Read Mizo_Old_version CHANCHIN ṬHA LUKA ZIAK 7 Bible Online

CHANCHIN ṬHA LUKA ZIAK 7 - Mizo_Old_version bible

CHANCHIN ṬHA LUKA ZIAK 7

¹Tin, mite beng hriata a thu zawng zawng a sawi zawhin, Kapernaum khuaah a lût a.

²Tin, sipai za hotu tu emaw a bawih duh tak a damlo va, a thi lek lek a.

³Tichuan, Isua chanchin a hriat veleh, a bawih rawn tidam tûra ngên chiam tûrin a hnênah Juda-ho upate a tîr a.

⁴Tin, anni chu Isua hnênah an va thleng a, ṭhahnemngai takin an ngên chiam a, “Ani hi hei hi i tihsak tlâk a ni e;

⁵kan hnamte a hmangaih a, kan inkhâwmna in pawh aman min saksak a ni,” an ti a.

⁶Tichuan, Isua chu an hnênah a kal ta a. Tin, in a thlen dâwn hnaihin, sipai za hotu chuan a hnênah a ṭhiante a tîr a, “Lalpa, lo kal harsa suh, ka in chhûng i luhna tlâk a ni lo ve;

⁷chuvângin, i hnêna lo kal tlâk pawh niin ka inring lo va; thu chauh sawi la, ka naupang a dam mai ang.

⁸Kei pawh mi thua awm ka ni a, ka hnuaiah sipaite an awm a; chu mi kha mi chu, ‘Kal rawh,’ ka tih leh a kal ṭhîn; mi dang hnênah pawh, ‘Lo haw rawh,’ ka tih leh a lo haw ṭhîn; ka bawih hnênah pawh, ‘Hei hi ti rawh,’ ka tih leh a ti ṭhîn,” a ti a.

⁹Tin, Isuan chûng thu chu a hriatin amah chu mak a ti hle a, a hawi a, mipui a zuitute hnênah chuan, “Ka hrilh a che u, Israel-te zîngah pawh heti êma rinna nasa hi ka hmu lo,” a ti a.

¹⁰Tin, a mi tirhte chu inah an haw leh a, bawih chu damin an hmu ta a.

¹¹Tin, rei lo têan khaw pakhat Nain an tihah chuan a kal a; a zirtîrte leh mipui tam tak a hnênah an kal ve a.

¹²Tin, kulh kawngkhâr kiang a thlenin, ngai teh, mitthi an rawn zâwn chhuak a, a nu fapa neih chhun a ni a, a nu chu hmeithai a ni si a; an khuate tam tak chu a hnênah an awm a.

¹³Tin, Lalpa chuan hmeithai chu a hmuh veleh a khawngaih êm êm a, “Ṭap suh,” a ti a.

¹⁴Tin, a va hnaih a, hlâng chu a khawih a; tichuan, a zâwntute chu an ding ta a. Tin, “Râwlthar, tho rawh, ka ti a che,” a ti a.

¹⁵Tin, mitthi chu a lo ṭhu chhuak a, a rawn ṭawng ta a. Tin, Isua chuan a nu hnênah a pe ta a.

¹⁶Tin, mi zawng zawngin an hlau va, Pathian an fak a, “Kan zîngah zâwlnei ropui tak a lo awm ta a ni,” an ti a, “Pathianin a mite a rawn tlawh ta a ni,” an ti bawk a.

¹⁷Tin, chumi chungchâng thu chu, Judai ram zawng zawngah leh a kiang vêl ram tinah a thang chhuak ta a.

¹⁸Tin, Johana zirtîrte chuan chûng thu zawng zawng chu Johana an hrilh a.

¹⁹Tichuan, Johanan a zirtîrte pahnih a ko va, Lalpa hnênah chuan a tîr a, “Lo kal tûra chu i ni nge, mi dang kan la ngai ang?” tiin.

²⁰Tin, mite chu a hnênah an lo thlen chuan, “Baptistu Johanan, ‘Lo kal tûra chu i ni nge, mi dang kan la ngai ang?’ tiin i hnênah min tîr a ni,” an ti a.

²¹Tin, chûng lai tak chuan Isuan nate, hripui veite, ramhuai mante tam tak a tidam a, mitdel tam takte pawh an mit a tivâr a.

²²Tin, an hnênah, “Kal leh ta ulang, thil in hmuh leh in hriat hi Johana va hrilh rawh u; mitdelte an mit a lo vâr ta, kebaite kein an lo kal ta, phârte an lo thianghlim ta, bengngawngte pawh an beng a lo vâr ta, mitthite kaihthawhin an awm ta, pachhiaten Chanchin Ṭha hrilh an dawng ta.

²³Tin, tu pawh ka chunga lungnih lohna hmu lo chu an eng a thâwl e,” a ti a, a chhâng a.

²⁴Tin, Johana tirhkohte chu an hâwn hnuin, Isuan mipui hnênah chuan Johana thu a sawi ta a, “Eng en tûrin nge thlalêra in kal chhuah kha? Luang, thli chhêm nghîn maw?

²⁵A nih loh leh, eng en tûr berin nge in kal chhuah kha? Puan nêm sin maw? Ngai rawh u, puan ropui sin leh mi nuamsate chu lal inahte asin an awm.

²⁶A nih loh leh, eng en tûr berin nge in kal chhuah kha? Zâwlnei maw? A nih ngei kha, ka ti a che u, zâwlnei ai pawha ropui zâwk -

²⁷‘En teh, ka tirhkoh i hmaan ka tîr a ni, Ani chuan i hmaah i kawng a siam ang,’ tih, a chanchin an ziaka kha, he mi hi a ni.

²⁸Hmeichhe hrin zîngah Johana aia ropui zâwk an awm lo; nimahsela, Pathian rama mi tê deuh pawh ani ai chuan an ropui zâwk, ka ti a che u,” a ti a.

²⁹Tin, mi zawng zawngin an hriatin, chhiahkhawntute nên, Johana baptisma lo chang tawh an ni a, Pathian an thiam a.

³⁰Pharisaite leh dânhretute erawh chu a hnêna baptisma lo chang tawh an ni ve lo va, anmahni tân Pathianin rem a ruatsak kha an duh lo.

³¹Chutichuan, Isua vêkin, “Tûnlai chhuante hi eng nên nge ka tehkhin ang le? Eng ang nge nih pawh an nih?

³²Naupang, dâwr hmuna ṭhua, ‘Phênglâwng kan tumsak che u a, in lâm si lo va; kan ṭap vak a, in ṭap si lo va,’ tia inauvate ang hi an ni.

³³Baptistu Johana chu a lo kal a, chhang a ei lo va, uain pawh a in lo va, nangnin, ‘Ramhuai a zâwl a nih hi,’ in ti a.

³⁴Mihring Fapa a lo kal a, a eiin a in a, nangnin, ‘En teh u, chaw heh mi, uain heh mi, chhiahkhawntute leh mi sualte ṭhian saw!’ in ti si a.

³⁵Nimahsela, finna chu a rah aṭangin a dikzia a lang a ni,” a ti a.

³⁶Tin Pharisaite zînga mi pakhatin a hnêna chaw eiah a sâwm a. Tin, Pharisai inah chuan a lût a, chaw a kîl a.

³⁷Tin, ngai teh, chumi khuaa hmeichhe sual pakhat awm chuan Pharisai inah chaw kîlin a ṭhu tih a hriat veleh, alabasta bâwmin hriak rimtui a rawn keng a,

³⁸a hnungah a kephah bulah chuan ṭap chungin a ding a, a mittuiin a kephah a lo far huh a, a samin a hru a, a kephah chu a fâwp ngawih ngawih a, hriak rimtui chuan a chulh a.

³⁹Tin, a sâwmtu Pharisai chuan chu chu a hmuh chuan a rilruin, “He mi hi zâwlnei a nih chuan a dektu hmeichhia hi tu nge a nih, mi eng ang nge a nih hriat âwm tak lah ni, mi sual a ni si a,” a ti a.

⁴⁰Tin, Isuan a hnênah, “Simon, i hnênah thu kam khat sawi tûr ka nei,” a ti a, a chhâng a. Tin, ani chuan, “Sawi ta che, Zirtîrtu,” a ti a.

⁴¹Tin, Isuan, “Tangka pûktîrtu tuin emaw leiba pahnih a nei a: pakhatin duli zanga a ba a, pakhatin sawmnga.

⁴²Tin, rulhna an nei lo va, a ngaihhna- thiam ve ve a. Chutichuan, chu mite chuan a tuin nge ani chu hmangaih zâwk ang?” a ti a.

⁴³Simona chuan, “A ngaihhnathiam zual zâwka chuan niin ka ring,” a ti a, a chhâng a. Tin, anin a hnênah, “I ti dik e,” a ti a.

⁴⁴Tin, hmeichhe lam chu a hawi a, Simona hnênah chuan, “He hmeichhia hi i hmu em? I inah ka lo lût a, nangin ka kephah silna tûr tui mi pe lo va, ani erawh hi chuan a mittuiin ka kephah a tihuh a, a samin a hru a ni.

⁴⁵Nangin fawh rêng rêng mi fâwp lo; ani erawh hi chuan ka lo luh tirh ata ka kephah fawh a bâng lo.

⁴⁶Nangin ka lu-ah hriak mi thih lo; ani erawh hi chuan ka kephahah hriak rimtui a chulh.

⁴⁷Chuvângin, ka ti a che, a sual tam tak kha ngaihdamin a awm ta; ani pawhin a hmangaih ta êm êm a nih hi; amaherawhchu, ngaihdam tlêm chuan tlêmin a hmangaih ṭhîn,” a ti a.

⁴⁸Tin, hmeichhe hnênah chuan, “I sualte ngaihdam a ni ta,” a ti a.

⁴⁹Tin, a chaw kîlpuite chuan, “Sualte pawh ngaidam hi tu nge maw ni le?” an ti a.

⁵⁰Tin, anin hmeichhe hnênah chuan, “I rinna hi chhandam i nih phah a ni; thlamuang takin kal rawh,” a ti a.