Read Mizo_Old_version Deuteronomy 1 Bible Online

Deuteronomy 1 - Mizo_Old_version bible

Deuteronomy 1

¹Hêng thu hi Jordan chhak lam thlalêr, Paran leh Tophel leh Laban leh Hazeroth leh Dizahab inkâra Suph va dep, Araba-a Mosian Israel mi zawng zawng hnêna a sawi chu a ni.

²Horeb tlâng aṭangin Kadesh-barnea chu Seir tlâng lam kawngah ni sâwm leh ni khat kal a ni.

³Tin, kum sawmli kum, thla sâwm leh thla khatna, chumi thla ni khat nî chuan heti hi a ni a, LALPAN anmahni hrilh tûra thu a pêk ang zawng zawng chu Israela thlahte hnênah Mosian a sawi a;

⁴Hesbon-a awm Amor-ho lal Sihona leh Edrei leh Astaroth-a awm Basan lal Oga a thah hnuin,

⁵Jordan chhak lam Moab ramah he dân hi Mosian a puang ṭan ta a,

⁶“LALPA kan Pathian chuan Horeb tlângah min bia a, ‘He tlângah hian in awm rei tâwk tawh e.

⁷Insuan tawh ula, kal chhuak ula, Amor-ho tlâng ramah leh a chhehvêl zawng zawng, Araba-ah te, tlâng ramah te, phai ramah te, Chhim ramah te, Kanaan-hote awmna tuifinriat kamah te leh Lebanon-ah te, luipui, Euphrates lui thlengin kal rawh u.

⁸Ngai teh u, ram chu ka pe tawh diam a che u; in pu Abrahama te, Isaaka te, Jakoba te leh an hnua an thlah leh zêlte hnêna chhechhama LALPAN a pêk ram chu va luah rawh u,’ tiin.

⁹“Tin, chumi lai chuan in hnênah, ‘Keimah ngawt chuan ka zo lo che u a;

¹⁰LALPA in Pathian chuan a tipung che u a, ngai teh u, tûnah hian in tam lam chu vâna arsi zât zet a lo ni ta a.

¹¹LALPA, in pi leh pute Pathian chuan tûn aia a lêt sângin tipung che u sela, a tiam che u angin malsâwm che u rawh se.

¹²Engtin nge keimah chauhvin in buaina te, in phurrit te, in innghirnghona te chu ka phurh zawh ang?

¹³In hnam zînga mi, mi fing, hmang hre mi, chinchâng hre mite inthlang chhuak ula, in chunga hotuah ka siam ang e,’ tiin ka bia che u a.

¹⁴Tin, nangnin, ‘I thil sawi chu kan tân a ṭha hle mai,’ tiin mi chhâng a.

¹⁵Chutichuan, in hnam hotute chu ka pawm a, in hnam zînga mi, mi fing, chinchâng hre mite in chunga hotuah ka siam a, sâng chunga hotu te, za chunga hotu te, sawmnga chunga hotu te, sâwm chunga hotu te, puipate pawh.

¹⁶“Tin, chumi lai chuan in rorêltute chu, ‘In unaute kâra thu chu ngaihthlâksak ula, unau leh unau kârah leh ram dang mi, a awmpui nêna an kârah fel takin rêl rawh u.

¹⁷Rorêlnaah thlei bîk in nei tûr a ni lo; mi tê leh mi lian inang rengin in ngaihthlâksak tûr a ni; tu mah in hlau tûr a ni lo; rorêlna chu Pathian ta a ni si a: in tâna thu khirh lutuk chu ka hnênah in rawn thlen thîn ang a; tin, chu chu ka lo ngaithla ṭhîn ang,’ tiin thu ka pe a.

¹⁸Tin, chumi lai chuan thil in tih dân tûr zawng zawngah thu ka pe che u a.

¹⁹“Tin, LALPAN thu min pêk angin Horeb tlâng aṭang chuan kan chhuak a, Amor-ho tlâng ram kawnga thlalêr zau tak leh râpthlâk tak in hmuh kha kan kal tlang vek a, Kadesh-barnea khua kan va thleng a.

²⁰Tin, in hnênah, ‘LALPA kan Pathianin min pêk Amor-ho tlâng ram chu in lo thleng ta a.

²¹Ngai teh u, LALPA in Pathianin ram chu a pe tawh diam che u a ni; chho ula, LALPA in pi leh pute Pathianin a lo sawi tawh ang khân han luah rawh u; hlau suh ula, zâm hek suh u,’ ka ti a.

²²Tin, ka hnênah in lo kal vek a, ‘A ram te va thlîthlaia, kan chhohna tûr lam kawng leh kan va kalna tûr khaw chanchin te min rawn hrilh leh tûrin, kan hmaah mi va tîr ila,’ in ti a.

²³Chu chuan mi tilâwm hle mai a; tichuan, in zînga mi, mi sâwm leh pahnih, hnam khata pakhat zêl ka thlang a;

²⁴tichuan, an chhuak ta a, tlângah chuan an lâwn chho va, Eskol ruam an han thleng a, an en thlîthlai vek a.

²⁵Chu rama theite chu an lo va, min rawn hawn a, chanchin min rawn thlen a, ‘LALPA kan Pathianin ram min pêk chu ṭha tak a ni,’ an ti a.

²⁶“Nimahsela, in chho duh lo va, LALPA in Pathian thupêk chu in helsan a;

²⁷in puan inahte in phunnawi a, ‘LALPA chuan min huat avângin min tiboral tûra Amor-hote kuta pêk tûrin Aigupta ram ata min hruai chhuak a ni.

²⁸Khawiah chuan nge kan han chhoh vang? Kan unaute chuan, “Mihring chu kan aiin an lian a, an sâng zâwk bawk a; khuate chu a lian hle a, vân tawngin kulh a nei; tin, Anak-ho thlahte pawh kan hmu bawk a,” tiin kan thinlung an titui a,’ in ti a.

²⁹Tin, keiin in hnênah, ‘Anmahni chu ṭih suh ula, hlau bawk hek suh u.

³⁰LALPA in Pathian, in hmahruaitu chuan in mit hmuha Aigupta rama a tihsak tâk che u zawng zawng ang khân, a beihpui ang che u a,

³¹thlalêrah pawh miin a fa a pua angin, LALPA in Pathian chuan hemi hmun in thlen thleng hian, kawng tluanin a puak zia che u in hmuh kha,’ ka ti a.

³²Nimahsela, chuti chung pawhin in puan in zârna tûr zawnsak tûr leh in kalkawng kawhhmuh tûra zâna meia, chhûna chhûma in hma hruaitu LALPA in Pathian chu in ring lo va.

³⁴“Tin, LALPAN in thusawi chu a lo hria a, a thinrim a,

³⁵‘He chhuan sual taka mi hi chuan pakhat tê mahin, in pi leh pute pêk tûra chhia ka chham ram ṭha tak chu an hmu lo vang a,

³⁶Jephunea fapa Kaleba chauh lo chuan; ani zawngin a hmu ang; a va rah ram chu amah leh a fate ka pe ang, ani chuan LALPA chu a pawm tlat avangin,’ tiin chhia a chham a.

³⁷Nangmahni avângin ka chungah pawh LALPA chu a thinur a, ‘Nang pawh hi chutah chuan i lût lo vang.

³⁸I rawngbâwltu Nuna fapa Josua hi chu a lût ang; ani hi fuih rawh, Israel-hote chu a luahtîr dâwn a ni.

³⁹In fanau tê tê, “Râllâkin an la mai ang,” in tih leh, tûna a chhia a ṭha la hre lo in fate hi an lût ang a, anni chu ka pe ang a, an luah ang.

⁴⁰Nangni erawh chu insuan ula, Tuifinriat Sen lamah thlalêrah kal rawh u,’ tiin.

⁴¹“Tin, nangnin, ‘LALPA chungah kan lo sual ta a ni, kan han chho vang a, LALPA kan Pathianin thu min pêk zawng zawng angin kan han bei ang e,’ tiin mi chhâng a. Tichuan, indona thuamhnaw in inbel ṭheuh va, tlânga han chhoh chu thil namênah in ngai a.

⁴²Tin, LALPAN ka hnênah, ‘Chho suh u, han bei bawk hek suh u; in zîngah ka awm si lo, in hmêlmate chuan an lo tihlum dah ang che u, an hnênah ti rawh,’ mi ti a.

⁴³Chu chu ka hrilh che u a, in pawm lo va, LALPA thupêk chu in helsan ta zâwk a, tlângah chuan in han chho lui ta a.

⁴⁴Tin, chu tlânga awm Amor-ho chuan an lo bei che u a, khuai mi ûm angin an lo ûm che u a, Seir aṭangin Horma thlengin an that zêl che u a.

⁴⁵Tin, in lo kîr leh a, LALPA hmaah in ṭap a; nimahsela, LALPA chuan in aw chu a ngaithla duh lo va, a beng pawh a rawn chhi duh lo va.

⁴⁶Chutichuan, chuta in awm chhûng chu han ngaihtuahin Kadesh-ah chuan rei tak in awm a ni.