Read Mizo_Old_version CHANCHIN ṬHA LUKA ZIAK 6 Bible Online

CHANCHIN ṬHA LUKA ZIAK 6 - Mizo_Old_version bible

CHANCHIN ṬHA LUKA ZIAK 6

¹Tin, heti hi a ni a, Chawlhni vawi khat chu buh hmunahte an kal tlang a; a zirtîrte chuan buhvuite chu an thliak a, an kutphahin an nuai a, an ei a.

²Tin, Pharisai tute emaw chuan, “Engati nge Chawlhnia tih thiang lo chu in tih ni?” an ti a.

³Tin, Isuan a chhâng a, “Davida a rilṭâm laia a ṭhiante nêna an thiltih kha, khâng angte pawh kha in chhiar lo vem ni?

⁴Khatia Pathian ina a luha, puithiamte chauh lo chuan ei thian loh chhangdah chu a lâka, a eia, a ṭhiante hnêna a pêk ve thu kha,” a ti a.

⁵Tin, amah vêkin an hnênah chuan, “Mihring Fapa hi Chawlhni Lal a ni,” a ti a.

⁶Tin, heti hi a ni a, Chawlhni dangah chuan inkhâwmna inah a lût a, a zirtîr a; tin, chutah chuan mi pakhat kut ding lam zeng a lo awm a.

⁷Tin, lehkhaziaktute leh Pharisaite chuan a hêkna tûr an hmuh theih nân, Chawlhnia a tihdam dâwn leh dâwn loh an mitmei a.

⁸Nimahsela, anin an rilru chu a hria a, kutzeng hnênah chuan, “Tho la, a laiah ding chhuak rawh,” a ti a. Tin, a tho va, a ding chhuak ta a.

⁹Tin, Isuan an hnênah, “Chawlhniah hian tihṭhat nge thiang tihchhiat? Chhandam nge thiang tihhlum? Ka zâwt a che u,” a ti a.

¹⁰Tin, an za chuan a en vêl a, a hnênah, “I kut phar rawh,” a ti a. Tin, a phar a, a kut chu a dam ta a.

¹¹Chutichuan, an thin tâwtin an puak keh lek lek a, Isua chunga an tih zia tûrah an inrâwn ta a.

¹²Tin, chûng lai chuan heti hi a ni a, a chhuak a, ṭawngṭai tûrin tlângah a kal a, Pathian hnênah a ṭawngṭai zankhua a.

¹³Tin, khawvâr veleh a zirtîrte chu a ko va; an zîng ata sâwm leh pahnih a thlang a, an hmingah pawh tirhkoh a vuah a;

¹⁴chûngte chu Simona (Petera a vuah bawk kha) leh a unau Andria te, Jakoba leh Johana te, Philipa leh Bartholomaia te,

¹⁵Matthaia leh Thoma te, Alphaia fapa Jakoba te, Simona, Zelota an vuah te,

¹⁶Jakoba fapa Juda te, mi vervêk Juda Iskariota te an ni.

¹⁷Tin, an rualin a kal chhuk a, hmun zâwlah a ding a, a zirtîrte mipui nasa tak nên, Judai ram zawng zawng ata leh Jerusalem khua ata leh, Tura leh Sidon khaw lama tuifinriat kam ata mi tam tak nên, chûngho chu a thu ngai duh leh an nate intihdam duhin an lo kal a ni;

¹⁸tichuan, ramhuai bawlhhlawh sawisakte pawh an lo dam ta a.

¹⁹Tin, a hnên ata thiltihtheihna a chhuaha, mi tin a tihdam avângin mipui zawng zawng chuan amah deh an tum a.

²⁰Tin, a dâk chhuak a, a zirtîrte chu a en a. “Nangni retheite u, in eng a thâwl e; Pathian ram in ta a ni si a.

²¹Nangni tûna rilṭâmte u, in eng a thâwl e; In la tlai dâwn si a. Nangni tûna ṭapte u, in eng a thawl e; In la nui dâwn si a.

²²“Mihring Fapa avânga miten an huat che ua, an tuithlâr che ua, an hau che ua, in hming a ṭha lo tia an paih bo dêr hunah in eng a la thâwl ang.

²³Chumi niah chuan lâwm ulang, hlimin zuang rawh u; ngai teh u, vânah in lâwmman a awm hnem si a; chutiang bawkin an thlahtuten zâwlneite chungah an tih ṭhin kha.

²⁴“Amaherawhchu, nangni mi hausate u, in chung a pik e; in thlamuanna in hmu tawh si a.

²⁵“Nangni tûna tlai puarte u, in chung a pik e; in ril a la ṭâm dâwn si a. Nangni tûna nuite u, in chung a pik e; lungngaiin in la ṭap dâwn si a.

²⁶“Mi zawng zawngin an fak hunah che u, in chung a la pik ang, chutiang bawkin an thlahtuten zâwlnei derte chunga an tih kha.

²⁷“Ka thu ngaitute u, ka hrilh a che u, in hmêlmate chu hmangaih ula, a hua che u chu an ṭhatna tûr ti ula,

²⁸ânchhe lawhtu che u chu malsâwmsak ula, a sawisatu che u chu ṭawngṭaisak rawh u.

²⁹“Biang lehlama bêngtu che chu lehlam pawh dawh rawh; tin, i puan lâksaktua hnênah chuan i kawr lâk pawh hnial suh.

³⁰“A dîltu apiang che hnênah pe rawh; tin, i sum lâksaktu che hnênah chuan dîl leh tawh suh.

³¹“Tin, miin in chunga an tiha in duh tûr ang zêlin, mi chungah pawh ti ve rawh u.

³²“Tin, in hmangaitute chauh in hmangaih hian, lawm eng nge in hlawh ang? Mi sualte pawhin an hmangaitute chu an hmangaih ṭhîn asin.

³³Tin, in chunga ṭhate chungah chauh in ṭhat hian, lawm eng nge in hlawh ang? Mi sualte pawhin chutiang bawkin an ti ṭhîn asin.

³⁴Tin, hmuh leh beiseina hnên chauhva thil in pûktîr hian, lawm eng nge in hlawh ang? Mi sualte pawhin a ngai vêka hmu leh tûrin mi sualte hnênah an pûktîr ṭhîn.

³⁵Amaherawhchu, in hmêlmate hmangaih ula, an ṭhatna tûr ti ula, pûktîr rawh u, beidawng hauh lovin; tichuan, in lâwmman a tam ang a, Chungnungbera fate in ni bawk ang; ani chuan mi lâwm nachâng hre lote leh mi sualte a khawngaih ṭhîn.

³⁶In Pain mi a khawngaih angin mi khawngaih ve rawh u.

³⁷“Sawisêl suh u; chutichuan, sawisêlin in awm lo vang; tu mah thiam lovah ruat suh u; chutichuan, thiam lohvin in awm lo vang; ngaidam rawh u; chutichuan, ngaihdamin in awm ang;

³⁸pe rawh u; chutichuan, pêkin in awm ang; ṭhahnemngai taka teha, beng muka, sâwi muka, liam zawih zawihin in malchungah an pe ang che u. In tehna ngai bawkin an tehsak leh dâwn si che u a,” a ti a.

³⁹Tin, an hnênah tehkhin thu a sawi a, “Mitdelin mitdel vêk a hruai thei ang em? An pahnihin khuarkhurumah an tla dûn lo vang em?

⁴⁰Zirtîr chu a zirtîrtu chungah a awm lo; nimahsela, mi tin an zir zawhin an zirtîrtu angin an awm ang.

⁴¹“Tin, engati nge mahni mita khanchhuk awm chu ngaihtuah si lovin, i unau mita hmawlh tê tak tê awm chu i hmuh ni?

⁴²Mahni mita khanchhuk awm chu hmu si lovin, i unau hnênah, ‘Unau, i mita hmawlh tê tak tê awm kha mi lâk chhuahtîr rawh,’ engtin nge i tih theih le? Mi vervêk! I mit ata khanchhuk kha la chhuak hmasa rawh; chutichuan, i unau mit ata hmawlh tê tak tê lâk chhuah tûr chu fiah takin i hmu ang.

⁴³“Thing ṭha rêng rêng rah chhiaa rah a awm lo; thing chhia lah rah ṭhaa rah a awm hek lo.

⁴⁴Thing tin anmahni rah ṭheuhvah a hriat a ni. Miin hruihlîngnei kûngah theipui an lo ngai lo, nghardai kûngah grêp rah an lo ngai bawk hek lo.

⁴⁵Mi ṭha chuan a thinlung ro bâwm ṭha ata thil ṭhate a theh chhuak ṭhîn a; mi sual chuan a thinlung ro bâwm chhia ata thil chhiate a theh chhuak ṭhîn; thinlunga khat liam chu a kâin a sawi ṭhîn a ni si a.

⁴⁶“Tin, nangnin eng atân nge, ka thu zâwm si lova, ‘Lalpa, Lalpa,’ mi tih ṭhin?

⁴⁷Mi tin ka hnêna lo kala, ka thu hriaa zâwm apiang chu tu ang nge an nih ka hriattîr ang che u:

⁴⁸in satu, thûk taka laia, lungpui chunga lungphûm rema ang chu an ni; tin, tui a lo lenin, tuizangkhauhvin chu mi in chu a khawh a, a tinghîng thei lo va, a sak ngun avângin.

⁴⁹Amaherawhchu, hriaa zâwm lo chu, lung phûm lova, lei chung maia in satu ang chu a ni; tin, tuizangkhauhvin chu chu a khawh a, a chim ta nghâl a; chu in sawp chu nasa tak a ni,” a ti a.