Read Mizo_Old_version CHANCHIN ṬHA LUKA ZIAK 9 Bible Online

CHANCHIN ṬHA LUKA ZIAK 9 - Mizo_Old_version bible

CHANCHIN ṬHA LUKA ZIAK 9

¹Tin, Isuan sâwm leh pahnihte chu a ko khâwm a, ramhuai zawng zawng chunga thiltihtheihna leh thuneihna leh nate tihdam theihna a pe a.

²Tichuan, Pathian ram thu hril tûr leh damlote tidam tûrin a tîr chhuak ta a.

³Tin, an hnênah, “Zinna atân tiang emaw, iptê emaw, chhang emaw, tangka emaw eng mah keng suh u; kawr pahnih pawh nei suh u.

⁴Tin, in thlenna in apiangah thleng reng zêl ang che u, chu mi in aṭang chuan chhuak ang che u.

⁵Tin, a lâwm lo che u apiang chu, chumi khua ata in chhuah hun chuan, anmahni hriattîrna tûrin, in kephaha vaivut chu thing thla ang che u,” a ti a.

⁶Tichuan, an kal ta a, khua an fang zêl a, ram tinah Chanchin Ṭha an hril a, mi an tidam zêl a.

⁷Tin, Lal Herodan a thiltih zawng zawng chu a lo hre ta a; ṭhenkhatin, “Johana kha a nung leh ta a nih hi,” an tiha,

⁸ṭhenkhatin, “Elija a rawn inlâr ta a nih hi,” an tih avângin a mangang ta a.

⁹Tin, Herodan, “Johana chu a lu ka tan tawh kha; nimahsela, heti kauva a thu ka hriat ṭhina hi tu nge ni?” a ti a. Tin, amah chu hmuh a tum ta a.

¹⁰Tin, tirhkohte chu an lo hâwn lehin, a hnênah an thiltihte an hrilh a. Tin, ani chu anmahni hruaiin, Bethsaida khua an tihah chuan a kal hrang ta a.

¹¹Nimahsela, mipuiho chuan an hria a, an zui zêl a; tin, ani chuan anni chu a lo lâwm a, Pathian ram thu a hrilh a, tihdam ngai apiang a tidam a.

¹²Tin, khua chu a lo tlai dâwn ta a; tin, sâwm leh pahnihte chu an lo kal a, a hnênah, “Kan kiang vêl khuaahte leh lovahte kalin, thlen in leh ei tûr an hmuh theihna tûrin mipui hi kaltîr ta che; hei, thlalêr hmuna awm kan ni si a,” an ti a.

¹³Ani erawh chuan an hnênah, “Nangmahnin ei tûr pe rawh u,” a ti a. Tin, anni chuan, “Hêng mi zawng zawng tân hian ei tûr kan va leisak loh chuan, chhangpêr panga leh sangha pahnih chauh lo chu eng mah kan nei lo,” an ti a.

¹⁴(Patling hlîr pawh sângnga emaw lai an ni si a.) Tin, a zirtîrte hnênah, “A pâwl pâwlin ṭhuttîr rawh u, sawmnga vêl zêlin,” a ti a.

¹⁵Chutiang chuan an ti a, an ṭhuttîr ta vek a.

¹⁶Tin, chhangpêr panga leh sangha pahnih chu a la a, vân lam enin mal a sâwm a, a phel a, mipui hmaa hlui tûrin a zirtîrte hnênah chuan a pe a.

¹⁷Tin, an ei a, an puar ta vek a; tin, an ei bângnawi chu bâwmrâng sâwm leh pahnih an rût khat a.

¹⁸Tin, heti hi a ni a, Isua amah chauhva a ṭawngṭai laiin a zirtîrte chu a hnênah an awm a; an hnênah, “Mipuiten tu nge a ni mi tih?” tiin a zâwt a.

¹⁹Tin, anni chuan, “ ‘Baptistu Johana a ni,’ an ti chia; nimahsela, ṭhenkhat erawh chuan, ‘Elija a ni,’ an ti chia; ṭhenkhatin, ‘Hmânlai zâwlnei tua emaw a tholeh ta a ni,’ an ti che,” tiin an chhâng a.

²⁰Tin, ani chuan an hnênah, “ A nih leh, nangnin tu nge a ni mi tih?” a ti a. Tin, Peteran, “Pathian Krista chu,” tiin a chhâng a.

²¹Tin, chumi thu chu tu mah hrilh loh tûr ti tlatin thu a pe a;

²²“Mihring Fapa hian thil tam tak a tuar tûr a ni a, upate, puithiam lalte, lehkhaziaktute duh lohvin a awm tûr a ni a, thahin a awm tûr a ni a, ni thum niah kaihthawhin a awm bawk tûr a ni,” a ti a.

²³Tin, amah vêkin mi zawng zawng hnênah, “Tu pawhin mi zui a duh chuan, mahni hrehawm pawisa lovin, ni tin a kraws puin mi zui rawh se.

²⁴Tu pawh a nun humhim duh apiangin a chân ang a; tu pawh keimah avânga a nun chân apiangin, chu mi ngei chuan a humhim ang.

²⁵Miin khawvêl hi a pumin nei sela, intiboralin emaw intichhe si sela, a tân eng nge sâwt ang?

²⁶Tu pawh keimah leh ka thu zahpui apiang, Mihring Fapa hian ama ropuina nên, a Pa ropuina nên, a vântirhkoh thianghlimte ropuina nên a lo kal hunah chuan, chu mi chu a rawn zahpui ang.

²⁷Dik takin ka hrilh a che u, heta dingho a ṭhente hi, Pathian ram an hmuh hma loh chuan thihna tem tawp lo tûr an awm,” a ti a.

²⁸Tin, heti hi a ni a, chûng thusawi achin ni riat emaw laiah, Isuan Petera te, Johana te, Jakoba te chu a hruai a, ṭawngṭai tûrin tlângah a kal chho va.

²⁹Tin, a ṭawngṭai laiin a hmêl awmzia chu a lo danglam a, a silhfênte chu a lo vâr a, mi ênkhalh theiin a lo awm ta a.

³⁰Tin, ngai teh, mi pahnih amah nên an inbia a, chu mite chu Mosia leh Elija an ni a;

³¹ropuinaa inthuamin an inlâr a, Jerusalem khuaa a thih tleitlâkna tûr thu an sawi a.

³²Petera leh a ṭhiante erawh chu an muthlu a; tin, an harh veleh a ropuizia leh a hnêna mi pahnih ding chu an hmu ta a.

³³Tin, heti hi a ni a, chu mite chuan Isua an ṭhen dâwn laiin, Peteran Isua hnênah, “Zirtîrtu, kan tân heta awm hi a ṭha e; bâwktê pathum kan khawh ang e; i tân pakhat, Mosia tân pakhat, Elija tân pakhat,” a ti a - a thusawi pawh hre lovin.

³⁴Tin, chûng thu chu a sawi laiin chhûm a lo zîng a, anmahni a hliah ta a; chhûmah chuan an luh laiin an hlau va.

³⁵Tin, chhûmah chuan aw a lo chhuak a, “Hei hi ka Fapa, ka thlana chu a ni, ama thu ngai rawh u,” a ti a.

³⁶Tin, aw chu a reh veleh Isua chu amah chauhvin an hmu ta a. Tin, an ngawi reng a, chûng lai vêl chuan an thil hmuh chu tu mah eng mah an hrilh lo.

³⁷Tin, heti hi a ni a, a tûkah tlâng ata chu an chhuk hnu chuan, mipui tam takin amah chu an lo hmuak a.

³⁸Tin, ngai teh, mipui zîngah chuan mi pakhat a au va, “Zirtîrtu, ka fapa en tûrin ka ngên a che, ka fapa neih chhun a ni si a.

³⁹Ngai teh, ramhuaiin a man ṭhîn a, a au chhuak thut ṭhîn; tichuan, a chilphuante tla khawpin a sawisa ṭhîn a, nasa taka tihthitlinin a kalsan ṭâwk ṭhîn.

⁴⁰Tin, i zirtîrte hnênah hnawt chhuak tûrin ka ngên a; an thei si lo va,” a ti a.

⁴¹Tin, Isuan, “Ṭhangthar rinna nei lova tihmawhte u, eng chen nge in hnênah ka awm anga, ka ngaihtheih ang che u? I fapa chu hetah rawn hruai rawh,” a ti a, a chhâng a.

⁴²Tin, a lo kal laiin ramhuai chuan a titlu vak a, nasa takin a sawisa ta a. Nimahsela, Isuan ramhuai bawlhhlawh chu a hau va, naupang chu a tidam a, a pa hnênah chuan a kaltîr leh ta a.

⁴³Tin, mi zawng zawng chuan Pathian ropuizia chu mak an ti hle a. Chutichuan, mi zawng zawngin a thiltih zawng zawng chu mak an tih lai chuan Isuan a zirtîrte hnênah,

⁴⁴“Hêng thu hi in bengah lût rawh se: Mihring Fapa hi mihringte kutah mantîrin a awm dâwn si a,” a ti a.

⁴⁵Nimahsela, a thusawi chu a ngaihna an hre lo va, an hriat theih loh nân a inthup a ni, a thusawi chu amah lah an zâwt ngam si lo va.

⁴⁶Tin, “Kan zîngah tu nge ropui ber ang?” tiin an lo inhnial a.

⁴⁷Tichuan, Isuan an rilrua an ngaihtuah chu a hria a, naupang tê a kai a, a sîrah a dintîr a,

⁴⁸an hnênah, “Tu pawh ka hming avânga he naupang tê hi lâwm apiang chu keimah mi lâwm an ni ang; tu pawh kei mi lâwm apiang chu mi tîrtu lâwm an ni ang; in zavaia zînga tê ber hi a ni ropui ni,” a ti a.

⁴⁹Tin, Johana chuan, “Zirtîrtu, tu emaw i hminga ramhuaite hnawt chhuak kan hmu a, kan zuinaah che a tel ve loh avângin kan khap ta asin le,” a ti a.

⁵⁰Isua erawh chuan a hnênah, “Khap tawh suh u; tu pawh nangni dodâl lo chu in lama ṭang an ni si a,” a ti a.

⁵¹Tin, heti hi a ni a, amah hruai chhoh a hun dâwnin, Jerusalem khuaa kal tumin a hawi tlat a,

⁵²a hmaah a zirtîrte a tlântîr a; tin, an kal a, amah lo buatsaihsak tûrin Samari mite khaw pakhatah an lût a.

⁵³Tin, a mitmei chu Jerusalem khaw lam pana a lan avângin amah an lo lâwm lo.

⁵⁴Tichuan, a zirtîr Jakoba leh Johana chuan chu chu an hriat veleh, “Lalpa, hêngho kan vek nân hian vân ata mei ko thla ila rem i ti em?” an ti a.

⁵⁵Ani erawh chu a lehhawi a, a kamkhat a.

⁵⁶Tin, khaw dangah an kal ta a.

⁵⁷Tin, kalkawnga an kal laiin tuin emaw a hnênah, “I kalna apiangah ka zui ang che,” a ti a.

⁵⁸Tin, Isuan a hnênah, “Sihalten kua an nei a, chunglêng savate pawhin bu an nei a, Mihring Fapa erawh hi chuan a lu nghahna a nei lo,” a ti a.

⁵⁹Tin, mi dang hnênah, “Mi zui rawh,” a ti a. Nimahsela, ani chuan, “Lalpa, ka pa mi vuitîr zet rawh,” a ti a.

⁶⁰Isua erawh chuan a hnênah, “Mitthiin anmahni mitthi chu vui rawh se; nang chuan Pathian ram thu va hril darh zâwk rawh,” a ti a.

⁶¹Tin, mi dang pawhin, “Lalpa, ka zui ang che; amaherawhchu, ka ina mite ṭawng ṭhain mi thlahtîr zet rawh,” a ti a.

⁶²Tin, Isuan a hnênah, “Tu pawh leilehnaa kut nghata hnung lam en chu, Pathian ram mi ni tlâk a ni lo ve,” a ti a.