Read Mizo_Old_version CHANCHIN ṬHA LUKA ZIAK 8 Bible Online

CHANCHIN ṬHA LUKA ZIAK 8 - Mizo_Old_version bible

CHANCHIN ṬHA LUKA ZIAK 8

¹Tin, heti hi a ni a, nakin deuhvah chuan Isuan thuhril leh Pathian ram Chanchin Ṭha thlen chungin, khaw lian leh khaw tête a fang zêl a, a hnênah sâwm leh pahnihte chu an awm a,

²hmeichhia tute emaw ramhuaizâwl dam lehte leh na dam lehte nên. Chûng hmeichhiate chu Mari, a kawchhûng ata ramhuai pasarih chhuak, Magdalini an tih te;

³Heroda sum enkawltu Chuza nupui Joani te, Susani te, mi dang tam takte nên an ni; chûngte chuan mahni neihin a rawng an bâwlsak ṭhîn.

⁴Tin, mipui tam tak an rawn inkhâwm a, khaw tina mi a hnêna an lo kalin, tehkhin thuin thu a sawi a:

⁵“Buh chi thehtu a buh chi thehin a feh a; tin, a theh laiin a ṭhen kalkawng dungah a tla a, miin an rap a, chunglêng savaten an tlân zo ta a.

⁶Tin, a ṭhen pialtlêp chungah a tla a; tin, a ṭiah veleh a hnâwn loh avângin a râwp ta mai a.

⁷Tin, a ṭhen hnimhlîngnei zîngah a tla a, hnim chuan a ṭo rualpui a, a dîp ral ta a.

⁸Tin, a ṭhen lei ṭhaah a tla a, a lo ṭo va, a leh zain a rah ta a,” a ti a. Tin, chûng thu chu a sawi laiin a au va, “Tu pawh hriatna tûra beng nei chuan hre rawh se,” a ti a.

⁹Tin, a zirtîrte chuan a hnênah, “He tehkhin thu hi eng tihna nge ni?” tiin an zâwt a.

¹⁰Tin, ani chuan, “Pathian ram thurûkte chu nangni hriat zawng phal a ni a, mi dang hnênah erawh chuan tehkhin thu chauhvin sawi a ni; hmu mah sela, hmu lo an nih theih nân, bengin hre mah sela, a ngaihna an hriat theih loh nân.

¹¹“Tehkhin thu kha hei hi a ni: buh chi chu Pathian thu a ni.

¹²Tin, kawng dunga mi chu thu hre tawhte hi an ni; tin, Diabola chu a lo kal a, an awih lohva, chhandam an nih theih loh nân an rilru ata chu a lâksak ṭhîn.

¹³Tin, pialtlêp chunga mi chu hêng mi hi an ni: an hriat veleh thu chu lâwm taka pawmte hi; nimahsela, zung rêng an nei lo, rei lo tê chauh an awih a, thlêm an nih hunin an bânsan leh ṭhîn.

¹⁴Tin, hnimhlîngnei zînga tla chu hêng mi hi an ni: an hriat hnuin an kal a, dam chhûng khawsak lungkhamnate, hausaknate, nawmsaknate chuan a dîp a, an rah puitling ṭhîn lo a ni.

¹⁵Lei ṭhaa mi erawh chu hêng mi hi an ni: rilru fel leh ṭhain thu an hria a, an vawng reng a, chhel takin an rah ṭhîn.

¹⁶“Tu mân khâwnvâr hâlin bêlin an khuh lo, khum hnuaiah pawh an dah lo; a lût apiangin a êng an hmuh theih nân a dahnaah an dah zâwk ṭhîn a ni.

¹⁷Puan loh tûra zêp eng mah a awm lo va, hriat loh tûr leh lang lo tûra thuhrûk eng mah a awm hek lo.

¹⁸Chutichuan, eng angin nge in hriat fîmkhur rawh u: tu pawh a nei apiang an pêk belhchhah ang a; tu pawh a nei lo apiang, neia an inruat chhun pawh an lâksak ang,” a ti a.

¹⁹Tin, a nu leh a unaute chuan Isua lam an rawn pan a; nimahsela, mipui avâng chuan a kiang an thleng thei si lo.

²⁰Tin, “I nu leh i unaute nangmah hmuh tumin pâwnah sâwn an ding reng e,” tiin an hrilh a.

²¹Tin, ani chuan an hnênah, “Hêng Pathian thu hriaa awihte hi ka nu leh ka unaute an ni e,” a ti a, a chhâng a.

²²Tin, heti hi a ni a, chûng lai chuan ni khat chu lawngah a chuang a, a zirtîrte nên; tin, an hnênah, “Dîl râl lehlamah sâwn i kai ang u,” a ti a. Tichuan, lawng chu an phelh a, an kal ta a.

²³Tin, an kal laiin Isua chu a lo muhîl ta a; tin, dîlah chuan thlipui a lo tleh chhuk phut a, an lawng chu tuiin a khat dâwn a, hlauhthâwnawm takin an awm ta a.

²⁴Tin, a hnênah an va kal a, an kaitho va, “Zirtîrtu, Zirtîrtu, kan boral dâwn hi le,” an ti a. Tin, ani chu a lo harh a, thli leh tuifâwn chu a hau ta a; tin, a bâng a, a reh ta mai a.

²⁵Tin, an hnênah “Khawiah nge in rinna?” a ti a. Tin, an hlau va, mak an ti hle a, “He mi hi tu nge ni le? Thli leh tui lam pawh thu a pe a, an awih hi?” an ti hlawm a.

²⁶Tin, Galili ram zâwna Gerasin mite ram chu an thleng a.

²⁷Tin, khawmuala a chhuahin, khuaa mi ramhuai man tuin emaw a rawn tâwk a; chu mi chu rei tak puan rêng rêng sin lovin a awm a, inah rêng pawh a awm lo va, thlânahte a awm zâwk ṭhîn a.

²⁸Tin, Isua a hmuh veleh a au va, a hmaah a bawkkhup a, aw ring takin, “Isu, Pathian Chungnungbera Fapa, kei leh nang eng nge kan inzâwlna awm? Mi nghaisa lul suh ang che, ka ngên a che,” a ti a.

²⁹(Isuan ramhuai bawlhhlawh chu, chu mi kawchhûng ata chu chhuak tûrin thu a lo pe tawh si a. Chu mi chu ramhuai chuan a man fo ṭhîn a ni; miten khaidiat leh kawl an buntîr a, an vêng reng ṭhîn a; nimahsela, a phuarnate a tichat a, ramhuaiin thlalêrahte a hnawt chhuak ṭhîn.)

³⁰Tin, Isuan, “I hming eng nge ni?” tiin a zâwt a. Tin, ani chuan, “Nuaia,” a ti a (a kawchhûnga ramhuai tam tak an luh avângin).

³¹Tin, leilâwta kal thu an hnêna pe lo tûrin Isua hnênah an ngên a.

³²Tin, chutah chuan tlângah vawk rual tam tak an tla a; tin, a hnênah vawk kawchhûnga luh an dîl a. Tin, ani chuan thu a pe a.

³³Tin, ramhuaite chu chu mi kawchhûng ata chu an chhuak a, vawk kawchhûngah chuan an lût ta a; tin, vawk rual chu khâmah an tlân chhuk chiam a, dîlah an tlân lût a, tui hâkin an thi ta a.

³⁴Tin, a vulhtute chuan chu thil awmzia chu an hmu a, an tlân a, khuaah leh lovahte chuan an sawi a.

³⁵Tin, “Eng nge lo ni ta?” tia en tûrin an chhuak hlawm a; tin, Isua hnên an lo thleng a, ramhuai chhuahsan hnua chu puan sina rilru pângngai puin, Isua ke bula ṭhu an rawn hmu a; tichuan, an hlau ta a.

³⁶Tin, a hretute chuan ramhuai man a tihdamzia thu chu chûngho chu an lo hrilh a.

³⁷Tin, a vêl Gerasin rama mi zawng zawng chuan an hlauh êm avângin, ani chu an hnên ata kal bo tûrin an ngên a; tin, lawngah a chuang a, a kîr leh ta a.

³⁸Tin, ramhuai chhuahsan hnua erawh kha chuan Isua hnêna awm reng a ngên a.

³⁹Nimahsela, Isuan, “I inah haw la, Pathianin i tân thil a tihsak che hi a ropuizia va hrilh rawh,” tiin a kaltîr ta a. Tichuan, a kal a, khawpui chhûng zawng zawngah chuan, Isuan a tân thil a tihsak ropuizia chu a tlângaupui a.

⁴⁰Tin, Isua a lo kîr leh chuan mipuiin amah an lâwm a; amah lo nghâk reng an ni hlawm si a.

⁴¹Tin, ngai teh, mi pakhat a hming Jaira, inkhâwmna in hotu chu a lo kal a, Isua ke bulah a bawkkhup a, a ina kalah a ngên a;

⁴²fanu mal kum sâwm leh kum hnih emaw lai tûr a nei a, chu mi chu thichhâwnga a lum reng avângin. Tin, Isua a kal laiin mipuihovin an nêk huai huai a.

⁴³Tin, hmeichhe pakhat, kum sâwm leh kum hnih thi pûtin a damlo va, a sum neih zawng zawng chu dâktawrte lakah a dek ral zo tawh a; tu mahin an tidam thei tawh si lo va;

⁴⁴chu mi chu a hnungah a lo kal a, a puan hmâwr a dek a; chawplehchilhin a thi pût chu a lo reh ta nghâl a.

⁴⁵Tin, Isuan, “Mi dek kha tu nge ni?” a ti a. Tin, “Kei chu ka ni lo,” an ti ṭheuh va. Petera leh a ṭhianten, “Zirtîrtu, mipuiin an nêk huai huai chia, an chîl huai huai che alâwm,” an ti a.

⁴⁶Nimahsela, Isuan, “Tuin emaw zawng mi dek a ni, thiltihtheihna ka chhûng ata a chhuak tih ka hre nghe nghe asin,” a ti a.

⁴⁷Tin, hmeichhia chuan a inthup theih loh a hria a, khûr chungin a lo kal a, a hmaah a bawkkhup a, a deh chhan leh chawplehchilha a dam tâk nghâlzia chu mi zawng zawng hmuhah chuan a sawi ta a.

⁴⁸Tin, ani chuan a hnênah, “Ka fanu, i rinna hi i dampui a ni e; thlamuang takin kal rawh,” a ti a.

⁴⁹A la ṭawng lai mêkin, inkhâwmna in hotu in ata chu mi pakhat a lo kal a, “I fanu a thi ta, Zirtîrtu hi tihah duh suh,” a rawn ti a.

⁵⁰Isua erawh chuan chu thu a hriat chuan, “Hlau suh, ring mai rawh; chutichuan, a dam leh ang,” a ti a, a chhâng a.

⁵¹Tin, in chu a va thlen chuan Petera te, Johana te, Jakoba te, naupang nu leh pate chauh lo chu tu mah luh ve a phal lo va.

⁵²Tin, an zain an lo ṭap tuar tuar a, an âwm an chûm an chûm a; chutichuan, ani chuan, “Ṭap suh u, a thi lo ve, a muhîl a ni zâwk,” a ti a.

⁵³Tin, a thi tawh rengin an hre si a, an nuihsan ta mai a.

⁵⁴Isua erawh chuan a kut a chelh a, “Chêmtê, tho rawh,” a ti a, a ko va.

⁵⁵Tin, a thlarau chu a lo kîr leh a, a tho ta nghâl a; tin, englo ei tûr pêk thu a pe a.

⁵⁶Tin, a nu leh a pa chuan mak an ti hle a; nimahsela, ani chuan a thiltih chu tu mah hrilh lo tûrin a ti tlat a.