Read Mizo_Old_version CHANCHIN ṬHA LUKA ZIAK 12 Bible Online

CHANCHIN ṬHA LUKA ZIAK 12 - Mizo_Old_version bible

CHANCHIN ṬHA LUKA ZIAK 12

¹Chutih chhûnga mipui sâng tam tak, inrap nûlh nûlh khawp hial an rawn inkhâwm chuan, Isuan a hmasa berin a zirtîrte hnênah, “Pharisaite dawidim, vervêkna lakah chuan fîmkhur rawh u.

²“Lang lo tûra thuhrûk eng mah a awm lo va, hriat loh tûra zêp rûk eng mah a awm hek lo.

³Chuvângin, thima in sawi apiang kha êngah an la hria ang a; pindan chhûngrila beng bula in thusawi kha, in chunga chuangin an la tlângaupui ang.

⁴Tin, ka ṭhiante u, ka hrilh a che u, taksa tihluma, chumi hnua eng mah dang ti leh thei tawh lote chu hlau suh ang che u.

⁵Amaherawhchu, tu nge in hlauh tûr ka hrilh lâwk ang che u: a tihhlum hnu pawha Gehenna-a paih theihna thu neia chu hlau rawh u; a ni, ka hrilh a che u, amah mawlh chu hlau rawh u.

⁶Chawngzawng panga dâr tangka pahnihin an hralh ṭhîn lo vem ni? Nimahsela, an zînga pakhat mah Pathianin a hmaih ngai si lo.

⁷In samzaite lam pawh hi chhiar vek a ni asin. Hlau suh u; chawngzawng tam tak aiin in hlu zâwk a ni.

⁸“Tin, ka hrilh a che u, mite hmaa mi ṭan apiang, Pathian vântirhkohte hmaah Mihring Fapain a ṭan ve ang.

⁹Nimahsela, mite hmaa mi phat chu, Pathian vântirhkohte hmaah phat a ni ve ang.

¹⁰Tin, Mihring Fapa sawisêl apiang chu, an sawisêlna chu ngaihdamsak a ni ang; Thlarau Thianghlim meuh sawichhia erawh chu, a sawichhiatna chu ngaihdamsak a ni lo vang.

¹¹“Tin, inkhâwmna ina mite, lalte, hotute hmaa an hruai hunah che u chuan, ‘Engtin nge, eng thuin nge ka chhân ang, eng thu nge ka sawi ang?’ tiin lungkham suh ang che u;

¹²chutih hun takah chuan eng nge in sawi tûr rem, Thlarau Thianghlimin a hrilh ang che u,” a ti a.

¹³Mipui zînga tu emawin Isua hnênah, “Zirtîrtu, ka u hnênah ro mi sem ve tûrin hrilh rawh,” a ti a.

¹⁴Nimahsela, ani chuan a hnênah, “Mihring, nangni chungah tuin nge rorêltuah leh sum semtuah mi siam?” a ti a.

¹⁵Tin, an hnênah, “Fîmkhur ula, awhna rêng rêng lakah chuan invêng rawh u; sum ngah hi mihring dam chhan a ni lo ve,” a ti a.

¹⁶Tin, an hnênah tehkhin thu a sawi a: “Mi hausa tu emaw a lo a hlâwk êm êm a;

¹⁷tichuan, a inngaihtuah a, ‘Engtin nge ka tih ang aw? Ka buh leh bâl dah khâwmna ka nei si lo va,’ a ti a.

¹⁸Tin, ‘Heti hian ka ti teh ang: ka buh inte ka ṭhiat ang a, a aia lianin ka sa ang a; chutah chuan ka buh leh ka sum zawng zawng ka dah khâwm ang.

¹⁹Tin, ka thlarau hnênah, “Thlarau, kum tam tak chhûng atân sum tam tak i khâwl hi; châwl la, eiin bâr la, hlim takin awm rawh,” ka ti ang,’ a ti a.

²⁰Nimahsela, Pathianin a hnênah, ‘Mi â, zâninah hian i thlarau an lâksak dâwn che a ni; i thil deh chhuahte kha tu ta nge ni ta ang le?’ a ti a.

²¹Mahni tâna sum khâwla, Pathian lama ngah si lo chu, chuti chu a ni ṭhîn,” a ti a.

²²Tin, a zirtîrte hnênah, “Chuvângin, ka hrilh a che u, ‘Eng nge ka ei ang aw?’ tiin in nunna thu leh, ‘Eng nge ka silhin ka fên ang aw?’ tiin in taksa thu lungkham suh u.

²³Ei tûr aiin nunna a thupui zâwk a ni, silhfên ai pawhin taksa a thupui zâwk a ni.

²⁴Choâkte hi ngaihtuah rawh u, buh an tuh lo va, an ât hek lo; zêm te, buh in te pawh an nei lo; nimahsela, Pathianin a châwm si a; nangni chu savate ai chuan in hlut zâwkzia mai chu!

²⁵Tin, nangni zîngah lungkham avângin tuin nge mahni dung lam tawng khata tisâng chuang thei?

²⁶Hemi tê mah ti thei lo che ua, engati nge thil dang in lungkham ṭhin?

²⁷“Tûktinpâr ṭhan zia hi ngaihtuah rawh u; hna an thawk lo, la pawh an kai hek lo; nimahsela, ka hrilh a che u, Solomona meuh pawh a ropuina zawng zawnga a inthuam khân, hêng tûktinpâr pakhat tluk pawh hian cheiin a awm lo.

²⁸Chutichuan, ram hnim, vawiin anga nung, a tûka thuka tuah leh mai tûr mah Pathianin chuti kauva a chei chuan, aw, nangni rin tlêmte u, chumi ai chuan silhfên a va pe dâwn che u êm!

²⁹“Tin, in ei tûr te, in in tûr te zawng suh u; tuilairap angin awm pawh awm suh u.

³⁰Khawvêla hnam tinin chûng thil zawng zawng chu an zawng ṭhîn a ni; chûng chu in mamawh tih in Pain a hre reng si a.

³¹Ama ram zawng zâwk rawh u; tichuan, chûng thil pawh chu a pêk belhchhah dâwn che u nia.

³²Pâwl tlêmte u, hlau suh u; ram pêk che u hi in Pa lâwm zâwng tak a ni.

³³“In neih apiang hralh ula, mi retheite hnênah pe rawh u; vânah rûkru kal lohnaah, sûlrûl ei chhiat lohnaah chuan tangka ip hlui thei lo te, sum ral thei lo te insiam rawh u.

³⁴In ro awmna apiangah in rilru pawh a awm dâwn si a.

³⁵“Puan veng rengin, in khâwnvâr pawh alh rengin awm ula;

³⁶miin an pu lawi chaw ei, a lo haw huna kawngkhâr a rawn kik veleha lo hawn thei nghâl tûra an lo nghâk reng ang hian awm rawh u.

³⁷An pu a lo kal hunah bawih lo nghâk reng a hmuhate chu an eng a thâwl ang; tihtakmeuhvin ka hrilh a che u, ani chuan a puan a rawn veng ang a, anmahni chu chaw kîlin a ṭhuttîr ang a, an rawng a rawn bâwl ang.

³⁸Zanlaiah emaw, thawh hunah emaw a lo kala, chutianga a rawn hmuh chuan chûng bawihte chu an eng a thâwl ang.

³⁹Amaherawhchu, hei hi hre rawh u, rûkru a lo kal hun tûr in neituin hria sela, a vêng ang a, a in a reh pawhtîr lo vang.

⁴⁰Nangni pawh inring rengin awm rawh u, in rin loh hunah Mihring Fapa a lo kal dâwn si a,” a ti a.

⁴¹Tin, Peteran, “Lalpa, he tehkhin thu hi keimahni chauh nge min hrilh, mi zawng zawng?” a ti a.

⁴²Tin, Lalpan, “Sum enkawltu rinawm, fing tak, a puin a hun apianga an chaw chan tûr semsak tûrin, a chhûngte chunga hotua a siam tûr chu tu ber nge ni ang le?

⁴³A pu a lo kal hunah bawih chutiang tia a rawn hmuha chu a eng a thâwl ang.

⁴⁴Dik takin ka hrilh a che u, a neih zawng zawng chunga hotuah a siam ang.

⁴⁵Amaherawhchu, chu bawih chuan a rilruin, ‘Ka pu a lo kal lawk dâwn lo ve,’ tiin bawihnute, bawihpate lo vêl sela, eiin bârin lo rui ta sela;

⁴⁶chu bawiha pu chu a rin loh niah, a hriat loh laiin a lo kal ang a, bung hnihah a rawn chhuah ang a, mi rinawm lote chan ang a chantîr ang.

⁴⁷Bawih, a pu duh zâwng hre reng chunga lo inring si lova, a pu duh zâwng ang pawha ti lo chu vawi tam tak an vua ang.

⁴⁸Amaherawhchu, hre lo chunga vuakna khawp thil ti chu vawi tlêm tê an vua ang. Tu pawh tam tak an pêka hnênah chuan tam tak an phût ang, tu pawh tam tak an kawltîra hnênah chuan tam deuh an phût ang.

⁴⁹“Khawvêlah mei thlâk thla tûra lo kal ka ni; tûnah pawh kâng tawh pang sela ka va ti êm!

⁵⁰Nimahsela, baptisma chan tûr ka nei, chumi tleitlâk hma loh chu ka thaw a va ipik êm!

⁵¹Khawvêla rem lêntîra lo kal emaw mi ti elo? Hnai lo ve, ka hrilh a che u, do lentîr tûra lo kal zâwk ka ni;

⁵²tûn hnuah chuan chhûng khatah mi panga an indo vang, pathumin pahnih, pahnihin pathum.

⁵³An indo vang a, pain a fapa, fapain a pa; nuin a fanu, fanuin a nu; piin a mo, movin a pi,” a ti a.

⁵⁴Tin, mipui hnênah pawh chuan, “Thlang lama chhûm chhuak in hmuh chuan, ‘Ruah a sûr dâwn,’ in ti nghâl ṭhîn a; tin, a lo ni ngei ṭhîn.

⁵⁵Tin, chhim thli tleh in hriat chuan, ‘Thaw a sa dâwn e,’ in ti ṭhîn a; tin, a lo ni ngei ṭhîn.

⁵⁶Nangni vervêkte u, khawvêl leh vân awmzia pawh in hre fiah thiam si a, engati nge tûnlai thil hi in hriat fiah thiam loh hi?

⁵⁷Engati nge nangmahnin a fel chu in ngaihtuah loh?

⁵⁸“Tin, rorêltu hmaa i khingpui nên in kal hunin, kal pahin a lakah fihlîmna mawlh zawng hrâm rawh; chuti lo chuan, rorêltu chuan mi man hotu a mantîr ang chia, mi man hotu chuan tân inah a khung hlauh dah ang che.

⁵⁹Ka hrilh a che, dâr tangka derê tê pawh i tlâk kim hma loh chuan chuta ta chu i chhuak lo hul hual ang,” a ti a.