Read Mizo_Old_version CHANCHIN ṬHA LUKA ZIAK 4 Bible Online

CHANCHIN ṬHA LUKA ZIAK 4 - Mizo_Old_version bible

CHANCHIN ṬHA LUKA ZIAK 4

¹Tin, Isua chu Thlarau Thianghlimin a khat a, Jordan lui aṭangin a kîr leh a, Diabola thlêm chungin thlalêrah ni sawmli Thlarau hruaiin a awm a.

³Tin, chûng ni chuan eng mah a ei lo; tin, a tâwpah chuan a ril a lo ṭâm ta a. Tin, Diabola chuan a hnênah, “Pathian Fapa i nih chuan he lung hi chhanga chang tûrin thu pe rawh,” a ti a.

⁴Tin, Isuan a hnênah, “ ‘Mihring hi chhang chauhvin an nung lo vang,’ tih ziak a ni,” a ti a, a chhâng a.

⁵Tin, a hruai chho va, mit khap kâr lovah khawvêl ram zawng zawng a entîr a.

⁶Tin, Diabola chuan a hnênah, “Hêng zawng zawng chunga thuneihna leh a ropuina hi ka pe ang che; ka hnêna pêk a ni tawh si a, ka duh apiang hnênah ka pe bawk ṭhîn a ni.

⁷Chutichuan, chibai mi bûk la, a zain i ta a ni vek ang,” a ti a.

⁸Tin, Isuan a hnênah, “ ‘Lalpa i Pathian chibai bûk la, ama rawng chauh bâwl rawh,’ tih ziak a ni,” a ti a, a chhâng a.

⁹Tin, Diabola chuan Jerusalem khuaah a hruai a, Pathian biak in chhîp zumah chuan a dah a; tin, a hnênah, “Pathian Fapa i nih chuan heta ṭang hian tla thla rawh;

¹⁰‘Nangmah humhim tûr chein, I chungthuah zawng A vântirhkohte chu thu a pe ang,’ tih leh,

¹¹‘An kutin an dâwm ang chia; Chuti lo chuan, i kein lung i chhuih hlauh dah ang e,’ tih ziak a ni si a,” a ti a.

¹²Tin, Isuan a hnênah, “ ‘Lalpa i Pathian fiah suh,’ tih a ni e,” tiin a chhâng a.

¹³Tin, Diabola chuan a thlêmna tûr tinrênga a thlêm zawh chuan, a remchân hun atân a kalsan ta a.

¹⁴Tin, Isua chu Thlarau thiltihtheihna puin Galili ramah a haw leh ta a; tin, a chanchin chu, chumi vêl ram tinah chuan a thang ta a.

¹⁵Tin, an inkhâwmna inahte a zirtîr zêl a, mi zawng zawng fakin a awm a.

¹⁶Tin, a seilenna khua Nazareth chu a lo thleng a; tin, Chawlhnia a tih dân pângngaiin inkhâwmna inah a lût a, chhiar tûrin a ding a.

¹⁷Tin, zâwlnei Isaia lehkhabu chu a hnênah an pe a. Tin, lehkhabu zial chu a phelh a, he thu ziakna lai hi a chhar a,

¹⁸“Riangvaite hnênah Chanchin Ṭha hril tûra mi ruat avângin Lalpa Thlarau chu ka chungah a awm; Ani chuan salte hnêna chhuahna thu leh, Mitdelte hnêna mitvâr neih lehna thu sawi tûr te, Tihduhdah tuarte chhuahtîrna tûr te,

¹⁹Lalpa lungawi kum thu sawi tûr tein, Mi tîr a ni,” tih hi.

²⁰Tin, lehkhabu chu a zial a, rawngbâwltu a pe leh a, a ṭhu ta a. Tin, inkhâwmna ina mi zawng zawng mit chu a chungah a fu a.

²¹Tin, an hnênah, “He Pathian Lehkha Thu hi vawiinah hian in hriatah a lo thleng ta,” tiin a sawi ṭan a,

²²Tin, an zain amah an fak a, a kam chhuak khawngaih thute chu mak an ti hle a. Tin, “He mi hi Josefa fapa a ni lo vem ni?” an ti a.

²³Tin, ani chuan an hnênah, “Nangnin he tehkhin thu hi, ‘Dâktawr, nangmah intidam rawh,’ ‘Kapernaum khuaa i thiltih kan lo hriat apiang kha, hetah nangma khaw lamah pawh hian ti rawh,’ tiin mi la hrilh dâwn ngei nâk hi,” a ti a.

²⁴Tin, amah vêkin, “Tihtakmeuhvin ka hrilh a che u, zâwlnei tu mah mahni khaw lama miin an lâwm ngai lo.

²⁵Chutichuan, dik takin ka ti a che u, Elija dam laia kum thum leh thla ruk vân a pina, khawvêla ṭâm nasa tak a lo tlâk khân, Israel ramah hmeithai tam tak an awm a;

²⁶nimahsela, an zînga tu hnênah mah Elija tirh a ni lo va, Sidon ram lama Sarepta khuaa hmeichhe pakhat hmeithai hnênah chauh tirh a nih zâwk kha.

²⁷Tin, zâwlnei Elisa dam lai pawh khân Israel ramah phâr tam tak an awm a; nimahsela, an zîngah tu mah tihthianghlimin an awm lo va, Naamana, Suria rama mi chauh tihthianghlima a awm tâk zâwk kha,” a ti a.

²⁸Tin, inkhâwmna ina mi zawng zawng chuan chûng thu chu an hriat veleh, an lo thinur êm êm a,

²⁹an tho hlawm a, khua ata chu an nam chhuak a, paih thlâk tûrin an khaw awmna khâm kovah chuan an hruai ta a.

³⁰Nimahsela, ani chu an kârah a kal tlang a, a kal ta zêl mai a.

³¹Tin, Galili rama khaw pakhat, Kapernaum-ah chuan a zuk kal ta a. Tin, Chawlhniah mite a zirtîr a;

³²tin, thunei taka a sawi avângin a thu zirtîr chu mak an ti hle a.

³³Tin, inkhâwmna inah chuan ramhuai bawlhhlawh thlarau pai mi pakhat a lo awm a; ani chu aw ring takin,

³⁴“A! Nazareth Isu, keini leh nang eng nge kan inzâwlna awm? Min tiboral tûrin i lo kal em ni? Nang ka hria a che, Pathian Mi Thianghlima i ni e,” tiin a au chhuak a.

³⁵Tin, Isuan a hau va, “Ngawi la, a chhûng ata lo chhuak rawh,” a ti a. Tin, ramhuai chuan a laiah a titlu zet a, tina lovin a chhûng ata chu a lo chhuak ta a.

³⁶Tin, an zain mak an ti hle a, “Hei hi eng thu nge ni le? Thunei tak leh thiltithei takin ramhuai bawlhhlawhte thu a pe a, an chhuah hi,” tiin an inbia a.

³⁷Tin, chumi vêl ram khaw tinah a chanchin a thang ta a.

³⁸Tin, a tho va, inkhâwmna in ata chu a chhuak a, Simona inah a lût ta a. Tin, Simona nupuia nu chu nasa takin a khua a lo sik a; tichuan, a tân an lo ngensak a.

³⁹Tin, a kiangah a ding a, khawsik chu a hau va, a reh ta a; tin, a tho ta nghâl a, an rawng a bâwlsak ta a.

⁴⁰Tin, ni tlâk dâwn laiin natna hrang hranga nâ, damlo nei apiangin a hnênah an rawn hruai a; tin, an zaa chungah chuan a kut a nghat ṭheuh va, a tidam ta zêl a.

⁴¹Tin, ramhuaite pawh, “Pathian Fapa i ni,” tia auvin mi tam tak kawchhûng ata an lo chhuak a. Tin, anmahni a hau va, Krista a ni tih an hriat avângin an ṭawng a phal lo.

⁴²Tin, khawvâr veleh a chhuak a, thlalêr hmunah a kal a; tin, mipuite chuan an zawng a, a hnênah an lo kal a, anmahni a kalsan loh nân chelh an tum a.

⁴³Nimahsela, ani chuan an hnênah, “Khaw dangahte pawh Pathian ram Chanchin Ṭha ka hril tûr a ni, chumi avâng chuan tirh ka ni si a,” a ti a.

⁴⁴Tichuan, Galili rama inkhâwmna inahte thu a hril a.