Read Mizo_Old_version CHANCHIN ṬHA LUKA ZIAK 24 Bible Online

CHANCHIN ṬHA LUKA ZIAK 24 - Mizo_Old_version bible

CHANCHIN ṬHA LUKA ZIAK 24

¹Tin, Chawlhni chuan thupêk angin an châwl ta a; ni sarih ni hmasa berah erawh chuan vârṭianah, englo rimtui an siamte chu kengin thlânah chuan an va kal a.

²Tin, thlân ata lung chu lum sawnin an hmu a;

³tin, an lût a, Lal Isua ruang chu an hmu si lo.

⁴Tin, heti hi a ni a, chûng avânga an mangan lai chuan ngai teh, mi pahnih, puan mi ên khalh thei sin an kiangah an lo ding a;

⁵tin, an hlauhva an hmaia lei an sîk laiin anni chuan an hnênah, “Engati nge mitthi zînga mi nung in zawn?

⁶Hetah a awm tawh lo ve, a tholeh ta; Galili rama a awm laia in hnêna a thusawi kha hre leh rawh u,

⁷‘Mihring Fapa hi mi sualte kuta mantîrin a awm ang a, krawsah an khêng bet ang a, ni thum niah a tholeh tûr a ni,’ a tih kha,” an ti a.

⁸Tin, a thu chu an lo hre leh ta a,

⁹thlân ata chu an haw leh a, sâwm leh pakhatte leh mi dang zawng zawngte hnênah chuan chûng thil zawng zawng chu an hrilh a.

¹⁰(Chûng hmeichhiate chu Magdalini Mari te, Joani te, Jakoba nu Mari te an ni a; an hnêna hmeichhe dangte pawhin tirhkohte hnênah chuan chûng thu chu an hrilh bawk a.)

¹¹Nimahsela, chûng thu chu thu mai maiah an ruat a, an awihsak lo va.

¹²Nimahsela, Petera chu a tho va, thlân lamah chuan a tlân ta a; tin, a kûn a, a bih a, puan zai sîn awmte chauh chu a hmu a; tichuan, thil awmzia chu mak ti takin a in lamah a haw ta a.

¹³Tin, ngai teh, chumi ni tak chuan an zînga mi pahnih chu, khaw pakhat Emmau an tihah an kal dâwn a, chumi khua chu Jerusalem khua aṭangin fîng sawmruk a ni a.

¹⁴Tin, thil lo thleng zawng zawng chu an sawi dûn zêl a.

¹⁵Tin, heti hi a ni a, an sawia an inhnial lai chuan Isua ngeiin a rawn pan a, an hnênah a kal ve ta a.

¹⁶Nimahsela, amah chu an hriat theih loh nân, an mit chu tihvaihin a awm a.

¹⁷Tin, an hnênah, “Kal paha in sawi dun kha eng thu nge ni?” a ti a. Tin, ngui takin an ding ta a.

¹⁸Tin, a hming Kleopa zâwkin a hnênah, “Jerusalem khuaah nangmah chauhvin em ni i chên, tunlaia thil awmzia hi i hriat loh ni?” a ti a, a chhâng a.

¹⁹Tin, ani chuan an hnênah, “Eng thil maw?” a ti a. Tin, anni chuan a hnênah, “Nazareth Isua, Pathian leh mi zawng zawng mit hmuha a thu-ah leh a thiltiha zâwlnei hmingthang tak chanchin thu;

²⁰puithiam lalte leh kan hotuten thah thu pêk tûrin an hruaia, krawsa an khen beh zia thute pawh kha.

²¹Keinin Israel-te tlantu tûr kha a nih kan beisei tehlul nên. Eng pawh ni sela, chûng thil thlenna chin chu vawiin nên ni thum a ni tawh.

²²Chûng lo pawh chu kan pâwlte hmeichhia tute emaw, zîngah a thlânah an va kal a, min rawn timangang a;

²³a ruang hmu si lovin, ‘Pathian vântirhkohte inlâr kan hmu a, chu mite chuan a nung leh tih an sawi e,’ an rawn ti a.

²⁴Tin, kan awmpui zînga tute emaw thlânah chuan an kal a, hmeichhiate sawi ang ngeiin an hmu a; nimahsela, amah chu an hmu si lo va,” an ti a.

²⁵Tin, ani chuan an hnênah, “Mi âte u, zâwlneite thusawi zawng zawng awih kawnga ngawngte u!

²⁶Kristan chûng thil chu tuarin a ropuinaah a lût tûr a ni rêng lo vem ni?” a ti a.

²⁷Tin, Mosia leh zâwlneite zawng zawng lehkhaah a ṭan a, Pathian Lehkha zawng zawnga ama chanchin ziak apiang chu anmahni a hrilhfiah zêl a.

²⁸Tin, an kalna tûr khua chu an thleng dâwn ta a; tin, ani chu hla deuhva kal tum angin a awm a.

²⁹Tin, kâin an chelh a, “Kan hnênah awm ta che; khua a tlai dâwn ta a, ni pawh a tlâk dâwn tawh hi,” an ti a. Tichuan, an hnêna awm tûrin a lût ta a.

³⁰Tin, heti hi a ni a, an hnênah chaw kîla a ṭhutin chhang a la a, mal a sâwm a, a phel a, an hnênah a pe a.

³¹Tin, an mit a lo vâr a, a hmêl an lo hre ta a; tin, ani chu a ral ta mai a.

³²Tin, anni chuan, “Kalkawnga min biak laia Pathian Lehkha Thute min hrilhfiah lai khân, kan thinlung a harh huai rêng lâwm ni kha?” an ti a.

³³Tin, chumi lai tak chuan an tho va, Jerusalem khuaah an kîr leh a, sâwm leh pakhatte leh an ṭhiante awm khâwm chu an hmu a,

³⁴“Lalpa chu a lo tholeh takzet a ni, Simona hnênah pawh a inlâr ta,” an lo ti a.

³⁵Tin, anni pawhin kalkawnga thil lo thleng leh, chhang a phela, a hmêl an lo hriat tâkziate chu an hrilh ve bawk a.

³⁶Tin, chûng thu chu an sawi laiin amah ngei chu an zîngah a lo ding a, an hnênah, “In chungah thlamuanna awm rawh se,” a ti a.

³⁷Nimahsela, râpthlâk an ti êm êm a, an hlau va, thlarau hmu-ah an inruat a.

³⁸Tin, ani chuan an hnênah, “Engati nge in mangan? Engah nge in rilruah rinhlelhna a lo awm?

³⁹Ka kutte, ka kephahte hi en rawh u, hei keimah ngei kha ka nih hi! Mi dek ula, en rawh u; mi hmuh ang hian thlarauvin tisa leh ruh a nei lo ve,” a ti a.

⁴⁰Tin, chu chu a sawi zawhin a kutte, a kephahte chu an hnênah a entîr a.

⁴¹Tin, an lâwm luattuk avânga an la awih loh cheuva mak an tih chhûngin an hnênah, “Hetah englo ei tûr in nei em?” a ti a.

⁴²Tin, sangha rawh hrang khat an pe a.

⁴³Tin, a la a, an hmaah chuan a ei ta a.

⁴⁴Tin, an hnênah, “Hêng hi ka thu kha a ni, Mosia Dânahte, Zâwlnei Lehkhabuahte, Fakna Hla Buahte, ka chanchin ziak apiang a lo thlen tûrzia in hnêna ka awm laia ka hrilh ṭhin che u kha,” a ti a.

⁴⁵Tichuan, Pathian Lehkha Thu hriat nân an thinlung a tifing ta a;

⁴⁶tin, an hnênah, “Hetiangin ziak a ni, ‘Krista chuan hrehawm a tuar ang a, ni thum niah mitthi zîng ata a tholeh ang a,

⁴⁷ama hmingin simna thu leh sual ngaihhnathiamna thu Jerusalem khuaa ṭanin, hnam tin hnênah an hril ang,’ tiin.

⁴⁸Chûng thil zawng zawng chu a hretu in ni e.

⁴⁹Tin, ngai teh u, ka Pa thil tiam chu in chungah ka rawn tîr dâwn e; nimahsela, chung lam ata thiltihtheihnaa an thuam hma loh che u zawng, khawpuiah hian awm reng rawh u,” a ti a.

⁵⁰Tin, Bethani dai kiang thlengin anni chu a hruai chhuak a; tin, a bân a phar a, mal a sâwmsak a.

⁵¹Tin, heti hi a ni a, mal a sâwmsak lai takin anni chu a ṭhen a, vâna hruai chhohvin a awm ta a.

⁵²Tin, chibai an bûk a, lâwm êm êmin Jerusalem khuaah an kîr leh ta a;

⁵³tin, Pathian biak inah chuan Pathian fakin an awm fo ṭhîn a.