Read Mizo_Old_version CHANCHIN ṬHA LUKA ZIAK 15 Bible Online

CHANCHIN ṬHA LUKA ZIAK 15 - Mizo_Old_version bible

CHANCHIN ṬHA LUKA ZIAK 15

¹Tin, chhiahkhawntute leh mi sual zawng zawngin a thu hre tûrin a kiang an rawn pan a.

²Tin, Pharisaite leh lehkhaziaktute chu, “He mi hian mi sualte a pâwl a, an hnênahte chaw a ei ve ṭhîn,” tiin an phunnawi ve ve a.

³Tichuan, anin an hnênah he tehkhin thu hi a sawi a;

⁴“Nangni zîngah tu pawhin berâm za nei ula, an zînga pakhat hloh ang ula, thlalêrah sawmkua leh pakuate chu hnutchhiahin, a bo chu in hmuh leh hma loh zawng tu nge zawng lo vang che u?

⁵Tin, in hmuh leh chuan lâwm takin in kokiah in pu ṭhîn.

⁶Tin, in in thlen veleh in ṭhiante leh in vêngte in ko khâwm a, an hnênah, ‘Mi lâwmpui rawh u, ka berâm bo kha ka hmu leh ta e,’ in ti ṭhîn.

⁷Ka hrilh a che u, chutiang bawkin mi fel sawmkua leh pakua sim chuan tûr nei lote chungah ai chuan, mi sual pakhat sim chungah hian vâna mi an lâwm zâwk ang.

⁸“Tin, hmeichhia tu pawh duli sâwm neiin pakhat hloh ang sela, khâwnvâr hâla in phiatin, a hmuh leh hma loh zawng tu nge ngun takin zawng lo vang?

⁹Tin, a hmuh leh chuan a ṭhiante leh a vêngte a ko khâwm a, ‘Mi lâwmpui rawh u, ka duli hloh kha ka hmu leh ta e,’ a ti ṭhîn.

¹⁰Ka hrilh a che u, chutiang bawkin Pathian vântirhkohte hmaah chuan, mi sual pakhat sim chungah an lâwm ṭhîn a ni.

¹¹“Tin, mi tuin emaw fapa pahnih a nei a;

¹²tin, a naupang zâwk chuan a pa hnênah, ‘Ka pa, ro ka chan ai mi pe rawh,’ a ti a. Tichuan, a sum chu an hnênah a sem ta a.

¹³Tin, ni rei lo tê chinah a fapa naupang zâwk chuan a chan ai zawng zawng chu a la khâwm vek a, khaw lamhla takah a kal ta a, chutah chuan nuam lutukin a awm a, a sum chu a khawh ral ta mai mai a.

¹⁴Tin, a deh ral zawh veleh, chu khaw lamah chuan ṭâm nasa tak mai a lo tla a; ei tûr a lo tlachham ta a.

¹⁵Tichuan, chumi khaw lam mi, mi pakhat a va bêl a; chu mi chuan vâwk chaw pe tûrin a lo lamah a tîr a.

¹⁶Tin, englo kâwm vawkin an eite chuan intihpuar a duh êm êm a; tu mân eng mah an pe si lo.

¹⁷“Tin, a inhriat chhuah veleh, ‘Ka pa hnêna inhlawhfate chaw ei sên lohva nei an tam vei nên, kei lah chu hetah rilṭâmin ka thi dâwn si a!

¹⁸Ka tho vang a, ka pa hnênah ka kal ang a, a hnênah, “Ka pa, vâna mi chungah leh nangma mit hmuhin thil ka tisual e;

¹⁹i fapaa vuah tlâk ka ni ta lo ve; i hnêna inhlawhfa pakhat angin mi siam ve rawh,” ka ti ang,’ a ti a.

²⁰“Tichuan, a tho va, a pa hnênah a kal ta a. Chutichuan, hla taka a la awm laiin a pain a lo hmu a, a khawngaih êm êm a, a tlân a, a ir a chuktuah a, a fâwp ngawih ngawih a.

²¹Tin, a hnênah a fapain, ‘Ka pa, vâna mi chungah leh nangma mit hmuhin thil ka tisual e; i fapaa vuah tlâk ka ni ta lo ve,’ a ti a.

²²Nimahsela, a pa chuan a bawihte hnênah, ‘Puan ṭha ber kha han la thuai ula, han sintîr rawh u; a kutah zungbun te, a kephahah pheikhawk te buntîr rawh u;

²³sebâwngno thau tak kha han la ula, talh rawh u, hlim takin i ei ang u;

²⁴he ka fapa hi a thi a, a lo nung leh ta a nih hi; a bo va, kan hmu leh ta a nih hi,’ a ti a. Tichuan, hlim takin an awm ṭan ta a.

²⁵“Tin, a fapa upa zâwk chu lovah a awm a; tin, in a lo thlen dâwn chuan englo tum ri leh lâm thâwm a hre ta a.

²⁶Tichuan, chhiahhlawh pakhat a ko va, ‘Chu eng nge ni ta?’ tiin a zâwt a.

²⁷Tin, ani chuan a hnênah, ‘I nau a lo hâwng a, him taka a hmuh leh avângin i pain sebâwngno thau tak kha a talh a ni,’ a ti a.

²⁸Tin, a thinur a, a lût duh ta lo va; tin, a pa chu a lo chhuak a, a thlêm a.

²⁹Nimahsela, ani chuan a pa hnênah, ‘Ngai rawh, kumkhaw hei leh chen hi ka châwm chia, i thu lah hi ka awih lo ngai si lo va; ka ṭhiante nêna hlimna ka siamna tûrin kêltê pawh mi pe ngai si lo va;

³⁰nimahsela, hei i fapa, nawhchizuarte hnêna i sum ei ral vektu hi a lo haw veleh a tân sebâwngno thau tak kha i lo talh vei a,’ a ti a, a chhâng a.

³¹“Tin, ani chuan a hnênah, ‘Ka fapa, ka hnêna awm reng i ni alâwm, ka neih zawng zawng hi i ta a ni e.

³²Hlim tak leh lâwm taka awm tûr a ni rêng alâwm; he i nau hi a thi a, a lo nung leh ta a; a bo va, kan hmu leh ta a ni si a,’ a ti a,” a ti a.