Read Mizo_Old_version CHANCHIN ṬHA LUKA ZIAK 20 Bible Online

CHANCHIN ṬHA LUKA ZIAK 20 - Mizo_Old_version bible

CHANCHIN ṬHA LUKA ZIAK 20

¹Tin, ni khat chu heti hi a ni a, Pathian biak inah mite a zirtîra, Chanchin Ṭha a hril laiin, puithiam lalte leh lehkhaziaktute chu, upate nên a hnênah an lo kal thut a;

²tin, a hnênah, “Tu thuin nge hêng thil hi i tih? Tuin nge thu pe che? Min hrilh rawh,” tiin an zâwt a.

³Tin, ani chuan an hnênah, “Kei pawhin thu kam khat ka zâwt ve ang che u; mi hrilh rawh u.

⁴Johana baptisma kha vâna mi thu nge mihring thu?” a ti a, a chhâng a.

⁵Tin, an inngaihtuah a, “ ‘Vâna mi thu,’ kan tih chuan, ‘Engah nge a thu in awih loh?’ min ti si ang a.

⁶Tin, ‘Mihring thu,’ kan tih chuan mi zawng zawngin lungin min dêng ang; Johana chu zâwlnei a nih an ring si a,” an ti a.

⁷Tichuan, an chhâng a, “Khawi lam zâwk thu nge ni kan hre lo,” an ti a.

⁸Tin, Isuan an hnênah, “Kei pawhin tu thuin nge hêng thil hi ka tih ka hrilh bîk lo vang che u,” a ti a.

⁹Tin, vântlâng hnênah he tehkhin thu hi a sawi ta a: “Tuin emaw grêp huan a siam a, lo enkawltute hnênah thlawh hlawh tûrin a pe a, rei tak thang tûrin ram dangah a kal ta a.

¹⁰Tin, a lawh hun chuan, huana rah chu a chan ai an lo pêk tûrin, lo enkawltute hnênah chuan bawih pakhat a tîr a; nimahsela, lo enkawltute chuan an lo vêl a, kutruakin an kaltîr leh ta a.

¹¹Tin, bawih dang a tîr leh a; chu pawh chu an lo vêl leh bawk a, zahthlâk takin an siam a, kutruak vêkin an kaltîr leh ta a.

¹²Tin, a pathumna a tîr leh pek a; chu mi pawh chu an lo tisil a, an paih chhuak ta a.

¹³“Tin, grêp huan neitupa chuan, ‘Engtin nge ka tih ang aw? Ka fapa duh tak ka tîr mai ang, ani hi an lo zah mahna,’ a ti a.

¹⁴Nimahsela, lo enkawltute chuan ani chu an lo hmuh veleh, ‘He mi hi ro luahtu tûr chu a ni; i that ang u; chutichuan, a ro chu kan tân a ni ang,’ tiin an inrâwn a.

¹⁵Tichuan, grêp huan ata chu an theh chhuak a, an tihlum ta a. Chutichuan, grêp huan neitupa chuan an chungah engtin nge a rawn tih ang?

¹⁶Lo enkawltute chu a rawn tiboral ang a, huan chu mi dangte a pe ang,” a ti a. Tin, chu chu an hriatin, “Chûng êm chu thleng suh se!” an ti a.

¹⁷Nimahsela, ani chuan anniho chu a en a, “He thu an ziak hi eng nge ni le? ‘In satute lung duh loh kha, Chu ngei chu a kila lung ṭangkai ber a lo ni ta,’ tih hi.

¹⁸Tu pawh chumi lung chunga tlu apiang an keh sawm ang; a delh lek phei chu a râwt dip ang,” a ti a.

¹⁹Tin, chutih lai tak chuan lehkhaziaktute leh puithiam lalten man an tum a; nimahsela, mipui chu an hlau va; chu tehkhin thu chu anmahni demin a sawi tih an hre si a.

²⁰Tin, amah chu ram awptu rorêlna leh thuneihnaa thlen atân, a thusawi sual la tûrin an châng reng a, enthlatu, mi ṭha anga awm derte chu an tîr a.

²¹Anni chuan a hnênah, “Zirtîrtu, dik takin thu i sawiin i zirtîr a, tu mah thlei bîk lovin tihtakzetin Pathian kawng thu i zirtîr ṭhîn tih kan hria e;

²²Kaisara hnêna chhiah kan chawi a thiang nge thiang lo?” tiin an zâwt a.

²³Nimahsela, ani chuan an ngamthlêm a ni tih a hria a,

²⁴an hnênah, “Duli mi entîr rawh u,” a ti a. “Tu lem leh tu hming nge chuang hi?” a ti a. Tin, anni chuan, “Kaisara,” an ti a.

²⁵Tin, ani chuan an hnênah, “A nih ahnu, Kaisara thilte chu Kaisara hnênah pe ula, Pathian thilte chu Pathian hnênah pe ta che u,” a ti a.

²⁶Tichuan, mipui hmaa a thu sawi sual lâk tûr an hmu lo va; a chhânna chu mak an ti hle a, an ngawi reng a.

²⁷Tin, Saddukai, thawhlehna a awm lo tite zînga mi tute emaw a hnênah an lo kal a;

²⁸a hnênah, “Zirtîrtu, Mosian, ‘Tu pawh a unaupain nupui nei sela, fa nei lovin thi sela, a unaupain a nupui rochungin, a unaupa tân chi a thlahsak tûr a ni,’ tih min ziaksak a ni.

²⁹Aw le, sal sarih an awm a; a upa berin nupui a nei a, fa nei lovin a thi a.

³⁰A pahnihna chuan a rochung a;

³¹a pathumna chuan a rochung leh a; chutiang ṭheuhvin pasarihte chu fa nei lovin an thi zêl a.

³²Chumi hnuah chuan hmeichhia pawh chu a thi ta a.

³³Chutichuan, thawhleh hunah chuan a tu bera nupui nge ni ang? An pasarih chuan nupuiah an nei ṭheuh si a,” tiin an zâwt a.

³⁴Tin, Isuan an hnênah, “He khawvêl mite hi nupui pasal an innei ṭhîn;

³⁵nimahsela, chûng huna tel tlâkah leh mitthi zîng ata thawhlehnaa tel tlâka ruat apiangte chu nupui pasal an innei dâwn tawh lo ve;

³⁶thih pawh an thi leh thei dâwn tawh lo a ni, vântirhkohte tlukin an awm dâwn si a; thawhlehna fate an nih avângin Pathian fate an ni ang.

³⁷Mitthi kaihthawha an awm tûr thu, Mosia pawhin Hnimbuk thu-ah Lalpa chu, ‘Abrahama Pathian, Isaaka Pathian, Jakoba Pathian,’ a tih lai khân a hriattîr kha.

³⁸Ani chu mitthi Pathian a ni lo va, mi nung Pathian a ni zâwk e; ani ngaih chuan mi zawng zawng an nung vek si a,” a ti a.

³⁹Lehkhaziaktu tuten emaw, “Zirtîrtu, i sawi dik zet mai,” an ti a, an chhâng a.

⁴⁰Thu dang an zâwt ngam tawh si lo.

⁴¹Tin, ani chuan an hnênah, “Krista chu Davida fapa a ni tih engtiziaa sawi ṭhîn nge an nih?

⁴²Fakna Hla Buah Davida ngeiin, ‘Lalpa chuan ka Lalpa hnênah, “I hmêlmate i ke nghahchhana ka siam hma loh zawng Ka ding lamah ṭhu rawh,” a ti,’ a ti a.

⁴³

⁴⁴Chutichuan, Davidan ani chu ‘Lalpa’ a ti si a, engtin nge a fapa a nih theih le?” a ti a.

⁴⁵Tin, mi zawng zawng hriatin a zirtîrte hnênah,

⁴⁶“Lehkhaziaktute lakah fîmkhur rawh u; anni chuan kawrfual haa lên an duh ṭhîn a, dâwr hmunah chibai bûkte, inkhâwmna inah ṭhutphah ṭha berte, ruaiṭhehnaah hmun ṭha berte an ngaina ṭhîn a.

⁴⁷Hmeithai sum an ei a, tlâng bum nân rei tak an ṭawngṭai ṭhîn; chûngho chuan thiam loh an chang nasa lehzual ang,” a ti a.