Read Mizo_Old_version CHANCHIN ṬHA LUKA ZIAK 21 Bible Online

CHANCHIN ṬHA LUKA ZIAK 21 - Mizo_Old_version bible

CHANCHIN ṬHA LUKA ZIAK 21

¹Tin, a dâk chhuak a, mi hausaten thawhlâwm bâwma an thawhlâwm thlâk lai a hmu a.

²Tin, hmeithai rethei tê tu emaw dâr tangka dere pahnih rawn thlâk a hmu bawk a.

³Tichuan, “Tihtakzetin ka hrilh a che u. Hêng zawng zawng ai hian he hmeithai rethei tê hian a thlâk tam zâwk;

⁴hêng zawng zawng hian an neih liama mi thawhlâwmah an thlâk a ni; ani erawh hi chuan a duh lai tak, a intunnunna tûra a neih chhun tê a thlâk vek a ni,” a ti a.

⁵Tin, tuten emaw Pathian biak in thu, lung ṭha tak leh thilpêk khâwma an chei mawizia chu an sawi laiin, ani chuan,

⁶“Hêng in thil hmuh hi, tihchim lohva lung intiang rêng rêng hetah a awm lo vang; chutiang ni chu a la thleng ang,” a ti a.

⁷Tin, anni chuan a hnênah, “Zirtîrtu, chûng chu eng tikah nge a lo awm ang le? Chûng chu a lo thlen dâwn hunah chhinchhiahna eng nge awm ang?” tiin an zâwt a.

⁸Tin, ani chuan, “An tihder loh nân che u fîmkhur rawh u. Mi tam tak, ‘Krista chu ka ni,’ ‘A hun a thleng dâwn ta e,’ tiin keima hming chhâlin an lo kal ang; chu mite chu zui suh u.

⁹Tin, indo thu leh buai thu in hriat hunin hlau suh ang che u; chûng chu a thleng hmasa tûr rêng a ni, tâwpna erawh chu a thleng nghâl rih lo vang,” a ti a.

¹⁰Tin, an hnênah, “Hnam hrang leh hnam hrang an indo vang a, ram hrang leh ram hrang an indo vang a;

¹¹lîr nasa takin a nghîng a nghîng ang a; hmun hrang hrangah ṭâmte a tla ang a, hrite a lêng bawk ang a; vân aṭangin thil hlauhawmte leh chhinchhiahna nasa takte a lo awm ang.

¹²Nimahsela, chûng thil zawng zawng thlen hma chuan an man ang che u a, inkhâwmna inah leh tân inah hruaiin an tiduhdah ang che u a, keima hming avângin lalte leh hotute hmaah an hruai ang che u.

¹³In thiam channa a la ni hlei hlei ang.

¹⁴Chutichuan, chhânna tûr ngaihtuah lâwk lo tûrin in rilruah intinghet rawh u;

¹⁵in hmêlma zawng zawngin an dodâla an hnial theih lohna tûr kâ leh finna ka pe dâwn si che u a.

¹⁶Tin, in nu leh in pate, in unaute, in laichînte, in ṭhiante pawhin an mantîr ang che u; a ṭhen an tihhlumtîr ang che u.

¹⁷Keima hming avângin mi zawng zawng huat in ni ang.

¹⁸Nimahsela, in samzai khat pawh a boral lo vang.

¹⁹In chhelin in nun in chhanhim ang.

²⁰“Nimahsela, sipaihoten Jerusalem khua an hual in hmuh hunah, a boral dâwn tih hria ang che u.

²¹Chutih hunah chuan Judai rama awmte chu tlângahte tlân bo rawh se; a chhûnga awmte chuan chhuahsan rawh se; rama awmte chu a chhûngah lût suh se.

²²Chûng ni chu phuba lâk ni a ni e, thu an ziak zawng zawng a lo thlen theihna tûrin.

²³Chûng niah chuan raite leh nauno pawmte chung a pik ang, khawvêlah hian hrehawm nasa tak a thlen dâwn avâng leh, he chite chungah hian thinurna a thlen dâwn avângin.

²⁴Tin, khandaihah an thi ang a, hnam tin hnênah sala hruaiin an awm ang; tin, Jentailte ni a kin hma loh zawng Jerusalem khua chu Jentailte rah behin a awm ang.

²⁵“Tin, niah te, thlaah te, arsiah te chhinchhiahna a awm ang a; tuifinriat rûm leh a fâwn avângin, leiah pawh hnam tin hrehawmna leh manganna a thleng ang;

²⁶thlabâr avâng leh khawvêla thil lo thleng tûr chu ngaihtuah avângin mite an thidang ang; vân thiltihtheihnate chu a nghîng dâwn si a.

²⁷Chutih hunah chuan Mihring Fapa hi, thiltihtheihna leh ropuina nasa tak nên, chhûm zînga lo kal an hmu ang.

²⁸Tin, chûng thil chu a lo thlen tirhin, en chho ula, dâk chhuak rawh u; in tlanna tûr chu a hnaih tâk avângin,” a ti a.

²⁹Tin, an hnênah tehkhin thu a sawi a: “Theipui kûng leh thing zawng zawng en rawh u;

³⁰a chawrno veleh chu chu in hmu a, nipui a lo thaw dâwn tih mahniin in hre ṭhîn.

³¹Chutiang bawkin nangni pawhin chûng chu a lo thleng in hmuh hun chuan, Pathian ram a lo hnai tawh tih hria ang che u.

³²Tihtakmeuhvin ka hrilh a che u, thil zawng zawng a thlen kim hma loh zawng tûnlai chhuante hi an ral lo vang.

³³Lei leh vân a ral ang a, ka thu erawh chu a ral lo vang.

³⁴“Amaherawhchu, fîmkhur rawh u; chuti lo chuan, ei puar lutuk nên, zu ruih nên, dam chhûng khawsak ngaihtuah nên, in rilru a khat lutuk hlauh ang a, chumi ni chuan thang âwk angin thâwklehkhatan in chungah a lo thleng phut ang.

³⁵Chutiang tak chuan lei chung zawng zawnga awmte chungah chuan a thleng ṭheuh dâwn a ni.

³⁶Chutichuan, chûng thil lo thleng tûr zawng zawng chu pumpelh tlâkah leh Mihring Fapa hmaa ding tlâka ruat in nih theihna tûrin, eng lai pawhin ṭawngṭai chungin ngaihven rawh u,” a ti a.

³⁷Tin, ni tin Pathian biak inah a zirtîr ṭhîn a; zan tin a chhuak a, Olive tlâng an tihah chuan a riak ṭhîn a.

³⁸Tin, zîngah a thu ngaithla tûrin mi zawng zawng Pathian biak inah a hnênah an lo kal ṭhîn.