Read Mizo_Old_version CHANCHIN ṬHA LUKA ZIAK 11 Bible Online

CHANCHIN ṬHA LUKA ZIAK 11 - Mizo_Old_version bible

CHANCHIN ṬHA LUKA ZIAK 11

¹Tin, heti hi a ni a, Isua khawii hmunah emaw a ṭawngṭai a, a ṭawngṭai zawh chuan a zirtîr pakhatin a hnênah, “Lalpa, ṭawngṭai dân Johanan a zirtîrte a zirtîr ang khân min zirtîr ve ta che,” a ti a.

²Tin, ani chuan an hnênah, “In ṭawngṭai chuan heti hian ti ang che u, ‘Kan Pa, I hming zahawm rawh se. I ram lo thleng rawh se.

³Ni tin kan ei khawpin chaw min pe ang che.

⁴Kan sualte min ngaidam ang che, Keini pawhin kan englo bâte zawng zawng kan ngaidam ṭhîn a ni. Thlêmnaah min hruai lût suh ang che,’ ” a ti a.

⁵Tin, amah vêkin an hnênah, “In zîngan tuin emaw ṭhian nei sela, zanlaiah a hnêna kalin, ‘ṭhiana, chhangpêr pathum mi pûktîr rawh;

⁶ka ṭhian zinin mi rawn tlawh a, a hmaa hlui tûr eng mah ka nei si lo,’ ti sela;

⁷in chhûnga miin, ‘Mi tibuai suh; tûnah zawng kawng khâr a ni a, ka fate pawh ka hnênah khumah an mu tawh a; thovin ka va pe thei lo va che,’ tiin chhâng sela;

⁸ka ti a che u, a ṭhian a nih avângin thovin a va pe lo na a, a dîl ngut ngut avângin thovin a duh zât apiang a va pe ang.

⁹“Chutichuan, ka ti a che u, dîl rawh u; tichuan, an pe ang che u; zawng rawh u; tichuan in hmu ang; kik rawh u; tichuan, an hawnsak ang che u.

¹⁰Tu pawh a dîl apiang chuan an hmu ṭhîn a, tu pawh a zawng chuan an hmu ṭhîn a, tu pawh a kik chu an hawnsak dâwn a ni.

¹¹Nangniho zînga pa hi, a fapain chhangpêr dîl sela, tu nge lung pe ang? A nih leh, sangha dîl sela, tu nge sangha aiah rûl pe ang?

¹²A nih leh, artui dîl sela, khawmualkaikuang a pe ang em ni?

¹³Chutichuan, nangni mi sual mahin in fate thil ṭha pêk nachâng in hriat chuan, in Pa vâna mi chuan a dîltute chu Thlarau Thianghlim a va pe dâwn êm!” a ti a.

¹⁴Tin, Isuan ramhuai ṭawngtheilo pakhat a hnawt chhuak a. Tin, heti hi a ni a, ramhuai chu a chhuah veleh ṭawngtheilova chu a lo ṭawng ta a; tichuan, mipui chuan mak an ti hle a.

¹⁵Nimahsela, a ṭhen chuan, “Ramhuai lal Beelzebula avângin alâwm ramhuaite a hnawh chhuah ṭhin ni,” an ti a.

¹⁶Tin, a ṭhenin amah fiah nân vân ata chhinchhiahna an dîl a.

¹⁷Ani erawh chuan an ngaihtuahte chu a lo hria a, an hnênah, “Khawii ram pawh mahni indo apiang an boral ṭhîn; chhûngkhat pawh mahni indo chu an boral ṭhîn.

¹⁸Setana pawh mahni a indo chuan, a ram engtin nge a din chhuah ang? ‘Beelzebula avângin ramhuaite a hnawt chhuak,’ mi ti si a.

¹⁹Tin, kei hi Beelzebula avânga ramhuaite hnawt chhuak ṭhîn ka lo nih chuan, in faten tu vângin nge an lo hnawh chhuah ṭhin le? Chuvângin, anni chu nangmahni ngaihtuahtu tûrte an ni ang.

²⁰Amaherawhchu, kei hian Pathian kutzung avânga ramhuaite hnawt chhuak ṭhîn ka nih chuan, Pathian ram in hnênah a lo thleng tawh a ni ang.

²¹“Mi chak chuan hriam famkim kenga a in a vên chhûng zawng, a sum chu him takin a awm reng ṭhîn;

²²nimahsela, a aia chak zâwkin a rawn beiha, a hneh hun chuan a inrinna râlthuam famkim chu a chhuhsak a, a sum a lâksak chu a sem darh ṭhîn.

²³Tu pawh ka lama ṭang lo chu mi do a ni; tu pawh mi lâk khâwmpui lo chuan a tidarh a ni.

²⁴“Ramhuai bawlhhlawh chu, mi kawchhûng ata a chhuahin, chawlhna zawngin tui awm lohna hmunahte a vâk a vâk ṭhîn a; tin, chawlhna rêng rêng a hmu lo va, ‘Ka chhuahna inah khân ka kîr leh mai ang,’ a ti a;

²⁵tin, a va thlen chuan phiah faia chei mawiin a hmu a.

²⁶Chu veleh a va kal a, amah aia sual zâwk ramhuai dang pasarih a rawn hruai a, chutah chuan an lût a, an awm reng ṭhîn a; chu mihringa awmze hnuhnûng chu a hmasa aiin a lo ṭha lo zâwk ṭhîn a ni,” a ti a.

²⁷Tin, heti hi a ni a, chûng thute chu a sawi laiin, mipui zîngan hmeichhia tu emaw a lo au chhuak a, a hnênah, “I paina pum chu a hamṭha e, i hnute hnêk pawh,” a ti a.

²⁸Ani erawh chuan, “A ni; nimahsela Pathian thu hriaa zâwmte hi mi hamṭha an ni zâwk e,” a ti a.

²⁹Tin, mipuite chu a hnêna an rawn inkhâwm laiin Isuan, “Tûnlai chhuante hi chhuan sual an ni; chhinchhiahna an zawng a; nimahsela, Jona chhinchhiahna chauh lo chu an hnênah chhinchhiahna rêng rêng pêk a ni lo vang.

³⁰Jona chu Ninevi khuaa mite tân chhinchhiahna a lo ni ang khân, Mihring Fapa pawh tûnlai chhuante tân hian chhinchhiahna a la ni ang.

³¹“Chhim lam lalnu kha, ngaihtuah hunah chuan tûnlai chhuante hnênah hian a tho ve ang a, thiam loh a chantîr ang; Solomona fin ngaithla tûr mahin kâwlkil ata a lo kal si a; ngai teh u, Solomona aia ropui zâwk hetah hian a awm asin.

³²“Ninevi khuaa mite chu, ngaihtuah hunah chuan, tûnlai chhuante hnênah hian an ding ve ang a, thiam loh an chantîr ang, Jona thuhril avângin an sim si a; ngai teh u, Jona aia ropui zâwk hetah hian a awm asin.

³³“Tu mân khâwnvâr an hâlin in hnuai pûkah an dah ngai lo, hrai hnuaiah an dah ngai hek lo, mi lûtte chuan a êng an hmuh theih nân, a dahnaah chuan an dah zâwk ṭhîn a ni.

³⁴“I taksa khâwnvâr chu i mit a ni; i mit a fîm chuan i taksa pawh a pumin a êng chhuak ṭhîn; a chhiat erawh chuan i taksa pawh a thim zo vek ṭhîn.

³⁵Chutichuan, i chhûnga êng awm chu thim a lo ni dah law maw, fîmkhur rawh.

³⁶Chutichuan, taksa hi khawi lai mah thim lova a puma a ên chhuah chuan, khâwnvâr êng nasa takin a ên che angin a êng chhuak vek ang,” a ti a.

³⁷Tin, a sawi laiin Pharisai pakhatin amah chu a hnêna chaw eiah a sâwm a; tichuan, a lût a, chaw a kîl a.

³⁸Tin, Pharisai chuan a chaw kîl chu a hmuhin, chaw ei hmaa kut a sil lo chu mak a ti hle a.

³⁹Tin, Lalpa chuan a hnênah, “Nangni Pharisaite chuan no leh thlêng pâwn lam chu in sil fai ṭhîn tak a; in kawchhûng lam erawh chu hlêprûk leh sualin a khat si a.

⁴⁰Mi âte u, pâwn lam siamtuin chhûng lam pawh a siam lo vem ni?

⁴¹Nimahsela, a chhûnga thil awm chu mi rethei hnêna pêk atân hmang rawh u; tichuan, ngai teh u, in tân engkim a thianghlim tawh a ni.

⁴²“Nangni Pharisaite u, in chung a pik e! Pudina te, pârdi te, thlai tinrêng te sâwma pakhat in pe ṭhîn a, felna leh Pathian hmangaihna chu in ngaihthah si ṭhîn; nimahsela, chûng chu asin in tih tûr ni, a dangte chu tih ṭhulh chuang lovin.

⁴³Nangni Pharisaite u, in chung a pik e! Inkhâwmna inah ṭhutphah tha berte leh, dâwr hmuna chibai bûkte in ngaina si ṭhîn a.

⁴⁴In chung a pik e! Thlân tih hriat loh, a chunga hre lova mi an kal ṭhinna ang chu in ni e,” a ti a.

⁴⁵Tin, dân hretu pakhatin a hnênah, “Zirtîrtu, hêng thu i sawi hi keini pawh min hau i nih hi,” a ti a, a chhâng a.

⁴⁶Tin, ani chuan, “Dân hretute u, nangni pawh in chung a pik e! Thil phurh hrehawm takte mite in bel ṭhîn a, nangni chuan phurte chu in kutzungṭang pakhat pawhin in khawih ngai si lo.

⁴⁷In chung a pik e! Zâwlneiho thlân inte in sa ṭhîn a, in thlahtute thah an ni si a.

⁴⁸Chutichuan, in thlahtute thiltihte chu in hriatpuiin in remtihpui a ni; annin an that a, nangnin an thlân inte in sa si a.

⁴⁹Chuvângin, Pathian finna pawhin, ‘An hnênah zâwlneite leh tirhkohte ka tîr ang a, a ṭhen an that ang a, a ṭhen an tiduhdah ang;

⁵⁰chutichuan, Abela thisen chhuah achin Zekaria, maichâm leh biak in inkâra thia thisen chhuak thleng khân, zâwlnei zawng zawng thisen leilung pian tirh ata chhuak chu, tûnlai chhuante chungah hian phuba an la thei ang,’ a tih kha. A ni, ka hrilh a che u, tûnlai chhuante chungah hian phuba an la ang.

⁵¹

⁵²Nangni dân hretute u, in chung a pik e! Finna chabi chu in kal bopui a; nangni lah in lût si lo va, mi lût tûrte pawh in khap si a,” a ti a.

⁵³Tin, chuta ta a chhuah chuan, lehkhaziaktute leh Pharisaite chuan amah chu an tai ta rân a, thu tinrêng an sawi luihtîr a,

⁵⁴a ṭawng sual hlauhva man tumin an châng reng a.