Read Mizo_Old_version CHANCHIN ṬHA LUKA ZIAK 18 Bible Online

CHANCHIN ṬHA LUKA ZIAK 18 - Mizo_Old_version bible

CHANCHIN ṬHA LUKA ZIAK 18

¹Tin, beidawng lovin an ṭawngṭai fo tûr a ni tih hriattîrna tûrin, an hnênah tehkhin thu a sawi a:

²“Khaw engah emaw rorêltu pakhat a awm a, chu mi chuan Pathian a hlau lo va, mihring lah a ngaihsak hek lo;

³tin, chumi khuaah chuan hmeithai pakhat a awm a; ani chu, ‘Ka khingpui chungah phuba mi lâksak rawh,’ tiin a hnênah a kal fo va.

⁴Tin, ani chuan rei fe a duh lo va; nimahsela, nakinah chuan a rilruin, ‘Pathian hlau lovin mihring ngaihsak lo mah ila,

⁵he hmeithai hian mi tihbuai avângin a phuba ka lâksak teh mai ang; chuti lo chuan, a lo kal fo hian mi la tihah hrep dah ang e,’ a ti a,” a ti a.

⁶Tin, Lalpa vêkin, “Rorêltu fel lo thusawi chu hre rawh u.

⁷An chungah zaidawh rih mah sela, a mi thlan, a chhûn a zâna amah kotute phuba chu Pathianin a lâksak lo vang em ni?

⁸Ka hrilh a che u, an phuba a lâksak thuai ang. Nimahsela, Mihring Fapa hi a lo kal hun chuan, khawvêlah hian rinna a rawn hmu ang em ni?” a ti a.

⁹Tin, mi fel tak nih inringa, mi dang zawng zawng hmusit ṭhîn tute emaw hnênah chuan he tehkhin thu pawh hi a sawi a:

¹⁰“Mi pahnih Pathian biak inah ṭawngṭai tûrin an han kal a; pakhat chu Pharisai a ni a, pakhat chu chhiahkhawntu a ni.

¹¹Pharisai chu a ding a, amah chauhvin heti hian a ṭawngṭai a: ‘Pathian, mi dang anga hlêprute, fel lote, uirête ka nih loh avâng leh he chhiahkhawntu ang pawh hi ka nih loh avângin i chungah ka lâwm e.

¹²Chawlhkâr khat apiangah vawi hnih chaw ka nghei ṭhîn a; ka neih apiang sâwmah pakhat ka pe ṭhîn,’ a ti a.

¹³Chhiahkhawntu erawh chu hla takah a ding a, vân lam pawh a dâk ngam lo va, ‘Pathian, kei mi sual hi mi khawngaih rawh,’ tiin a âwm a inchûm a inchûm ta zâwk a.

¹⁴“Ka hrilh a che u, a hmasa aiin chu mi zâwk chu thiam changin a inah a kal chhuk ta a. Inngaihlu apiang an tlâwm ang a, inngaitlâwm chu chawimawiin an awm ang,” a ti a.

¹⁵Tin, a deh atân a hnênah an nausênte pawh an rawn hruai a; zirtîrte erawh chuan chu chu an hmuh veleh an lo hau va.

¹⁶Nimahsela, Isuan anni chu a ko va, “Naupang tête ka hnênah han kaltîr ula, hnar suh u; Pathian ram chu hetiang mite ta a ni si a.

¹⁷Tihtakmeuhvin ka hrilh a che u, tu pawh Pathian ram chu naupang têin a lawm anga lâwm lo apiang a chhûngah an lût tawp lo vang,” a ti a.

¹⁸Tin, hotu tuin emaw a hnênah, “Zirtîrtu ṭha, chatuana nunna chang tûrin engtin nge ka tih ang?” tiin a zâwt a.

¹⁹Tin, Isuan a hnênah, “Engati nge ṭha mi tih? Mi pakhat chauh lo chu tu mah ṭha an awm lo, chu chu Pathian a ni.

²⁰Thupêkte chu i hria alâwm - ‘Uirê suh, Tualthat suh, Ru suh, Dâwtin hêk suh, I nu leh i pa chawimawi rawh,’ tihte hi,” a ti a.

²¹Tin, ani chuan, “Chûng thu zawng zawng chu ka naupan têt ata ka zâwm zêl ṭhîn,” a ti a.

²²Tin, Isuan chu chu a hriatin a hnênah, “Tunah pawh kawng khat i la bâk e; i neih zawng zawng hralh la, pachhiate hnênah sem rawh; chutichuan, vânah ro i nei ang; tin, lo kal la, mi zui ang che,” a ti a.

²³Ani erawh chuan chûng thu chu a hriatin a lungngai ta êm êm a, a hausak êm avângin.

²⁴Tichuan, Isuan amah chu a en a, “Sum ngahte chu Pathian rama luh a va harsa dâwn êm!

²⁵Mi hausa Pathian rama luh aiin, sanghâwngsei hriau benga luh tlang a awl zâwk a ni,” a ti a.

²⁶Tin, chu thu hriate chuan, “A nih leh, tu nge chhandam ni thei ang le?” an ti a.

²⁷Ani erawh chuan, “Mihring tih rual loh hi Pathian tih theih a ni,” a ti a.

²⁸Tin, Peteran, “Ngai teh, keinin kan in leh lo kalsanin kan zui ta chia,” a ti a.

²⁹Tin, ani chuan an hnênah, “Tihtakmeuhvin ka hrilh a che u, tu pawh Pathian ram avânga in emaw, nupui emaw, unaute emaw, nu leh pa emaw, fate emaw kalsan tawh phawt chu,

³⁰tûn dam chhûng la la hian a aia tam zâwk hmu lo tûr tu mah an awm lo, hun lo la thleng tûra chatuana nunna nên,” a ti a.

³¹Tin, sâwm leh pahnihte chu a hnênah a hruai hrang a, an hnênah, “Ngai teh u, Jerusalem khuaa kan chhoh dâwn hi; zâwlneite thu ziak zawng zawng kha Mihring Fapa chungah hian a thleng ang.

³²Jentailte hnênah an pe ang a, nuihza siam nân an hmang ang a, zahthlâk takin an siam ang a, chil an chhâk ang;

³³tin, an vua ang a, an tihlum ang; tin, ni thum niah a tholeh ang,” a ti a.

³⁴Tin, chûng thu rêng rêng chu a ngaihna an hre lo va; thusawi chu an lakah thupin a awm a, eng sawi nge a nih pawh an hre lo va.

³⁵Tin, heti hi a ni a, Jeriko khua a thlen dâwnin, mitdel tu emaw kawng sîrah kutdawhin a lo ṭhu a;

³⁶chu mi chuan mipui kal thâwm a hria a, engtizia nge ni ta tih a zâwt a.

³⁷Tin, anni chuan Nazareth Isua a kal a ni tih an hrilh a.

³⁸Tichuan, ani chu, “Isu, Davida Fapa, mi khawngaih rawh,” tiin a au ta a.

³⁹Tin, a hmasate chuan ngawi tûrin an hau va; nimahsela, ani chu, “Davida Fapa, mi khawngaih rawh,” tiin a au zual sauh va.

⁴⁰Tichuan, Isua chu a ding a, a hnêna han hruai tûrin thu a pe a; tin, a kiang a lo thlen chuan,

⁴¹“I chungah engtia ka tih nge i duh?” a ti a, a lo zâwt a. Tin, ani chuan, “Lalpa, hmuh theih ka duh,” a ti a.

⁴²Tin, Isuan a hnênah, “Hmu thei tawh ang che, i rinna hi i dampui a ni e,” a ti a.

⁴³Tin, thâwklehkhatan a hmu thei ta nghâl a, Pathian fak chung zêlin amah chu a zui ta a; tin, mi zawng zawng chuan chu chu an hmuhin Pathian an fak a.