuan eng nge i chhiar ṭhin?” a ti a.

²⁷Tin, ani chuan, “ ‘Lalpa i Pathian chu i thinlung zawng zawngin, i thlarau zawng zawngin, i chakna zawng zawngin, i rilru zawng zawngin i hmangaih tûr a ni,’ ‘Nangmah i inhmangaih angin i vêngte pawh i hmangaih tûr a ni,’ tih hi,” a ti a, a chhâng a.

²⁸Tin, ani chuan a hnênah, “I chhâng dik zet mai e; chutiang chuan ti la, i nung ang,” a ti a.

²⁹Ani erawh chuan thiam inchantîr a tum a, Isua hnênah, “A nih leh, ka vêngte chu tute nge ni?” a ti a.

³⁰Isuan a chhâng a, “Tu emaw Jerusalem khua aṭangin Jeriko khuaah a zuk kal dâwn a, suam hmangte a tâwk hlauh va, chu mite chuan a silhfên an hlihsak vek a, an vaw nek a, thi lek lekin an kalsan ta a.

³¹Tin, puithiam tu emaw chumi kawngah chuan a zuk kal kher a, a hmuh veleh kawng sîr lehlamah a hêl ta mai a.

³²Tin, chutiang bawkin Levia chi mi pakhat pawhin, chumi hmun chu a lo thleng a, a hmuh veleh kawngsîr lehlamah a hêl ve ta mai a.

³³Amaherawhchu, Samari rama mi tu emaw a zin kalin a awmna chu a lo thleng a, a hmuh veleh a khawngaih êm êm a,

³⁴a hnênah a va kal a, a pemahte chuan hriak leh uain a leih a, a tuam a, ama sa chungah a chuantîr a, khualbûkah a kalpui a, a enkawl ta a.

³⁵Tin, a tûkah chuan duli pahnih a phawrh a, khualbûk vêngtu hnênah a pe a, ‘Lo enkawl la, hemi bâka i sên zawng chu ka lo kîr leh hunah ka rawn rûl leh ang che,’ a ti a.

³⁶“Chu mite pathum zîngah chuan, suam hmangho tâwka vêngte chu tu ber nge nia i rin?” a ti a.

³⁷Tin, ani chuan, “A khawngaihtu chu,” a ti a. Tin, Isuan a hnênah, “Nang pawh chu ang bawk chuan va ti ve rawh,” a ti a.

³⁸Tin, an zin pahin khaw engah emaw a lût a; tin, hmeichhe pakhat a hming Marthiin a lo thleng a.

³⁹Chu mi chuan laizâwn pakhat a nei a, a hming chu Mari a ni a, chu mi chu Lalpa ke bulah a ṭhu a, a thu a ngaithla a.

⁴⁰Marthi erawh chu rawngbâwl ngawtin a buai hle a; tichuan, a hnênah a lo kal a, “Lalpa, ka laizâwnnun keimah chauh rawngbâwl tûra mi thlahthlam hi pawi i ti lo vem ni? Mi pui tûrin ti rawh khai,” a ti a.

⁴¹Tin, Lalpan, “Marthi, Marthi, thil tam tak i ngaihtuah a, i buai a nih hi;

⁴²thil pakhat chauh a pawimawh e: Marin chan ṭha chu a thlang a, chu chu lâk sak tûr a ni lo ve,” a ti a, a chhâng a.