Read Mizo_Old_version CHANCHIN ṬHA LUKA ZIAK 19 Bible Online

CHANCHIN ṬHA LUKA ZIAK 19 - Mizo_Old_version bible

CHANCHIN ṬHA LUKA ZIAK 19

¹Tin, Isua chu Jeriko khuaah a lût a, a chhûnpelh dâwn a.

²Tin, ngai teh, mi pakhat a hming Zakaia a awm a; chu mi chu chhiahkhawn hotu a ni a, amah pawh a hausa hle a.

³Tin, Isua chu mi eng ang nge a nih hmuh a tum a; mipui avângin, amah lah a tawi si a, a hmu thei lo va.

⁴Tichuan, a tlân khalh a, a en tûrin theipui kûngah a lâwn a; chumi kawng chu a rawn zawh tûr a ni si a.

⁵Tin, Isua chu chumi hmun a thlen chuan a dâk a, a hnênah, “Zakai, lo chhuk thuai rawh; vawiinah i inah ka thleng tûr a ni,” a ti a.

⁶Tin, hmanhmawh takin a chhuk a, hlim takin amah chu a thleng ta a.

⁷Tin, chu chu an hmuh veleh an zain, “Mi sual hnêna thleng tûrin a luh tâk saw,” an ti a, an phunnawi a.

⁸Tin, Zakaia chu a ding a, Lalpa hnênah chuan, “Ngai teh, Lalpa, ka sum zâtve pachhiate hnênah ka pe ang a; tin, tu lakah pawh thil eng pawh lo hlêpru ila, a leh liin ka rûl leh ang,” a ti a.

⁹Tin, Isuan Zakaia chungthu a sawi a, “Vawiinah he inah hian chhandamna a lo thleng ta, ani pawh Abrahama fapa a ni si a.

¹⁰Boralte zawnga chhandam tûrin Mihring Fapa hi a lo kal a ni rêng a ni,” a ti a.

¹¹Tin, chûng thute chu an ngaihthlâk laiin, Jerusalem khua a hnaih tâk avâng leh, Pathian ram lo lang nghâl tûr nia an rin avângin tehkhin thu a sawi tel a.

¹²Chutichuan, hêng thu hi a sawi a: “Mi ṭha tu emaw ram awpna thu laa lo kîr leh tûrin khaw lamhla takah a kal a.

¹³A kal dâwnin a bawihte sâwm a ko va, an hnênah rangkachak tangka sâwm a pe a, an hnênah, ‘Ka lo thlen leh hma loh zawng hei hian lo sumdâwng rawh u,’ a ti a.

¹⁴Nimahsela, a khuaten an hua a, ‘He mi hi kan lal atân kan duh lo ve,’ ti tûrin a hnungah palai an tlântîr ve a.

¹⁵“Tin, heti hi a ni a, ram awpna thu chu a lâka, a lo kîr leh chuan a bawih, tangka a pêkate chu, an peipun chin hriat nân a kohtîr a.

¹⁶Tin, a hmasa ber chu a lo kal a, ‘Ka pu, i rangkachak tangka kha sâwmin a pung e,’ a ti a.

¹⁷Tin, ani chuan a hnênah, ‘Bawih ṭha, i ti ṭha e; tlêm te chunga i rinawm avângin khaw sâwm chungah hotuah awm rawh,’ a ti a.

¹⁸Tin, a dawttu chu a lo kal a, ‘Ka pu, i rangkachak tangka kha pangain a pung e,’ a ti a.

¹⁹Tin, ani chuan ani hnênah pawh chuan, ‘Nang pawh khaw panga chungah hotuah awm rawh,’ a ti a.

²⁰“Tin, mi dang a lo kal a, ‘Ka pu, en teh, hei i rangkachak tangka kha! Thlan hrûkna puanin ka vawng reng a ni;

²¹mi vîn tak i nih avângin ka hlau che a ni; i dah loh pawh i la ṭhîn a, i tuh loh pawh i ât ṭhîn si a,’ a ti a.

²²“Tin, ani chuan a hnênah, ‘Bâwih sual, i ṭawngka chhuak ngeiin ka thiam loh vang che. Mi vîn tak ka niha, ka dah loh pawh ka lâk ṭhina, ka tuh loh pawh ka ah ṭhin i hria maw?

²³A nih ahnu, engati nge ka tangka hi sumdâwng ina i dah loh? Tichuan, ka hâwnin a pung nên ka ṭhîng tûr a ni,’ a ti a.

²⁴Tin, a kianga dingte hnênah, ‘A rangkachak tangka kha lâksak ula, rangkachak tangka sâwm neitu hnênah pe rawh u,’ a ti a.

²⁵Tin, anni chuan a hnênah, ‘Ka pu, ani zawngin rangkachak tangka sâwm a nei alâwm,’ an ti a.

²⁶‘Ka ti a che u, a nei apiang an pêk belhchhah ang a, a nei lo chu a neih chhun pawh an lâksak ang.

²⁷Nimahsela, hêng mi dotute, an lal atâna mi duh lote hi, rawn hruai ula, ka hmaah that rawh u,’ a ti a,” a ti a.

²⁸Tin, chutiang thu a sawi zawh chuan Jerusalem khaw lam pan chhovin hma a hruai a.

²⁹Tin, heti hi a ni a, Bethphage leh Bethani khaw kiang, Olive tlâng an tih chu, a thlen chuan zirtîrte zînga mi pahnih a tîr a,

³⁰“In hma zâwn khuaah sâwn va kal ta ula; chutah chuan in luh tirhin sabengtungno thlun, tu ma la chuan ngai lohna in va hmu ang; chu chu phelh ula, han kai rawh u.

³¹Tin, tu pawhin, ‘Engah nge in phelh?’ tia an zawh che u chuan, heti hian sawi ang che u, ‘Lalpan a duh a ni,’ tiin,” a ti a.

³²Tin, a tirhte chu an kal ta a, an hnêna a sawi ang ngeiin an va hmu a.

³³Tin, sabengtungno chu an phelh lai chuan a neituten an hnênah, “Sabengtungno kha engah nge in phelh?” an ti a.

³⁴Tin, anni chuan, “Lalpan a duh a ni,” an ti a.

³⁵Tichuan, Isua hnênah an rawn kai ta a; tin, sabengtungno chungah chuan an puante an phah a, a chungah Isua an chuantîr a.

³⁶Tin, a kalna tûr kawngah chuan an puante an phah zêl a.

³⁷Tin, an thlen dâwn hnaihin, Olive tlâng liam dâwnah chuan, zirtîr mipui zawng zawng chu a thil mak tih zawng zawng an hmuh avângin an lâwm a, aw ring takin, “Lalpa hminga Lal lo kal chu fakin awm rawh se, vânah rem thu lêng sela, chungnung berah khian ropuina awm rawh se!” tiin Pathian an fak ta a.

³⁸

³⁹Tin, mipui zînga Pharisai ṭhenkhatin a hnênah, “Zirtîrtu, i zirtîrte hi zilh rawh,” an ti a.

⁴⁰Ani erawh chuan, “Ka hrilh a che u, hêngte hi an ngawih reng chuan lungtê tal an au chhuak tûr a ni,” a ti a, a chhâng a.

⁴¹Tin, a thlen dâwn ruaiin khua chu a hmu ta a, a ṭah chhan a,

⁴²“Aw, nang lul hian tûn chhûng hian thlamuanna tûr thu hi lo hre teh hrâm la! Nimahsela, tûnah zawng i hmuh loh nân a inthup tawh si a.

⁴³I râlten i vêlin lei kulh an siam ang a, an hual ang chia, i vêlin chhuah theih lohvin an awm chhan ang chia, i chhûnga i fanaute, nangmah nên leiah an paih vak ang che, i chhûnga lung intiang rêng rêng an zuah lo vang; an fan lai che i hriat loh avângin chutiang nite chu i chungah a lo la thleng ang,” tiin.

⁴⁴

⁴⁵Tin, Pathian biak inah chuan a va lût a, englo zuartute chu a hnawt chhuak ta a;

⁴⁶an hnênah, “ ‘Ka in chu ṭawngṭaina in a ni ang,’ tih ziak a ni; nangni erawh chuan suam hmangte pûkah in siam zâwk hi,” a ti a.

⁴⁷Tin, ni tin Pathian biak inah chuan a zirtîr ṭhîn a. Tin, puithiam lalte leh lehkhaziaktute leh vântlâng zînga hotu deuhte chuan amah tihboral an tum a;

⁴⁸nimahsela, miten a thu an ngaihthlâk kham theih loh avângin, a tih dân tûr an hre thei lo a ni.