Read Mizo_Old_version CHANCHIN ṬHA LUKA ZIAK 3 Bible Online

CHANCHIN ṬHA LUKA ZIAK 3 - Mizo_Old_version bible

CHANCHIN ṬHA LUKA ZIAK 3

¹Tin, Tiberia Kaisara a lal achin kum sâwm leh kum nga kumah (Pontia Pilata chu Judai ram awptu a ni a. Heroda chu Galili ram lal a ni a, a unau Philipa chu Iturea leh Trakonitis ram lal a ni a, Lusania chu Abilene ram lal a ni a,

²Ana leh Kaiapha chu puithiam lalberte an ni a), thlalêrah Zakaria fapa Johana hnênah chuan Pathian thu a lo thleng a.

³Tin, ani chu Jordan lui kam vêl ram tinah a kal a, thil tihsual ngaihdam nân simna baptisma thu a hril zêl a;

⁴Zâwlnei Isaia thu buah: “Thlalêra mi au râwl chuan, ‘Lalpa lamlian sial ula, A kawngte tingîl rawh u,

⁵Kawr tin chhûn khah a ni vek ang a, Tlâng tin mual tin tihhniam a ni bawk ang; Kawng kawite a lo ngîl ang a, Kawng bumbohte a lo rual bawk ang;

⁶Tin, mi zawng zawngin Pathian chhandamna chu an hmu ang,’ a ti,” tih ziak ang khân.

⁷Tin, ani chuan baptisma chang tûra a hnêna mipui lo chhuakte hnênah chuan, “Rûl thlahte u, thinur lo thleng tûr hi tlânsan tûrin tuin nge zilh che u?

⁸Chutichuan, sim hming pu tlâkin rah rawh u, ‘Abrahama kan thlahtu a ni alâwm,’ in rilruin ti mai suh ang che u; Pathianin hêng lungte hi Abrahama thlahahte a dintîr thei e, ka tih che u hi.

⁹Tûn apangin thingbul tinah hreipui an dah ta; chutichuan, thing tin rah ṭhaa rah lo apiang an kit a, meiah an paih ṭhîn,” a ti a.

¹⁰Tin, mipuite chuan a hnênah, “Eng nge kan tih tûr le?” an ti a, an zâwt a.

¹¹Tin, ani chuan an hnênah, “Tu pawh kawr pahnih nei chuan a nei lo hnênah pe rawh se; tu pawh ei nei chuan chutiang bawkin ti rawh se,” a ti a, a chhâng a.

¹²Tin, chhiahkhawntute pawh baptisma chang tûrin an lo kal a, a hnênah, “Zirtîrtu, eng nge kan tih tûr?” an ti a.

¹³Tin, ani chuan an hnênah, “An rêlsak ang che u aliam chu va phût suh u,” a ti a.

¹⁴Tin, sipaite pawhin a hnênah, “Keini pawhin eng nge kan tih tûr?” an ti a, an zâwt a. Tin, ani chuan an hnênah, “Tu mah tiduhdahin va hêk suh u; in hlawh tâwk apiangah lungawi rawh u,” a ti a.

¹⁵Tin, miten an beisei a, mi zawng zawngin Johana chungthu an thinlungah, “Krista a lo ni mial dah law maw?” tia an ngaihtuah laiin,

¹⁶Johana chuan a chhâng a, an zaa hnênah, “Kei zawngin tuiin ka baptis ṭhîn che u a; nimahsela, keimah aia ropui zâwk a lo kal dâwn e, a pheikhawk hrui phelh tlâk pawh ka ni lo ve; ani chuan Thlarau Thianghlim leh meiin a baptis ang che u.

¹⁷A kutin a sisêp a keng a, a hruih zah fai hliauna tûr leh a zêma a buh khungna tûrin; a si erawh chu mei mit thei lovin a hâl ral ang,” a ti a.

¹⁸Tin, fuihna thu dang tam takin mite hnênah Chanchin Ṭha a hril ṭhîn a.

¹⁹Nimahsela, Lal Heroda chu a nau nupui Herodi chungthuah leh a thil tihsual zawng zawng chungah chuan Johanan a zilhhau avângin,

²⁰a thil tihsual zawng zawng belhchhahin Johana chu tân inah a khung ta a.

²¹Tin, heti hi a ni a, mi zawng zawngin baptisma an chan zawhin Isua pawhin baptisma a chang a, a ṭawngṭai a, vân a lo inhawng a.

²²Thlarau Thianghlim chu taksa puin ṭhuro angin a lo chhuk a, a chungah a fu ta a; tin, vân aṭangin aw a lo chhuak a, “Nang, ka fapa duh tak i ni; i chungah ka lâwm êm êm e,” a ti a.

²³Tin, Isuan a zirtîr ṭan tirh lai khân amah chu kum sawmthum lai a ni tawh a, mi ngaih chuan Josefa fapa a ni a, chu mi chu Helia fa a ni a,

²⁴chu mi chu Matthata fa a ni a, chu mi chu Levia fa a ni a, chu mi chu Melkia fa a ni a, chu mi chu Janna fa a ni a, chu mi chu Josefa fa a ni a,

²⁵chu mi chu Mattathia fa a ni a, chu mi chu Amosa fa a ni a, chu mi chu Nahuma fa a ni a, chu mi chu Eslia fa a ni a, chu mi chu Naggaia fa a ni a,

²⁶chu mi chu Maatha fa a ni a, chu mi chu Mattathia fa a ni a, chu mi chu Semeia fa a ni a, chu mi chu Joseka fa a ni a, chu mi chu Joda fa a ni a,

²⁷chu mi chu Joana fa a ni a, chu mi chu Hrisa fa a ni a, chu mi chu Zerubabela fa a ni a, chu mi chu Salathiela fa a ni a, chu mi chu Neria fa a ni a,

²⁸chu mi chu Melkia fa a ni a, chu mi chu Addia fa a ni a, chu mi chu Kosama fa a ni a, chu mi chu Elmadama fa a ni a, chu mi chu Era fa a ni a,

²⁹chu mi chu Isua fa a ni a, chu mi chu Eliezera fa a ni a, chu mi chu Jorima fa a ni a, chu mi chu Matthata fa a ni a, chu mi chu Levia fa a ni a,

³⁰chu mi chu Sumeona fa a ni a, chu mi chu Juda fa a ni a, chu mi chu Josefa fa a ni a, chu mi chu Jonama fa a ni a, chu mi chu Eliakima fa a ni a,

³¹chu mi chu Melea fa a ni a, chu mi chu Menna fa a ni a, chu mi chu Mattatha fa a ni a, chu mi chu Nathana fa a ni a, chu mi chu Davida fa a ni a,

³²chu mi chu Jesaia fa a ni a, chu mi chu Obeda fa a ni a, chu mi chu Boaza fa a ni a, chu mi chu Salmona fa a ni a, chu mi chu Nasona fa a ni a,

³³chu mi chu Aminadaba fa a ni a, chu mi chu Arama fa a ni a, chu mi chu Esroma fa a ni a, chu mi chu Pharesa fa a ni a, chu mi chu Juda fa a ni a,

³⁴chu mi chu Jakoba fa a ni a, chu mi chu Isaaka fa a ni a, chu mi chu Abrahama fa a ni a, chu mi chu Tera fa a ni a, chu mi chu Nahora fa a ni a,

³⁵chu mi chu Seruga fa a ni a, chu mi chu Reuva fa a ni a, chu mi chu Pelega fa a ni a, chu mi chu Ebera fa a ni a, chu mi chu Sela fa a ni a,

³⁶chu mi chu Kainana fa a ni a, chu mi chu Arpaksada fa a ni a, chu mi chu Sema fa a ni a, chu mi chu Nova fa a ni a, chu mi chu Lameka fa a ni a,

³⁷chu mi chu Methusela fa a ni a, chu mi chu Enoka fa a ni a, chu mi chu Jareda fa a ni a, chu mi chu Mahalalela fa a ni a, chu mi chu Kainana fa a ni a,

³⁸chu mi chu Enosa fa a ni a, chu mi chu Setha fa a ni a, chu mi chu Adama fa a ni a, chu mi chu Pathian fa a ni.