Read Mizo_Old_version CHANCHIN ṬHA LUKA ZIAK 22 Bible Online

CHANCHIN ṬHA LUKA ZIAK 22 - Mizo_Old_version bible

CHANCHIN ṬHA LUKA ZIAK 22

¹Tin, chhang dawidim telh loh kût, kalhlên kût an tih chu, a hnai ta a.

²Tin, puithiam lal leh lehkhaziaktute chuan a tihhlumna zia an zawng a, vântlâng an hlau si a.

³Tin, sâwm leh pahnihte zînga tel, Juda Iskariota an tiha chhûngah chuan Setana a lût a.

⁴Tichuan, ani chu a va kal a, an hnêna a mantîr theihna tûrzia puithiam lalte leh hotute chu a va râwn a.

⁵Tin, anni chu an lâwm hle a, a hnênah tangka pêk an tiam ta a.

⁶Tin, ani chuan a remti a, mipui awm loh hlâna mantîrna remchâng a zawng ta a.

⁷Tin, chhang dawidim telh loh ni, kalhlên kût, berâmno talhna tûr ni chu a lo thleng ta a.

⁸Tichuan, Isuan Petera leh Johana chu, “Kalhlên kût chaw kan ei tûrin min va buatsaihsak rawh u,” tiin a tîr a.

⁹Tin, anni chuan a hnênah, “Khawiah nge va buatsaih ila i duh?” an ti a.

¹⁰Tin, ani chuan an hnênah, “Ngai teh u, khawpuia in luhin, mipa, bêla tui puin a tâwk ang che u a; a luhna inah zui lût ang che u.

¹¹Tin, in neitupa hnênah chuan, ‘Zirtîrtuin, ka zirtîrteho nên kalhlên kût chaw kan eina tûr, mikhual pindan chu khawiah nge? a ti a che,’ ti ang che u.

¹²Tichuan, ani chuan pindan chungnung zau tak, bungraw awm sa, a entîr ang che u; chutah chuan buatsaih ang che u,” a ti a.

¹³Tin, an kal ta a, an hnêna a sawi ang takin an hmu a; tin, kalhlên kût chaw chu an buatsaih ta a.

¹⁴Tin, a ei a lo hun chuan ani chuan chaw a kîl a, tirhkohte chuan an kîlpui ve a.

¹⁵Tin, an hnênah, “Ka thil tuar hmain he kalhlên kût chaw hi eipui che u ka duh êm êm a ni.

¹⁶Ka hrilh a che u, hei hi Pathian rama a tak tak a nih hma loh zawng, ka ei leh tawh dâwn lo a ni,” a ti a.

¹⁷Tin, no a la a, lâwm thu a sawi zawhin, “Hei hi la ula, insem rawh u;

¹⁸ka hrilh a che u, tûn achinah Pathian ram a lo thlen hma loh zawng, grêp hrui rah tui hi ka in leh tawh dâwn lo a ni,” a ti a.

¹⁹Tin, chhang a la a, lâwm thu a sawi zawhin a phel a, an hnênah a pe a, “Hei hi ka taksa, in aia pêk tûra chu a ni; mi hriat reng nân hei hi ti ṭhîn rawh u,” a ti a.

²⁰Tin, zanriah ei zawhin chutiang bawkin no chu a la a, “He no hi ka thisena thuthlung thar chu a ni, in aia chhuak tûra chu.

²¹“Nimahsela, ngai teh u, mi mantîrtu tûra kut chu ka hnênah dawhkân chungah a awm si a.

²²Mihring Fapa hi an ruat angin a kal dâwn a ni; nimahsela, a mantîrtu tûr mihring chung chu a pik e!” a ti a.

²³Tin, annin, “Kan zîngah chutiang thil ti tûr chu tu nge ni ang le?” tiin an inzâwt ta a.

²⁴Tin, an zîngah tu ber nge ropui bera a ruat tih thu-ah inhnialna a lo chhuak a.

²⁵Tin, ani chuan an hnênah, “Jentailho lalte chu an chungah an lal ṭhîn a; an chunga thuneitute chu, ‘Nu leh pa,’ an ti ṭhîn.

²⁶Nimahsela, nangni zawng chutiang in ni lo vang; in zînga ropui ber chu nau zâwk angin awm sela, lal ber chu rawngbâwltu angin awm zâwk rawh se.

²⁷Tu nge ropui zâwk, chaw kîltu nge rawngbâwltu? Chaw kîltu a ni lo vem ni? Nimahsela, kei zawng in zîngah rawngbâwltu angin ka awm hi.

²⁸“Thlêmna ka tawh chhûng zawng nangni mi awmpuitu in ni a;

²⁹tichuan, ka rama ka dawhkâna in eia in bâr theihna tûrin, ka Pain ram mi ruatsak angin ram ka ruatsak che u a ni; tichuan, Israel hnam sâwm leh hnam hnih rorêlsakin lalṭhutphahah in la ṭhu ang.

³⁰

³¹“Simon, Simon, ngai teh, Setanan buh thlei anga a thlei theihna tûr che uin, nangniho hi a dîl che u asin;

³²nimahsela, i rin a bo loh nân ka ṭawngṭaisak che a ni; i hawi kîr leh hunah nangin i unaute tinghet ang che,” a ti a.

³³Tin, ani chuan a hnênah, “Lalpa, i hnênah chuan tân inah leh thihnaah pawh kal ve ka huam asin,” a ti a.

³⁴Tin, ani chuan, “Peter, ka hrilh a che, vawi thum mi phat hma loh zawng vawiinah hian âr a khuang lo vang,” a ti a.

³⁵Tin, an hnênah, “Tangka ip lova, iptê lova, pheikhawk lova ka tirh chhuah che u khân thil rêng rêng in tlachham em?” a ti a. Tin, anni chuan, “Chham lo,” an ti a.

³⁶Tin, ani chuan an hnênah, “Tûnah erawh chuan tu pawh tangka ip nei chuan keng rawh se, iptê nên; tu pawh khandaih nei lo chuan a puan hralh sela, lei rawh se.

³⁷Ka hrilh a che u, ‘Ani chu mi sual zîngah an chhiar tel ta,’ tih ziak kha ka chungah a lo thleng tûr a ni; ka chungchâng thute kha a thleng zo dâwn ta e,” a ti a.

³⁸Tin, anni chuan, “Lalpa, en teh, hei khandaih pahnih a awm,” an ti a. Ani chuan an hnênah, “A tâwk e,” a ti a.

³⁹Tin, ani chu a chhuak a, a dân pângngaiin Olive tlângah chuan a kal ta a; zirtîrte pawhin an zui a.

⁴⁰Tin, a hmun chu a va thlen chuan an hnênah, “Thlêmnaa in luh loh nân ṭawngṭai rawh u,” a ti a.

⁴¹Tin, lung den phâk chinah emaw a va kal hrang ta a; tin, a ṭhingṭhi a, a ṭawngṭai a,

⁴²“Ka Pa, rem i tih chuan he no hi ka hnên ata la sawn rawh; nimahsela, keia thu ni lovin, nangma thu thu ni zâwk rawh se,” a ti a.

⁴³Tin, vân aṭangin vântirhkoh pakhat, a tiharh tûrin a hnênah a rawn inlâr a.

⁴⁴Tin, a thlaphâng êm êm a, ṭhahnemngai lehzualin a ṭawngṭai a; a thlan chu thi far lian tak angin leiah a far a.

⁴⁵Tin, a ṭawngṭai zawha a thawhin zirtîrte hnênah chuan a lo kal a, an lungngaih avânga an lo muhîl a hmu a;

⁴⁶tin, an hnênah, “Engati nge in muthilh? Thlêmnaa in luh loh nân tho ula, ṭawngṭai rawh u,” a ti a.

⁴⁷Tin, a la sawi lai mêkin, ngai teh, mipui an lo kal a, sâwm leh pahnihte zînga tel Juda an tih chuan an hma a rawn hruai a; tin, fawh tumin Isua a rawn pan a.

⁴⁸Nimahsela, Isua chuan a hnênah, “Juda, Mihring Fapa hi fâwpin i mantîr dâwn em ni?” a ti a.

⁴⁹Tin, a vêla mite chuan thil lo thleng tûr chu an hriatin, “Lalpa, khandaihin kan sât ang em?” an ti a.

⁵⁰Tin, an zînga tuin emaw puithiam lalber bawih chu a sât a, a beng ding lam a sah thlâksak a.

⁵¹Isua erawh chuan, “A tâwk e,” a ti a. Tin, a beng chu a dek a, a tidam ta a.

⁵²Tin, Isuan a hnêna lo kal puithiam lalte, Pathian biak in hotute leh upate hnênah chuan, “Khandaihte, talhtumte kengin, suam hmang man tûr ang rengin in lo chhuak a ni maw?

⁵³Pathian biak ina in hnêna ni tin ka awm laite khân, mi man tumin mi ban si lo va; nimahsela, tûn hi in chêt hun a ni e, thim thuneihna nên,” a ti a.

⁵⁴Tin, an man a, an hruai a, puithiam lalber inah chuan an hruai lût ta a. Tin, Peteran hla tak aṭangin a zui a.

⁵⁵Tin, in hual chhûng kawtlaiah mei an chhêm a, an ṭhu khâwm a, Petera chu an zîngah a va ṭhu ve a.

⁵⁶Tin, mei ênga a ṭhut laiin nula tuin emaw a hmu a, a melh reng a, “He mi pawh hi a hnêna awm kha a nih hi,” a ti a.

⁵⁷Ani erawh chuan, “Hmeichhia, ani chu ka hre lo ve,” tiin a pha a.

⁵⁸Tin, nakin deuhvah mi dangin a rawn hmu leh a, “Nang pawh an zînga mi i nih hi,” a ti a. Petera erawh chuan, “Mihring, ka ni lo ve,” a ti a.

⁵⁹Tin, dârkâr khat lai chinah chuan mi dangin, “He mi pawh hi a hnêna awm kha a ni ngei mai; Galili rama mi a ni alâwm,” a ti tlat a.

⁶⁰Tin, Peteran, “Mihring, i thusawi chu ka hre lo ve,” a ti a. Tin, thâwklehkhatan, a ṭawng lai tak chuan âr a khuang ta nghâl a.

⁶¹Tin, Lalpa chu a hawi a, Petera chu a en a. Tin, Petera chuan Lalpan, “Vawiinah hian âr a khuan hmain vawi thum mi phat ang,” a hnênah a tih thu kha a lo hre chhuak leh ta a.

⁶²Tin, a chhuak a, a ṭap ta zawih zawih a.

⁶³Tin, Isua chu a chelhtuten nuihza siam nân an hmang a, an vua a.

⁶⁴Tin, a mit an tuam a, “Sawi rawh, tu nge vua che?” tiin an zâwt ṭhîn a.

⁶⁵Tin, thu dang tam tak pawhin an sawichhiain an hau va.

⁶⁶Tin, khawvâr veleh vântlâng upaho, puithiam lalte leh lehkhaziaktute chu an rawn inkhâwm a, an rorêlnaah chuan an hruai a,

⁶⁷“Krista i nih zet chuan min hrilh rawh,” an ti a. Tin, ani chuan an hnênah, “Hrilh che u mah ila in awih lo vang;

⁶⁸zâwt che u mah ila in chhâng lo vang.

⁶⁹Nimahsela, tûn achinah chuan Mihring Fapa hi Pathian thiltihtheihna ding lamah a ṭhu tawh ang,” a ti a.

⁷⁰Tin, an zain, “Nang hi Pathian Fapa chu i ni em ni le?” an ti a. Tin, ani chuan an hnênah, “Ni e,” a ti a.

⁷¹Tin, anni chuan, “Eng hriatna dang nge kan ngaih tawh ang? Keimahni ngeiin ama ka chhuak kan hre tawh alâwm,” an ti a.