Read Mizo_Old_version CHANCHIN ṬHA LUKA ZIAK 16 Bible Online

CHANCHIN ṬHA LUKA ZIAK 16 - Mizo_Old_version bible

CHANCHIN ṬHA LUKA ZIAK 16

¹Tin, Isuan a zirtîrte hnênah he thu pawh hi a sawi a: “Mi hausa tuin emaw sum enkawltu a nei a; chu mi chuan a sum a khawh ralsak mai mai kawngah a hnênah an hêk a.

²Tichuan, ani chuan amah chu a ko va, a hnênah, ‘I chungchâng thu ka hriat hi engtizia nge ni? I sum enkawl chanchin mi ziah vek rawh; tûn achinah sum enkawltuah i ṭang thei tawh lo vang,’ a ti a.

³Tin, sum enkawltu chuan a rilruin, ‘Ka puin sum enkawltu aṭanga mi bân dâwn hi engtin nge ka tih ang aw? Lei laih ka peih si lo va, kutdawh lah chu ka zak si a.

⁴Sum enkawla mi bân huna an ina mi awmtîr nân ka tih zia tûr ka hre ta,’ a ti a.

⁵Tichuan, a pu sum batute chu a ko ṭheuh va, a hmasa ber hnênah chuan, ‘Ka pu lakah eng zât nge i bat?’ a ti a.

⁶Ani chuan, ‘Hriak tehkhâwng za,’ a ti a. Tin, ani chuan a hnênah, ‘I lehkha la la, ṭhu thuai la, sawmnga ziak rawh,’ a ti a.

⁷Tin, mi dang hnênah, ‘Nang eng zât nge i bat?’ a ti a. Ani chuan, ‘Buh tehkhâwng za,’ a ti a. Tin, ani chuan a hnênah, ‘I lehkha la la, sawmriat ziak rawh,’ a ti a.

⁸Tin, a pu chuan sum enkawltu fel lo chu a remhriat avângin a fak ta a; êng fate aiin he khawvêl fate hi an tûnlai kawngah chuan an fing zâwk a ni.

⁹“Ka hrilh a che u. Sum lemin in tân ṭhiante siam rawh u; sum a boral huna chatuana awmnaah chuan an awmtîr nân che u.

¹⁰Tu pawh tlêm te chunga rinawm chu tam tak chungah pawh a rinawm ṭhîn; tu pawh tlêm te chunga rinawm lo chu, tam tak chungah pawh a rinawm lo ṭhîn a ni.

¹¹Sum lem chungah mah in rinawm loh chuan, tuin nge sum tak chu kawltîr ang che u?

¹²Mi dang ta chungah mah in rinawm tawh loh chuan, nangmahni ta chu tuin nge pe ang che u?

¹³Chhiahhlawh tu mahin hotu pahnih rawng an bâwl kawp thei lo; pakhat huain pakhat an duh ang, a nih loh leh, pakhat ṭanin pakhat an hmusit ang. Pathian leh sum rawng in bâwl kawp thei lo ve,” a ti a.

¹⁴Tin, Pharisai, tangka ngaihlute chuan chûng thu zawng zawng chu an hria a, an nuihsan a.

¹⁵Tichuan, ani chuan an hnênah, “Mi mit hmuha intifel mai in ni e; nimahsela, Pathianin in rilru a hre si a; mihring zînga an chawimawi chu Pathian mit hmuhin tenawm tak a ni si.

¹⁶Dân leh zâwlneite thu chu Johana lo awm thleng khân a awm a; chumi achinah chuan Pathian ram Chanchin Ṭha hi an hril a, mi tin an lût lui ṭheuh va.

¹⁷Nimahsela, dân thu chhunhan tê tak tê bo ai pawhin, vân leh khawvêl boral a awl zâwk e.

¹⁸“Tu pawh nupui maa, nupui dang nei apiang a uire a ni; tu pawh mi nupui mâk nei apiang a uire a ni.

¹⁹“Tin, mi hausa tu emaw a awm a, puan senduk leh puan zai sîn tak a sin a, ni tin nuamsa takin a awm ṭhîn;

²⁰tin, a hming Lazara, kutdawh pakhat, pân bawm khah lûk, a kawngkhâr bulah an muttîr ṭhîn a,

²¹mi hausa dawhkâna ei nawi tla chu ei a duh a; uite lah chuan a pânte an lo liahsak ṭhîn a.

²²Tin, heti hi a ni a, kutdawh chu a thi a, vântirhkohten an kalpui a, Abrahama ângchhûngah an dah a. Mi hausa pawh chu a thi a, phûmin a awm ta a.

²³Tin, mitthi khuaah chuan na tak tuar rêng rêngin a awm a, a han vanvadâk a, hla taka Abrahama, a ângchhûnga Lazara awm nên a hmu ta a.

²⁴Tin, a au va, ‘Ka pa Abraham, mi khawngaih la, Lazara kha han tîr rawh, a kutzung hmâwr tuiah chiah sela, ka lei tihdaihna tûrin; he meialhah hian ka na êm êm a ni,’ a ti a.

²⁵“Nimahsela, Abrahama chuan, ‘Ka fapa, nangin i dam lai khân thil ṭha i chang a, chutiang bawkin Lazaran thil ṭha lo a chan kha hre ta che; nimahsela, tûnah ani zawng hetah thlamuang takin a awm a, nang zawng i nâ a nih kha.

²⁶Chu lo rêngah pawh, heta ṭanga nangni hnêna kal tumte chu an kal theih lohna tûr leh, tu mah khata ṭanga keini hnêna an lo kai theih lohna tûrin, keini leh nangni inkârah hian leikak nasa tak an siam tlat a ni,’ a ti a.

²⁷“Tin, ani chuan, ‘A nih leh ka pa, ani chu ka pa ina kaltîr tûr talin ka ngên a che;

²⁸pianpui mipa panga ka nei si a; he ka awmnaah hian an lo kal ve dah ang e, ṭhahnemngai takin hrilh teh se,’ a ti a.

²⁹Abrahama erawh chuan, ‘Mosia leh zâwlneite an nei alâwm; chu mite thu chu ngai rawh se,’ a ti a.

³⁰Tin, ani chuan, ‘Ka pa Abraham, ni lo ve; mitthi zînga mi meuh an hnênah kal zâwk sela an sim ang,’ a ti a.

³¹Tin, ani chuan a hnênah, ‘Mosia leh zâwlneite thu an ngaih loh chuan, mitthi zînga mi tholeh mah sela an awih chuang lo vang,’ a ti a,” a ti a.