Read Mizo_Old_version Deuteronomy 10 Bible Online

Deuteronomy 10 - Mizo_Old_version bible

Deuteronomy 10

¹“Chumi lai chuan LALPAN ka hnênah, ‘Lungphêk pahnih, hmâna mi ang kha chher leh la, tlângah ka hnênah lo kal la, thingin bâwm siam rawh.

²Tin, hmâna lungphêk i tihkeh tâktea thu chuang kha lungphêkahte chuan ka ziak ang a, bâwmah chuan i dah dâwn nia,’ a ti a.

³Tichuan, thingri thingin bâwm ka siam a, hmâna mi ang lungphêk pahnih ka chher a, lungphêk pahnih chu kengin tlângah chuan ka chho va.

⁴Tin, lungphêkahte chuan a hmasaa ziak ang, in pun khâwm nîa tlânga mei aṭanga LALPAN in hnêna a sawi thu sâwm pêk chu a ziak a, LALPA chuan mi pe a.

⁵Tin, tlâng ata chu ka lêt thla a, lungphêk chu ka bâwm siamah chuan ka dah a; LALPAN thu mi pêk angin chutah chuan a awm ta reng a.

⁶(“Tin, Israela thlahte chu Beeroth Bene-jaakan aṭangin Mosera-ah an kal a; chutah chuan Arona chu a thi a, tah chuan an phûm a; tin, a fapa Eleazaran a aiawhin puithiam hna a thawk a.

⁷Chuta ṭang chuan Gudgoda-ah an kal a; tin, Gudgoda aṭang chuan tui tamna ram Jotbatha-ah an kal a.

⁸“Chumi lai chuan tûn thlenga LALPA thuthlung bâwm zâwna, LALPA hmaa a rawng bâwla, a hminga malsâwmsaktu ni tûrin Levi chi chu a tihrang a.

⁹Chuvângin, Levia chuan a unaute zîngah chanvo pawh, rochan pawh a nei lo va; LALPA in Pathianin a hnêna a sawi angin LALPA chu a rochan a ni.)

¹⁰“Tin, a hma ang bawk khân tlângah chuan ni sawmli leh zan sawmli ka awm a; tin, chumi ṭum pawh chuan LALPAN ka thu chu a ngaithla a, LALPA chuan a tiboral duh ta lo che u a nih kha.

¹¹Tin, LALPAN ka hnênah, ‘Tho la, mipuite hma hruai rawh; anmahni pêk tûra an pi leh pute hnêna chhechhama ka tiam ram chu an luah tûr a ni,’ a ti a.

¹²“Khai le, Israel mite u, in laka LALPA in Pathianin a phût chu eng mah dang a ni lo va, in ṭhatna tûra LALPA in Pathian ṭiha, a kawng zawng zawng chu zawha, amah hmangaiha, in thinlung zawng zawng leh in rilru zawng zawnga LALPA in Pathian rawng bâwla,

¹³LALPA thupêkte, a dânte zawm tûra tûna thu ka pêk che u pawm hi a ni.

¹⁴Ngai teh u, vân te, vânte vân leh leilung leh a chhûnga awm zawng zawng hi LALPA in Pathian ta vek a ni a.

¹⁵Nimahsela, in pi leh pute hmangaih chu a lâwm zâwng a ni a, hnam dang zawng zawng aiin nangniho hi a hnam thlan in la ni ta cheu va.

¹⁶Chuvângin, in thinlung hmâwr vun tan ula, tihmawh tawh suh u.

¹⁷LALPA in Pathian chu pathiante Pathian, hotute Hotu, Pathian ropui tak, chak tak, ṭihbaiawm tak, tu mah duhsak bîk nei lova, thamna pawh la ngai lo a ni si a.

¹⁸Pa nei lote leh hmeithaite chu fel takin ro a rêlsak ṭhîn a, ram dang mite chu ei tûr leh silhfênte pein a hmangaih ṭhîn a.

¹⁹Chuvângin, ram dang mite chu hmangaih ve rawh u; nangni pawh Aigupta ramah khân ram dang mi in nih kha.

²⁰LALPA in Pathian chu in ṭih ang a, ama rawng chu in bâwl ang a; tin, amah chu in vuan tlat ang a, a hming chhâlin chhia in chham tûr a ni.

²¹Amah chu in fak tûra chu a ni, hêng in mita in hmuh tâk thil ropui tak leh râpthlâk takte tihsaktu che u in Pathian a ni.

²²In pi leh pute chu Aigupta ramah sawmsarih an chhuk a; tûnah chuan tam lama vâna arsi zâtin LALPA in Pathianin a titam ta che u a ni.