Read Mizo_Old_version CHANCHIN ṬHA LUKA ZIAK 13 Bible Online

CHANCHIN ṬHA LUKA ZIAK 13 - Mizo_Old_version bible

CHANCHIN ṬHA LUKA ZIAK 13

¹Tin, chutih lai tak chuan tute emaw an lo awm a, chu mite chuan Galili rama mi, Pilatan an thisen an pathian biakna sa talhte zînga a telhsakate chanchin chu Isua an hrilh a.

²Tin, ani chuan an hnênah, “Chu Galili rama mite chu, chutiang thil an tuar avâng chuan, Galili rama mi zawng zawng aiin mi sual bîk niin in ring em ni?

³Ni suh e, ka hrilh a che u, nangni pawh in sim loh chuan chutiang bawkin in boral vek ang.

⁴Tin, Siloam in sângin mi sâwm leh pariat a delh hlumte pawh kha, Jerusalem khuaa awmte zawng zawng aiin mi sual bîk niin in ring em ni?

⁵Ni suh e, ka hrilh a che u, nangni pawh in sim loh chuan chutiang bawkin in boral vek ang,” a ti a, a chhâng a.

⁶Tin, he tehkhin thu hi a sawi a: “Tuin emaw a grêp huanah theipui kûng pakhat a nei a; tin, a kûngah chuan a rah a rawn zawng a, pakhat mah a hmu lo va.

⁷Tichuan, grêp hrui enkawltu hnênah, ‘Ngai rawh, kum thum chhûng hian he theipui kûngah hian a rah ka va zawng ṭhîn a, pakhat mah ka hmu si lo; kit rawh; engati nge hmun pawh awha a awm reng ni?’ a ti a.

⁸Tin, ani chuan a hnênah, ‘Ka pu, kumin tal hi awm sela, a vêlin ka lai ang a, leiṭha ka vûr rih ang e;

⁹chumi hnua a rah chuan a ṭha ang a, a rah loh erawh chuan kit mai ang che,’ a ti a,” a ti a.

¹⁰Tin, Chawlhniah ani chuan inkhâwmna in pakhatah a zirtîr a.

¹¹Tin, ngai teh, kum sâwm leh kum riat, ramhuai man, chak loh vei hmeichhe pakhat a awm; chu mi chu a kûn reng a, amah chuan a ding ngîl thei tawp lo va.

¹²Tin, Isuan a hmuh veleh a ko va, a hnênah, “Hmeichhia, i chak lohna chuan a thlah ta a che,” a ti a.

¹³Tin, a chungah a kut a nghat a; tichuan, thawklehkhatan a ngîl ta nghâl a, Pathian a fak ta a.

¹⁴Tin, Isuan Chawlhnia mi a tihdam avângin inkhâwmna in hotu chu a thinur a, mipui chu a bia a, an hnênah, “Mihring hnathawhna tûr ni ruk a awm alâwm; chumi chhûng chuan lo kal ula, intidam rawh u, Chawlhnia lo kal lovin,” a ti a.

¹⁵Lalpa erawh chuan a hnênah, “Nangni vervêkte u, Chawlhniah mahni sebâwng emaw, sabengtung emaw a chaw eina ata phelhin, tui in tûrin in hruai chhuak ṭheuh ṭhîn a ni lo vem ni?

¹⁶He hmeichhia hi Abrahama fanu a ni si a, ngai teh u, Setanan kum sâwm leh kum riat a man reng hi, Chawlhniah pawh hemi phuar hi han phelhsak lohzia em ni?” a ti a, a chhâng a.

¹⁷Chûng thu a sawi lai chuan a hmêlmate zawng zawng chu an zak ta a; mipui erawh chu a thil ropui tih zawng zawng avâng chuan an lâwm vek a.

¹⁸Chutichuan, ani chuan, “Pathian ram chu eng ang nge ni? Eng nên nge teh pawh ka tehkhin ang?

¹⁹Anṭam chi fang khat miin a lâka, a huana a theha ang chu a ni; chu chu a lo ṭo va, thing a lo ni a, chunglêng savate chu a zârahte chuan an riak a,” a ti a.

²⁰Tin, “Pathian ram chu eng nên nge ka tehkhin ang?” a ti leh a.

²¹“Dawidim hmeichhiain a lâka, chhangphut tehkhâwng thum zîngah, a zaa a thawh vek thlenga a phûma ang chu a ni,” a ti a.

²²Tin, ani chuan zirtîr chung zêla Jerusalem khaw lam panin, khaw lian leh khaw tête a tlawh zêl a.

²³Tin, tuin emaw a hnênah, “Chhandamte chu tlêm tê em an nih?” a ti a.

²⁴Tin, ani chuan an hnênah, “Kawngka zîmah chuan luh tum hrâm rawh u; ka hrilh a che u, mi tam takin luh an tum ang a, an lût thei si lo vang.

²⁵In neitu a thawha, kawng a khâr hnu chuan nangnin pâwna dingin, ‘Lalpa, kawng min hawnsak rawh,’ tia, kawngkhâr in rawn kik hunah, anin, ‘Khawii lama mi nge in nih ka hre lo a che u,’ tiin a chhâng ang che u a;

²⁶chutih hunah chuan nangnin, ‘I hmuhah pawh kan eiin kan bâr tawh kha, kan kawtthlêrahte pawh i zirtîr ṭhin kha,’ in la ti ang.

²⁷Tin, anin, ‘Ka hrilh a che u, khawii lama mi nge in nih ka hre lo; nangni thil sual ti zawng zawngte u, ka hnên ata kal bo vek rawh u,’ a la ti ang.

²⁸“Abrahama te, Isaaka te, Jakoba te, zâwlnei zawng zawngte chu Pathian ram chhûnga awm in hmuha, nangni pâwna hnawh chhuah in nih in inhriat hunah, chutah chuan ṭah leh ha ṭhial chu a awm ang.

²⁹Tin, chhak leh thlang, chhim leh hmâr aṭangin an lo kal ang a, Pathian ramah an lo ṭhu ang.

³⁰Tin, ngai teh u, hnuhnûng berte pawh hmasa bera awm tûr an awm a, hmasa berte pawh hnuhnûng bera awm tûr an awm,” a ti a.

³¹Chutih lai tak chuan Pharisai tute emaw an lo kal a, a hnênah, “Chhuak la, heta ta hi kal bo rawh; Herodan tihhlum che a duh êm êm a ni,” an ti a.

³²Tin, ani chuan an hnênah, “Chu sihal hnênah chuan he thu hi va sawi rawh u: ‘Ngai rawh, vawiinah nên, naktûkah nên ramhuaite ka hnawt chhuak ang a, nâte pawh ka tidam ang a, a tûk lehah ka zo vang.’

³³Eng pawh ni rawh se, vawiinah nên, naktûkah nên, a tûk lehah nên ka kal zêl tûr a ni; Jerusalem khaw pâwn lamah zâwlnei thih theih a ni lo ve,” a ti a.

³⁴“Aw Jerusalem, Jerusalem! zâwlneiho thattu, i hnêna an rawn tirhte lunga lo dêng hlumtu! Arpuiin mahni notê a thla hnuaia a awp khâwm angin, i fate vawi eng zât nge awp khâwm ka tum kha! Nimahsela, in duh si lo.

³⁵En teh u, in in chu a ruaka hnutchhiah che uin a awm ta. Ka hrilh a che u, ‘Lalpa hminga lo kal chu a eng a thâwl e,’ in tih hma loh chuan mi hmu leh tawh lo vang,” a ti a.